Studentet e UET sjellin website-in që ua bën më të lehta blerjet online

Sa kohë iu është dashur të gjeni online një produkt që ju duhet? Lodhje e pafundme. Me siguri keni hyrë në website-t e dyqaneve apo kompanive më të mëdha në Shqipëri dhe keni kontrolluar secilën prej tyre. Ose keni shkuar në rrjetet sociale në feed-et dhe story-t e këtyre bizneseve. Keni mbajtur mend, e nëse e dini që kujtesa u tradhton, keni mbajtur shënim parametrat, karakteristikat, çmimin e këtij produkti të ofruar nga secili biznes.

Edhe pse në fund keni vendosur për ta blerë diku, me siguri iu ka brejtur meraku nëse e morët me çmimin më të mirë. A përputhej cilësia me parametrat? A mos ndoshta diku ka qenë më e lirë dhe ju nuk e dinit këtë fakt?
Pikërisht për të shmangur këtë proces, që ndoshta përfundon kur u vjen produkti në derë, por mund të zgjasë edhe disa javë të tjera, ka një gjetje interesante që na e sjellin vetëm programuesit e mirë. Dhe në Universitetin Europian të Tiranës studentët e talentuar, të përkushtuar dhe me ide novatorë nuk mungojnë.

Elfat Mema është një prej tyre, i cili spikat në çdo aktivitet të zhvilluar nga Fakulteti i Inxhinierisë, Informatikës dhe Arkitekturës. Ai është student në vit të tretë bachelor në programin Inxhinieri Informatike. Gjatë viteve të studimeve ka bërë pjesë të portofolit të punimeve shumë website dhe aplikacione të reja, por njërin prej tyre zgjodhi ta prezantojë me kolegun e tij Ensild Hallanjaku në klubin e inovacionit “Steve Jobs”, i cili mentorohet nga pedagogia Anxhela Ferhataj.

Web-i quhet Skrapo-Scraping dhe shërben për të krahasuar çmimet e produkteve, kryesisht atyre elektronike. Ata kanë marrë referencë website-t e kompanive më të mëdha të fushës, të tilla si: Neptun, Shpresa, German Computer, Globe, Gjirafa, Gotech etj., dhe nëpërmjet mekanizmit të ndërtuar ju mund të gjeni me një klik produktin që doni, me çmimin dhe parametrat më të leverdishme. Funksioni i programit është pikërisht grumbullimi produkteve nga secili dyqan dhe pastaj t’i renditë të gjitha sipas çmimit (nga më i ulëti te më i larti), vitit të prodhimit apo kritereve të tjera. Jo pa qëllim Elfati e ka quajtur “the webtool you never know how much you needed until now”, për faktin e thjeshtë se bën më të lehtë dhe pa stres procesin e blerjes.

Studentët shpjeguan për kolegët e tjerë të klubit të inovacionit se website është i përdorshëm si në kompjuter ashtu edhe telefon, iOS apo android. Më tej ata u ndalën te gjithë procesi i brendshëm i ndërtimit, gjuhët e programimit, anën funksionale etj.

“Nuk di si t’iu shumëfishoj juve që të kemi çdo vite studentë si ju. Më vjen keq që jeni në mbyllje të studimeve e mund të na largoheni”, u shpreh dekania e Fakultetit të Informatikës, Inxhinierisë dhe Arkitekturës, prof. asoc. dr. Teuta Xhindi. “E kam kërkesë ndaj vetes, nëse po bëjmë atë që ju e keni më të domosdoshme dhe në këtë aspekt mund të jemi deficitarë.”

Ky nuk është aplikacioni i parë që kanë sjellë studentët në UET. Më herët ata kanë ndërtuar dhe prezantuar tre website në kuadër të një projekti, që kishin si qëllim të identifikonin dhe analizonin narrativën për integrimin europian të përdorur nga tre media kombëtare në vend: Top Channel, RTSH dhe TVKlan. Po ashtu, studentët e këtij fakulteti janë bërë pjesë e kompeticioneve jashtë UET e hackathon-ve duke u renditur në vendet e para.