Abaz Hado është diplomuar në shkollën artistike “Jordan Misja” në Tiranë. Më pas studioi në “Akademia e Arteve të Bukura” në Tiranë dhe u diplomua në vitin 1983. Dy vjet më vonë, në vitin 1985, kreu studimet pasuniversitare si studiues dhe kritik arti. Ai gjithashtu ka studiuar në degën Menaxhim Art.
Në fushën e arteve pamore, Abaz ushtron një veprimtari të gjerë. Ka marrë pjesë në shumë ekspozita ndërkombëtare dhe në bienale të shumë vendeve të botës dhe në Shqipëri. Një nga veprat e tij është në “Fondin e veprave të artit” të Mbretëreshës së Anglisë.
Ka botuar artikuj të shumtë dhe ka marrë pjesë në diskutime dhe konferenca mbi artet pamore. Abaz, ka botuar edhe monografitë “Guri Madhi Jeta dhe Vepra”, “Për Galerinë Kombëtare të Arteve” dhe “Histori Arti” me bashkautorë.
Për dhjetë vite ai drejtoi emisionin e tij televiziv “Art Shopping” në emisionin më të madh të lajmeve NEWS 24 dhe së fundmi “Art dhe Art” në kanalin kombëtar TVSH.
Abaz Hado ishte drejtor i Galerisë Kombëtare të Arteve dhe zëvendësministër i Kulturës, Rinisë dhe Sporteve. Ai është profesor i Historisë së Artit dhe Komunikimit dhe mban titullin Doktor i Shkencave për Artet.
Abaz Hado është Drejtor i Galerisë së Arteve Tirana, institucioni më i ri kulturor në zemër të qytetit të Tiranës.