Studentët e IT dhe Inxhinierisë Informatike në UET trajnohen nga AKSK-ja për menaxhimin e një sulmi kibernetik
Studentët e Universitetit Europian të Tiranës u bënë pjesë e trajnimit “Cyberdrill UET” organizuar nga Autoriteti Kombëtar për Sigurinë Kibernetike, në kuadër të marrëveshjes së bashkëpunimit mes dy institucioneve. Gjatë këtij aktiviteti, studentët e IT dhe Inxhinierisë Informatike mësuan si të identifikojnë dhe menaxhojnë një incident kibernetik.
“Duhen 20 vjet për të krijuar një reputacion dhe disa minuta incidente kibernetike për ta shkatërruar atë.” Thënia e zv/presidentit të Shefit Global të Sigurisë së Informacionit në Group SEB, Stéphane Nappo, tregon dëmin e madh që i vjen një organizate, kompanie por edhe çdo përdoruesi të internetit nga sulmet kibernetike. Ky rrezik i ardhur nga bota online lind domosdoshmërinë e përgatitjes së studentëve dhe profesionistëve që do të jenë në linjën e parë të mbrojtjes.
Për këtë arsye, Universiteti Europian i Tiranës, në bashkëpunim me Autoritetin Kombëtar për Sigurinë Kibernetike (AKSK) zhvilluan trajnimin “Cyber Drill Exercise” për studentët e vit të tretë në programet e Inxhinierisë Informatike dhe Teknologjisë së Informacioni. Përgjegjësja e Departamentit të Teknologjisë dhe Informatikës, dr. Ardian Topi thotë se ky trajnim vjen në kuadër të bashkëpunimit që universiteti ka me AKSK-në, organin rregullator dhe institucion përgjegjës për mbikëqyrjen dhe zbatimin e legjislacionit për sigurinë kibernetike në Shqipëri.
“Ne kemi lidhur marrëveshje bashkëpunimi dhe ky nuk do të jetë aktiviteti i vetëm. Madje edhe para dy ditësh ne kishim një trajnim online për Cyber Hygiene.”
Profesoresha e UET thotë se në vijimësi do të organizohet një trajnim për stafin akademik, për të përditësuar kurrikulat dhe silabuset me më të rejat në fushën e sigurisë kibernetike dhe për të reflektuar sfidat që lindin nga sulmet kibernetike.
Eksperti i Autoritetit Kombëtar për Sigurinë Kibernetike, Ilir Daka tregon se trajnimi për studentët konsiston në rritjen e kapacitetit dhe aftësimin e tyre përmes stimulimit të incidenteve kibernetike.
“Ka ndodhur një incident kibernetik dhe kemi artefakte të mbledhura nga ky incident. Ne duhet të zgjidhim situata të ndryshme, të tilla si: Kur është pika e parë e hyrjes në incident; çfarë efekti ka pasur file; kush ka qenë file i parë që ka ndodhur incidenti etj. E gjithë ideja është gjetja e rrugës së zgjidhjes dhe në bazë të platformës që ne kemi, studentët në çdo zgjidhje që bëjnë gjejnë një frazë të caktuar gjatë efekteve dhe japin përgjigjet e sakta në platformë”, sqaroi Daka.
Sipas ekspertit, gjatë këtij aktiviteti disa orësh studentët do të përfitojnë profesionalisht një eksperiencë të dorës së parë në incidentet kibernetike, duke u përballur me një problem real dhe më tej duke gjetur një zgjidhje, përmes njohjes së gjithë procesit të incidentit.
“Ata duhet të gjejnë se nga erdhi ai file; kush e ka hedhur; mënyra se si është shkarkuar; kush ishte personi i parë që e shkarkoi dhe mënyra se si e shkarkoi.”
Po përtej pjesës së zhvillimit të profesionit, ky trajnim është edhe një mënyrë për të identifikuar studentët e pasionuar pas kibernetikës dhe që kanë potencial për t’u zhvilluar më tej në këtë fushë.
“Kushdo që ka prirje të tilla ne kemi filluar t’i mbledhim në formën e një students club, që t’i kemi në vazhdimësi për trajnime më të avancuara: Ne bashkëpunojmë me struktura kritike dhe japim konsulenca për rekrutimin e stafeve. Kështu që, kur ata të kërkojnë rekomandime, ne tashmë kemi një database të atyre që janë potencial”, sqaron më tej Daka.
Trajnimet e ASKS-së janë shtrirë edhe në institucione të tjera arsimore, në shkolla të mesme profesionale, kolegje apo universitete. Sipas ekspertit, 2024 është viti i parë që implementohet ky projekt, me synimin për ta bërë një aktivitet të përvitshëm në të gjitha institucionet arsimore të mesme dhe larta, për të aftësuar studentët në fushën e sigurisë kibernetike dhe për të nxjerrë çdo vit një database të studentëve që mund të jenë potencial në tregun e punës dhe në fushën e cyber.
