Shoqata Shqiptare e Bankave dhe Credins Bank sjellin Javën e Parasë në UET, Klientët më të prirur drejt shërbimeve online
U zhvillua sot në UET një leksion i hapur nga Znj. Adja Angjeli, Zv. Drejtore Biznesi në Credins Bank me temë: “Rinia dhe Bankingu Digjital”. Ky event ishte pjesë e organizimeve nga Shoqata Shqiptare e Bankave, AAB, në kuadër të Javës së Parasë 2022.
Leksioni u zhvillua me studentët e Departamentit të Ekonomiksit dhe Financës, me synim ndërgjegjësimin e brezit të ri për të qenë qytetarë të ardhshëm të përgjegjshëm dhe të aftë financiarisht. Kjo javë është një nismë ndërkombëtare e Organizatës për Bashkëpunim dhe Zhvillim Ekonomik (OECD), ku partnerë të shumtë në mbarë globin organizojnë aktivitete të larmishme, për t’i përfshirë financiarisht të rinjtë, duke u mësuar si të kujdesen për paratë, si të kursejnë, si t’i kuptojnë ndryshimet në sistemet ekonomike ku jetojnë, si të fitojnë të ardhura nëpërmjet sipërmarrjes dhe të vendosin bazat për të ardhmen e tyre.
Shoqata Shqiptare e Bankave përzgjodhi temën e Bankingut Digjital te të rinjtë, duke marrë parasysh ndryshimin në mënyrë rrënjësore të bankingut, si pasojë e pandemisë globale që ndodhi, ku mision të kësaj jave kanë promovimin e rëndësisë së kulturës financiare për publikun e gjerë dhe në veçanti për brezat e rinj.
Prof. Asoc. Dr. Elvin Meka, Dekan i Fakultetit të Ekonomisë, Biznesit dhe Zhvillimit përmendi për studentët sfidat e reja të punësimit në fushën e bankingut dhe ekonomi, duke theksuar nevojën e specialistit interdisiplinar, që ka ardhur si rrjedhojë e zhvillimeve të shpejta teknologjike në fushën e bankingut. “Po kërkohen gjithmonë e më shumë modele apo një profesion, i cili ka dije dhe njohuri të zgjeruara në fusha të ndryshme nisur nga revolucioni që po ndodh dhe në kuadër të sfidave të reja”, shtoi ndër të tjera Prof.Meka.
Znj. Adja Angjeli, Zv. Drejtore Biznesi në Credins Bank, partner i UET, e filloi prezantimin e saj mbi konceptet dhe aspektet inovatore apo produktet digjitale të lancuara nga Credins Bank, si: Online Banking, Kartat dhe Point of Service (POS). Ajo vazhdoi duke përmendur përfitimet që sjell banking digjital në lehtësimin e mënyrës së jetesës, si: shkurtimi kohës, lehtësira gjeografike, thjeshtëzimi i pagesave për blerje të ndryshme etj. Znj. Angjeli gjithashtu përmendi faktin se tashmë 30% e volumeve totale të shërbimeve që kryheshin fizikisht në degët e Bankës Credins kryhen nëpërmjet aplikacionit online. Kjo risi (që prej tri vitesh) “përqafohet” më shumë nga mosha e rej, mesatarisht 18-38 vjeç, si rrjedhim i njohjes më të madhe të faciliteteve teknologjike.
Java e Parasë është një event shumë I rëndësishëm dhe edukativ për të rinjtë kudo në botë, pasi ata mësojnë si të kursejnë, si t’i kuptojnë ndryshimet në sistemet ekonomike ku jetojnë, vlerën e të aradhurave dhe si t’I fitojnë ato në mënyrën e sipërmarrjes (por jo vetëm), të vendosin bazat për të ardhmen e tyre nëpërmjet kulturës financiare e kursimit etj.
