Promovohet revista shkencore “Polis” 23/1: Impakti i imazhit në komunikimin politik, edukim dhe psikologji

Fakulteti i Shkencave Humane, Edukimit dhe Arteve Liberale promovoi numrin e 23-të të revistës shkencore “Polis”, e cila në këtë sesion të parë vjen nën tematikën “The Politics of Image: From Classroom to Campaign and Psychology”. Pedagogë dhe studentë nga UET dhe universitete partenere, eksplorojnë kryesisht tematika e subjekte ndërdisiplinare, me në qendër imazhin dhe ndikimin që ai ka.

“Vitet e fundit imazhi ka marrë një rëndësi të shtuar kudo në hapësirën publike, por ka filluar të marrë vendin e vet edhe në hapësirën shkencore.” Sipas dekandes së Fakultetit të Shkencave Humane, Edukimit dhe Arteve Liberale, prof. asoc. dr. Belina Budini i takon pikërisht këtij fakulteti që ka në përbërje departmentin e Komunikimit dhe atë të Arteve Pamore për ta vendosur imazhin nën objektiv dhe për të analizuar impaktin e tij. Edhe pse si instrument metodologjik imazhi është neglizhuar për një kohë të gjatë, ekspansioni dhe ekspozimi ndaj tij ka lindur domosdoshmërinë e të parit nën lupën e shkencës.

Kjo realizohet në numrin 23/1 të revistës “Polis” nga pedagogë dhe studentë të UET por edhe universitetet partnere, të cilët thellohen kryesisht në tre fusha studimi: Edukim, Komunikim dhe Psikologji. Imazhi si një mjet metodologjik evoluon nga mjediset arsimore në strategjitë e fushatës, duke eksploruar gjithashtu tiparet psikologjike që qëndrojnë në themel të ndërveprimeve njerëzore.

“Në departamenin tonë të Shkencave Humane dhe Komunikimit shumë prej temave që janë prezantuar në nivelin master dhe bachelor janë të fokusuar drejt problematikave që janë të lidhura me imazhin. Ka shumë për të studiuar, nuk është e thejshtë. Edhe pse imazhet janë të shpërndara kudo nuk është e thjeshtë që t’i shndërrosh në element studimor”, u shpreh prof. Budini gjatë promovimit të revistës, duke falenderuar gjithë kontribuesit shkencorë e organizativë që kanë bërë të mundur këtë botim.

Duke u ndalur te rrugëtimi i revistës “Polis”, dekania tha se ajo është e indeksuar në shumë baza të dhënash ndërkombëtare dhe së fundi është nënshkruar kontrata me EBSCO-n, një nga databset më të rëndësishme shkencore. Sfida e ardhshme mbetet Scopus.

“Revista është e pajisur me DOI, shenjë identifikuese e cilësisë. Ne nuk kemi ende një revistë në Scopus që është ajo kategoria tjetër e rëndësishme te e cila synojmë. Është një ambicie që duhet t’i qasemi herët a vonë dhe me “Polis” na takon, që ta nxisim këtë perspektivë.”

“Nëse ka pasur një imazh të bukur dhe vazhdon ta ketë është UET, pasi di të promovojë shkencën, di të hapë debate, të jetë në pararojë të çdo ideje, kërkimi, perspektive, qasje”, u shpreh dr. Valbona Nathanaili në nisje të prezantimit të studimit të saj me temë “Reformat dhe legjislacioni në fushën e arsimit në Shqipëri, tetor 1921-shkurt 1924”.

Duke u ndalur te përzgjedhja e kësaj periudhe studimi, ajo tha se iu takon pikërisht pedagogëve e studiuesëve të hedhin dritë e të heqin perden e historisë për të zbuluar shumë aspekte të panjohura të asaj kohe të anatemuar nga komunizmi. Nathanaili merr në shqyrtim dokumentet, qarkoret, ligjet, vendimet e komunikimet e Ministrisë së Arsimit me institucionet e kohës e drejtoritë vendore, duke zbuluar kështu shumë dimensione historike, kulturore dhe edukative të viteve 1921-1924.

“Kjo periudhë ka lidhje me imazhin e ministrave që kanë qenë atëherë. Në Ministrinë e Arsimit figura janë disa nga pedagogët më të shquar që mendoj se kanë punuar në Shqiipëri”, theksoi profesorja, duke përmendur emra të tillë si: Hilë Mosi, Rexhep Mitrovica, Kristi Dako dhe Aleksandër Xhuvani. “Mund ta studiojmë historinë, problemet dhe të krijojmë një imazh të kohës, duke njohur historinë e arsimit”, nënvizoi më tej.

“Praktika mësimore dhe mentorimi i studentëve” ishte punimi i radhës i prezantuar nga dr. Zenel Sina dhe i realizuar në bashkëpunim me prof. asoc. dr.Tomi Treska dhe dr.Lindita Ivziku. Artikulli thellohet në praktikën dhe paradigmat teorike në formimin profesional të mësuesve si mentorë dhe rolet e tyre në klasë. Autorët kryejnë gjysmë intervista me mentorë, menaxherë, mbikëqyrës mentorues dhe lektorë të arsimit për të vlerësuar situatën. “Ky artikull është munduar që në mënyrë cilësore të ballafaqojë, dokumentacionet, eksperiencat, edhe ato ndërkombëtare, që lidhen me profesionin e mësuesit”, u shpreh Sina.

Në një mjedis të bollshëm mediatik, ardhja e mediave sociale ka revolucionarizuar peizazhin e imazheve politike, duke paraqitur mundësi të jashtëzakonshme por edhe sfida të rëndësishme. Duke marrë nën shqyrtim mbi 1 mijë artikuj në mediat e reja, Albjon Lushi, i sapo diplomuar në master nën udhëheqjen e prof. Budinit, prezantoi punimin “Imazhi ndërkombëtar i Shqipërisë në mediat e reja: Një analizë gjithëpërfshirëse e paraqitjeve vizuale dhe tekstuale”. Mbështetur te elementët që krijojnë imazhin, kultura, politikat e brendshme dhe të jashtme, ekonomia, gjuha, popullsia, regimi i qeverisë, ai vërteton tezën e ngritur se imazhi i Shqipërisë ka ndyshuar në mediat ndërkombëtare.

Në të njëjtën linjë të analizës së rëndësisë së imazhit në komunikimin politik vijojnë edhe disa punime të tjera të studentëve. MSc. Orgesa Doka dhe dr.Klementin Mile analizojnë strategjitë e imazhit të Edi Ramës në periudhën 2013-2023, ndërsa MSc. Era Jaupi dhe prof.asoc.dr. Belina Budini bëjnë një analizë të komunikimit dhe strategjisë së përdorur në mediat online gjatë fushatës zgjedhore 2021 në Shqipëri.

Në fushën e Psikologjisë, puna bashkëpunuese midis studentëve hulumtues dhe mbikëqyrësve të Departamentit të Psikologjisë sjell disa hulmutime të rëndësishme mbi problematikat që prekin grupmosha të ndryshme.

MSc. Sara Pjetrushaj dhe Prof. Asoc. Erika Melonashi analizojnë spiritualitetin postmodern dhe çrregullimin obsesiv-kompulsiv duke ekspoloruar marrëdhënien midis besimeve dhe simptomave.

“Ndikimi i stresit në zhvillimin e fëmijëve dhe ndërhyrjet në kujdesin shëndetësor për fëmijët me sëmundje kronike në Shqipëri”, është punimi tjetër nga dr. Brunilda Hoxhaj dhe Dora Karagjozi.

MSc. Gerti Metani, MSc. Dorjan Isufaj dhe Barjam Yzbashi sjellin një vëzhgim mbi shitjen e suplementeve ushqimore në palestrat shqiptare. Ata kanë zbuluar se shumica e palestrave promovojnë suplemente, kryesisht pluhura proteinash, kreatinë, vitamina dhe aminoacide dhe se fitimi financiar e kërkesa e klientëve ishin motivuesit kryesorë.

Për të gjithë studentët, kërkuesit e rinj por edhe për ata që janë duke kryer hulmutime në fushat e sjella në këtë numër numër, “Polis” do të jetë e disponueshme në versionin online, në web-in e Universitetit Europian të Tiranës.