UET i akordon titullin “Doctor Honoris Causa” ish- presidentit Alfred Moisiu, burrështetas dhe model për politikën
Në ditën simbol të unitetit dhe paqes për Europën, Universiteti Europian i Tiranës i akordoi titullin “Doctor Honoris Causa” personalitetit që i mishëroi më së miri këto vlera gjatë ushtrimit të detyrës së kryetarit të shtetit të Shqipërisë, z. Alfred Moisiu. Me një karrierë të gjatë ushtarake e politike, Moisiu mbajti postin e presidentit të Shqipërisë në vitet 2002-2007, duke dalluar me përkushtimin, respektin ndaj ligjit, paanshmërinë, përpjekjen për unitet dhe bashkim kombëtar.
Nderimi u bë në një ceremoni të veçantë në ambientet e universitetit, me të ftuar kryetaren e Kuvendit, znj. Elisa Spiropali, ish-presidentin e Kosovës, z. Behgjet Pacolli, politikanë me kontribut ndër vite, personalitete dhe figura publike të fushave të ndryshme, rektorë të universiteteve partnere, familjarë, miq dhe bashkëpunëtorë të z. Moisiut.
Duke shpjeguar arsyen e zgjedhjes së kësaj datë për dhënien e këtij titulli, presidenti i UET, prof. asoc. dr. Selami Xhepa tha se paqja gati 80-vjeçare e Europës është lëkundur dhe më shumë se kurrë kërkohen jo vetëm burime ekonomike, por mbi të gjitha lidership, modele të shtetarëve të urtë që kanë ditur ta çojnë kontinentin drejt prosperitetit.
“Ju z. Moisiu mendoj se jeni një shembull shtetari se si duke vendosur në radhë të parë interesat afatgjata të vendit duke bërë që kontributi juaj të përjetësohet në historinë e vendit.”
Kryetarja e Kuvendit, znj. Elisa Spiropali përgëzoi universitetin, duke u shprehur se nuk mund të kishte ditë më të bukur dhe më frymëzuese për një nderim të tillë. “UET ka nderuar me këtë titull mjaft personalitete të njohura të vendit dhe të vendeve të tjera. Është kthyer në një qendër graviteti jo vetëm për akademikët, por edhe për njerëzit e shquar të vendit. Në asnjë rast ky titull nuk ka pasur këtë domethënie që ka sot sepse asnjëri prej rasteve, të personaliteteve të nderuara, nuk përmban historinë e gjatë që rrezaton presidenti Moisiu.”
Spiropali u shpreh krenare që Shqipëria ka pjesë të historisë z. Moisiu, antifashistin, partizanin, inxhinierin, funksionarin publik me cilësi të rralla, presidentin, prindin, njeriun fort të admiruar.
Kryetarja e Kuvendit, znj. Elisa Spiropali përgëzoi universitetin, duke u shprehur se nuk mund të kishte ditë më të bukur dhe më frymëzuese për një nderim të tillë. “UET ka nderuar me këtë titull mjaft personalitete të njohura të vendit dhe të vendeve të tjera. Është kthyer në një qendër graviteti jo vetëm për akademikët, por edhe për njerëzit e shquar të vendit. Në asnjë rast ky titull nuk ka pasur këtë domethënie që ka sot sepse asnjëri prej rasteve të personaliteteve të nderuara nga universiteti juaj nuk përmban historinë e gjatë që rrezaton presidenti Moisiu.”
Znj. Spiropali u shpreh krenare që Shqipëria ka pjesë të historisë z. Moisiu, antifashistin, partizanin, inxhinierin, funksionarin publik me cilësi të rralla, presidentin, prindin, njeriun fort të admiruar.
Presidenti i Kosovës në vitin 2011, ish-ministër i Punëve të Jashtme dhe Diasporës, njëkohësisht personaliteti i parë i nderuar me titullin “Doctor Honoris Causa”, z. Behgjet Pacolli e cilësoi më se të merituar nderimin për presidentin Moisiu, si një figurë që i ka shërbyer vendit me përulësi, urtësi dhe vizion.
“Nën drejtimin e tij u hodhën themelet e një kulture të re politike, më të urtë, më përfshirëse, më të baraspeshuar dhe më të përkushtuar. Përkushtimi i presidentit Moisiu ndaj paqes, integrimit euroatlantik, respektit ndaj të tjerëve, ka qenë frymëzues për mua, për të rinjtë dhe për çdokënd që ka dashur vendin dhe kombin.”
Pacolli kujtoi momentet e njohjes me Moisiun, si i vetmi figurë e politikës që i kërkoi takim dhe e përgëzoi pas një misioni për lirimin e disa pengjeve në Afganistan.
“Doctor Honoris Causa” i 19-të i UET
Ish- presidenti Alfred Moisiu bëhet personaliteti i nëntëmbëdhjetë mes panteonit të figurave që UET ka nderuar me titullin “Doctor Honoris Causa” në 20 vite të veprimtarisë së tij. Akordimi për Moisiun u rekomandua nga dy pedagogët e nderuar të këtij universiteti, prof. dr. Ferit Duka dhe prof. dr. Kristaq Xharo.
Gjatë ceremonisë, historiani dhe akademiku, Ferit Duka, tha se vizioni, urtësia, respektimi i Kushtetutës, përkushtimi shembullor ndaj normave, përparimit dhe modernizimit të Shqipërisë, përmirësimit të imazhit dhe pozitës së vendit në arenën ndërkombëtare e bëjnë z. Moisiu një shtetar të nderuar e të respektuar, jo vetëm në sytë e qytetarëve por edhe të homologëve të tij jashtë vendit.
“Integrimi i Shqipërisë në NATO dhe në BE mbeten gjithnjë në fokus të veprmitarisë politike dhe shtetërore të z. Alfred Moisiu. Në cilësinë e kryetarit të shtetit shqiptar, Moisiu punoi papushim për të forcuar unitetin kombëtar të shqiptarëve, lidhjet dhe bashkëpunimin midis Shqipërisë, Kosovës, shqiptarëve në Maqedoni, Mal të Zi, Preshevë, Bujanoc e diasporë, duke mbetur gjithnjë një zë i fuqishëm në mbrojtje të të drejtave politike dhe kulturore të bashkëkombësve të tij në këto hapësira.”
Prof. dr. Kristaq Xharo e cilësoi një burrështes dhe model që i mungon vendit, i cili u angazhua që në moshë të re në radhët e Luftës Antifashiste Nacionalçlirimtare, një akt që do të shënjonte vazhdimësinë e përkushtimit të tij të përhershëm në shërbim të vendit.
“Është interesante të theksohet se në këtë datë, 9 maj, që simbolizon fitoren e popujve mbi fashizmin, Gjeneral Moisiu është një nga të paktët që është nderuar me dekoratën më të lartë si pjesëmarrës i forcave aleate, të cilët u angazhuan drejtpërdrejt në Luftën e Dytë Botërore.”
Duke falënderuar Senatin Akademik të UET dhe Ministrinë e Arsimit për pranimin e këtij titulli, rektorja e UET, prof. dr. Drita Kruja lexoi motivacionin e vlerësimit të z. Moisiu me titullin “Doctor Honoris Causa “për rolin e tij të pazëvendësueshëm si faktor uniteti kombëtar, për lidershipin e urtë e të paanshëm në kohë krizash, si dhe për vizionin në ndërtimin e institucioneve demokratike, forcimin e lidhjeve ndërkombëtare, përkushtimin ndaj paqes, stabilitetit dhe reformave që integruan Shqipërinë në arenën ndërkombëtare.”
Ish-presidenti Moisiu: Vlerësim për mua dhe brezin që përfaqësoj
Një moment të veçantë dhe të paharrueshëm e quajti ish-presidenti këtë nderim të çmuar për atë personalisht, por edhe si përfaqësues i një brezi sfidash të mëdha që ka pasur vendi.
“Ky titull që më jepet sot është edhe një mesazh për shoqërinë shqiptare, që përulësia, integriteti dhe përkushtimi nuk janë vlera të harruara. Ato mbeten themeli mbi të cilin ndërtohet dinjiteti i kombit dhe qëndrueshmëria e një shteti.”
Moisiu tha se, pas përfundimit të detyrës, ka shkruar tre libra, jo për të treguar punën e tij, por për të dhënë këshillat e tij për brezat pasardhës, si një pasuri dhe obligim për të rinjtë dhe qytetarët.
Duke iu drejtuar të pranishmëve dhe të rinjve, Mosiu theksoi se sot më tepër se kurrë ka nevojë për mendje të ndritura dhe punë të ndershme për ta çuar vendin përpara, duke këshilluar mos heqjen dorë nga të kërkuarit dije.
“Dija është dritë, por pa dëshirën e punës ajo mbetet e vdekur. Duhet të theksoj se nuk ka gjë më të çmuar se t’i shërbesh vendit me përkushtim, ndershmëri, dinjitet. Kujtoj këtu një fjalë të Balzakut të madh që ka thënë: “Në rast se nuk vlerësojmë dhe nderojmë punën paraardhësve tanë, do të jemi shkatërrimtarë të vendit tonë”. Ky vlerësim që m’u bë mua tregon se puna duhet vlerësuar, studiuar dhe duhet marrë atë çka është më e mira.”
