Ekspertët dhe Pedagogët e UET kontribojnë me artikujt e tyre në Jus&Justicia 15 për rindërtimin e reformës së pushtetit lokal

Fakulteti i Shkencave Juridike, Politike dhe Marrëdhënieve Ndërkombëtare në Universitetin Europian të Tiranës organizoi promovimin e Revistës Shkencore Jus & Justicia 15. Tematika e këtij numri që risillet pas dy vitesh mungesë, ishte “Overview of the Decentralization process in Albania Comparative Approach in the Western Balkans”. Kjo tematikë u përzgjodh prej domosdoshmërisë për ndryshimin ose vendosjen e një reforme të re të pushtetit lokal ose reformës administrative territoriale si një ndër çështjet më të përfolura politike aktuale.

Numri i parë i revistës ndërdisiplinore Jus&Justicia u botua në vitin 2008 dhe për 12 vite u botuan në gjuhën shqipe kërkime shkencore dedikuar për promovimin e shkëmbimit të veprave dhe ideve origjinale midis akademikëve, duke përfshirë kërkimin teorik dhe empirik, në disiplinat e ligjit, politikës dhe marrëdhënieve ndërkombëtare.
Që prej vitit 2020 artikujt botohen vetëm në gjuhën angleze me qëllim mbulimin e cështjeve ligjore dhe politike me një theks të veçantë në Ballkanin Perëndimor dhe Shqipërinë.

Misioni i Revistës Shkencore të Fakultetit të Shkencave Juridike, Politike dhe Marrëdhënieve Ndërkombëtare është promovimi i botimeve e punimeve kërkimore, raporteve dhe rishikimeve të librave me cilësi të lartë, të rishikuara nga kolegët, duke shërbyer si një forum akademik tërheqës për përhapjen e njohurive dhe avancimin e debatit akademik në Shqipëri dhe jashtë saj. Ai do të jetë me interes dhe do të shërbejë për juristët, studiuesit juridikë, praktikuesit ligjorë, zyrtarët e qeverisë, organizatat vendore dhe ndërkombëtare, shoqërinë civile etj.

Në shpjegimin e përzgjedhjes së tematikës Prof. Asoc. Dr. Ervis Iljazaj, Përgjegjës i Departamentit të Shkencave të Aplikuara në UET shprehu se “çdokush prej autorëve të artikujve dhe universiteti në tërësi dha kontributin e tij në këtë temë të rëndësishme. Çfarë e bën interesante këtë revistë është se ka dy këndvështrime: këndvështrimin juridik të pushtetit lokal dhe këndvështrimin politik të pushtetit lokal. Ndërthurja e e këtyre dy elementëve mendoj që e bën një kontribut shumë të rëndësishëm për këtë çështje me interes të madh publik” duke treguar kështu edhe rëndësinë e përfshirjes së ekspertëve të fushës në ndërtimin e projekt-ligjeve apo reformave në të ardhmen.

Dekania e Fakultetit të Shkencave Juridike, Politike dhe Marrëdhënieve Ndërkombëtare në Universitetin Europian të Tiranës, Prof. Asoc. Dr. Juelda Lamçe, theksoi rëndësinë që kërkimi shkencor ka në UET duke synuar përfshirjen e artikujve të botuar në këtë revistë edhe nga staf akademik i huaj “kjo përfshirje do të ndikonte pozitivisht në kuadër të ndërkombëtarizimit sipas prioriteteve strategjike të UET, të rritjes së cilësisë dhe standarteve të kërkimit shkencor”. Jus&Justicia inkurajon studiuesit e rinj dhe kandidatët për doktoraturë në fazën e vonshme që të paraqesin artikuj për botim.

Prof. Dr. Drita Kruja theksoi rëndësinë që kjo revistë jep në sferën politike, por jo vetëm, duke dhënë kontribut në politikë-bërje. Zv. Rektorja e procesit akademik dhe kërkimit shkencor gjithashtu përmendi risinë që UET ka sjellë për revistat e tij shkencore siç është website i këtyre revistave me të gjithë numrat, artikujt dhe një bord editorial mjaft prestigjoz me emra të njohur vendas dhe të huaj.

Revista Shkencore Jus & Justicia fokusohet në ashpërsinë akademike dhe hapjen ndaj drejtimeve të ndryshme metodologjike dhe teorike. Editoriali zbaton politikën e rishikimit të shpejtë të artikujve të paraqitur dhe më pas i përfshin në numrat e ardhshëm, nëse kalojnë procesin e vlerësimit. Revista botohet në të dy formatet e shtypura dhe online. Tematikat e kësaj reviste përfshijnë: E Drejta e BE-së, E Drejta Ndërkombëtare, E drejta Kushtetuese, E Drejta Administrative, E Drejta Penale, E Drejta e Kontratave, E drejta e Pronësisë, E Drejta Familjare, E Drejta e Pronësisë Intelektuale, Historia Juridike, Teoria Juridike, Teoria Politike, Filozofia Politike, Ekonomia Politike, Politika Krahasuese, Marrëdhëniet Ndërkombëtare etj.