Promovohet MEDICUS 8/2, prof. Nikollaq Kaçani: Duhet të ndryshojmë botëkuptimin për sëmundjet e pashërueshme
“Kujdesi shëndetësor dhe cilësia e jetës” ishte tematika e revistës “Medicus” 8/ issue 2, e cila u promovua për studentët dhe pedagogët në Univesitetin Europian të Tiranës. Përveç hulmutuesëve shqiptarë, ky numër sjell studiues të rinj nga universitetet në Turqi dhe Bullgari.
“Cilësia e jetës varet nga ambienti ku jetojmë, nga ato që dëgjojmë, nga ato që shikojmë apo bisedojmë”. Për profesorin e mjekësisë në Universitetin Europian të Tiranë, prof. dr. Nikollaq Kaçani sistemi nervor njerëzor dëmtohet më tepër nga pritshmëritë, komentet, apo vlerësimet që merr ai person, sesa nga puna. “Ato e shkatërrojnë dhe dëmtojnë rëndë”, shtoi ai më tej gjatë promovimit të revistës shkencore të Fakultetit të Shkencave Mjekësore Teknike “Medicus”. Numri 8/2 i këtij botimi trajton faktorët apo elementët e kujdesit shëndetësor që e bëjnë cilësinë tonë të jetesës më të mirë.
Përvoja mbi 50 vjeçare si kirurg dhe puna me rastet nga më të vështirat e më të komplikuarat, e ka bërë profesor Kaçanin të kuptojë dhe analizojë faktorët që ndikojnë në shërimin e një pacienti që i nënshtrohet një ndërhyrjeje kirurgjikale.
“Nuk duhet të biesh në batakun e sëmundjes”, tha profesori, duke theksuar se perceptimi që ka secili për sëmundjen ndikon edhe në cilësinë e jetës që ai bën dhe në ecurinë e gjithë procesit të shërimit. “Me të keqen duhet të përballesh. Po të dish të luftosh, po të dish të përshtatesh, arrin edhe të fitosh.”
Duke listuar faktorët psikologjikë, sociale, financiare, profesori tha se ka rëndësi mbështetja që ofrohet nga familja e shoqëria.
“Nuk mund të thuhet është i sëmurë me kancer dhe mbaroi. Bota e ka ndryshuar tashmë konceptin për sëmundjet e pashërueshme dhe të njëjtën gjë duhet të bëjë shoqëria jonë.”
Profesori përgëzoi më tej të gjithë pedagogët dhe stafit që ndihmojnë në botimin e revistës “Medicus”, e cila u vjen në ndihmë doktorantëve, kërkuesve të rinj për t’u rritur në karrierën akademike.
Dekania e Fakultetit të Shkencave Humane dhe Edukimit Liberale, prof. asoc. dr. Vlotisa Gjergji theksoi se listimi i “Medicus” në DOAJ ka rritur impaktin e kësaj reviste, duke u përzgjedhur për të botuar jo vetëm nga pedagogë të brendshëm të universitetit, por edhe nga universitetet partnere brenda dhe jashtë Shqipërisë.
“Ne përpiqemi të kemi studime jo vetëm nga pedagogët brenda UET, por ehde nga studiues të tjerë brenda dhe jashtë vendit, nga mjekë etj. Duam të kemi bashkëpunim me të gjitha universitetet partnere”, theksoi ajo.
Në këtë numër vijnë dy botime nga pedagogë të huaj. Punimi me temë “Ndikimi i praktikës klinike në qasjet e studentëve të infermierisë për rikuperimin e përmirësuar pas operacionit” vjen me bashkautorësi nga pedagogia shqiptare në Fakultetin e Shkencave Shëndetësore në Universitetin Uludag në Bursa Turqi, Msc. Jasmina Hoxha dhe pedagoges turke PhD Nursel Vatansever.
Shkrimi i dytë me temë “Roli i mprehtësisë vizuale në funksionimin ditor dhe cilësinë e jetës në pacientët me retinopati diabetike” vjen nga Universiteti Mjekësor i Varnës në Bullgari, një bashkëpunim mes pedagoges MD. PhD Eltisa Hristova dhe tre specializantëve: Lidiya Zaduryan, Gabriela Vasileva, Iliyana Petkova.
Punimet e tjera vijnë nga pedagogë dhe studentë të UET-it apo universiteteve të tjera në vend. Prof. asoc. dr. Lumturi Mërkuri, së bashku me studentin Eljo Paja bëjnë një rishikim të literaturës mbi shëndetin mendor të profesionistëve të shëndetit dhe burnout syndrom.
Po ashtu, pedagogu tjetër në UET, Phd(c). Kristi Çela në shkrimin e tij me temë “Mërzia dhe dhimbjet e mesit të studentëve”, gjeti se mërzia e studentëve gjatë orëve të mësimit manifestohet në qëndrime të ndryshuara të trupit dhe këto ndryshime posturale shoqërohen me një rrezik në rritje të zhvillimit të dhimbjes së mesit.
Artikulli “Çrregullimet endokrinologjike dhe Covid-19” me autore Rajmonda Tare, Dasantila Tahiraj dhe Artan Simaku bën një përmbledhje të sfidave me të cilat u përballën pacientët me çrregullime endokrinologjike, të cilët gjithashtu u infektuan me Covid-19.
Një studim praktik në klinikën kirurgjikale të QSUT-së “Nënë Tereza” nga MD. PhD. Zahide Sulejmani dhe prof. asoc. dr Lumturi Merkuri, i cili krahasoi në vite ngarkesën mikrobike në plagët e pacientëve postoperatorë, konkludoi një përmirësim të konsiderueshëm në rreziqet e infeksionit pas operacionit, ndoshta për shkak të kushteve shumë më të mira higjieno-sanitare dhe protokolleve të parandalimit të infeksionit.
