UET HR Club/ Sfidat dhe kapacitetet e reja në sistemin e drejtësisë dhe administratës publike

Fakulteti i Shkencave Juridike, Politike dhe Marrëdhënieve Ndërkombëtare në UET zhvilloi forumin e burimeve njerëzore “për kapacitetet e reja në sistemin e drejtësisë dhe administratës publike shqiptare” me pjesmarrjen e përfaqësuesve dhe drejtuesve të bizneseve e institucioneve të ndryshme në Shqipëri

Në mbyllje të forumit UET HR Club, Fakulteti i Shkencave Juridike, Politike dhe Marrëdhënieve Ndërkombëtare zhvilloi një takim me drejtues të Burimeve Njerëzore të disa prej korporatave më të mëdha në vend dhe institucioneve publike, ku u diskutuan sfidat e reja të sistemit gjyqësor dhe administratës publike.

Takimi u fokusua në rëndësinë e rolit të universitetit, si lidhës mes institucioneve ose organizatave dhe studentëve për mundësitë e trajnimeve, internshipeve e praktikave dhe punësimit.

Qëllimi i takimit ishte kuptimi i lidhjes midis tregut të punës dhe profileve që universiteti ofron.

Dekania e Fakultetit të Shkencave Juridike, Politike dhe Marrëdhënieve Ndërkombëtare, Juelda Lamçe theksoi rëndësinë e Reformës në Drejtësi si një nga shtyllat për integrimin në Bashkimin Europian, por nga ana tjetër edhe zhvillimin e kurikulave për qasjen sa më afër të tregut të punës.

“Në mënyrë të veçantë Fakulteti i Shkencave Juridike Politike dhe Marrëdhënieve Ndërkombëtare ka në fokus Reformën në Drejtësi si një nga shtyllat dhe një nga kushtet për aderimin në Bashkimin Europian. Po aq i rëndësishëm është edhe bashëpunimi me organizatat ndërkombëtare, duke pasur parasysh impaktin që UET dëshiron dhe synon të nxisë në strategjinë e zhvillimit të tij. Zhvillimi i kurikulave me qasjen sa më afër tregut të punës, po ashtu përbën një nga faktorët dhe standardet e cilësisë, të cilat prej vitesh UET i garanton gjithnjë dhe më mirë”, u shpreh dekania Lamçe.

Pjesë e kurikulave mësimore të arsimit të lartë është edhe zhvillimi i praktikave, sidomos në degë të tilla që këtë pjesë e kanë të domosdoshme për aftësimin e studentëve në tregun e punës.

Në forum u theksua nevoja e intershipeve, si një mundësi e mirë për të dyja palët, për studentët që të prekin më nga afër mjediset e punës, por edhe institucioneve, që gjatë këtyre intershipeve mund të zbulojnë punonjës potencialë.

Shefi i Departamentit të Ligjit dhe të Drejtave të Njeriut të OSBE, Claudio Pal e konsideroi një iniciativë të rëndësishme forumin e mbajtur nga UET dhe si një mundësi shumë të mirë për studentët që shumë shpejt do t’i drejtohen tregut të punës.

“Mund t’ju them se për ne është shumë i rëndësishëm bashkëpunimi me universitetin. Të suportojmë në përgatitjen e mirë të studentëve. Ne mund t’i nxisim studentët tuaj që të na ndihmojnë në aktivitete dhe projekte specifike. Unë jam duke prezantuar departamentin e ligjit dhe të burimeve njerëzore. Në eksperiencën time ajo çfarë kemi nevojë janë studentë të cilët kanë një metodologji, që janë të aftë të mendojnë në mënyrë logjike, që shkruajnë dhe flasin mirë dhe që mund të bëjnë kërkime. Ajo që ve re është se shpesh mungon metodologjia e kërkimit. Intershpi është shumë i rëndësishëm, prandaj dhe do të ishte mirë që studentët të aplikonin për to, pasi do të ishte një praktikë, ndryshe nga universiteti”, tha përfaqësuesi i OSBE-së.

Zv/Rektorja për Procesin Mësimor dhe Kërkimin Shkencor, Drita Kruja u shpreh se bashkëpunmi me bizneset ka qenë prej vitesh në vëmendje të Universitetit Europian të Tiranës, dhe për këtë arsye ka lançuar projektin 500+, që konsiston pikërisht në krijmin e ndërlidhjes me kompanitë publike dhe jo publike më të mëdha në Shqipëri.

UET ka aktualisht pesë fakultete, duke mbuluar pothuajse të gjitha fushat profesionale.

Po ashtu, ofrohen të treja programet e studimit dhe kjo sipas zv/rektores Kruja iu vjen ne ndihmë punonjësve të bizneseve për të rritur kualifikimin e tyre, duke ndjekur një program master apo doktoraturë, ose duke u bërë pjesë e trajnimeve të ndryshme që zhvillohen.

“Një mundësi e mirë bashkëpunimi për ne janë edhe shërbimet e konsulencës që UET mund të ofrojë për secilën nga kompanitë. Ne mund të ndihmojmë shumë mirë për planet e biznesit, për kërkimet e tregut, shërbime juridike, konsulencë financiare e kështu me radhë”, u shpreh Kruja.

I pranishëm në takim nuk ishte vetëm përfaqësuesi nga OSBE-ja, por gjithashtu edhe shumë përfaqsues të tjerë si nga; Ministria e Drejtësisë, Bashkia Tiranë, Avokati i Popullit, Deloitte, Rubicon, A.L.T.R.I dhe Keller Williams Albania.