Promovohet INGENIOUS 4/2, Gjergj Simaku: Mos blini bukurinë e shtëpisë, blini komfortin

“Mos blini bukurinë e shtëpisë, blini komfortin!” Ishte kjo porosia e ekspertit eficencës së energjisë në sektorin e ndërtimit Gjergj Simaku nga auditori i Universitetit e Europian të Tiranës. I ftuar në promovimin e “Ingenious”, revistës shkencore të Fakultetit të Inxhinierisë, Informatikës dhe Arkitekturës, profesori dhe ish- zëvendësministri i Energjisë dhe Infrastrukturës tha se në Shqipëri flitet pak për eficencën e energjisë, duke theksuar se në historinë e ndërtimit është përdorur gjithmonë fjala e strehës dhe jo fjala e komfortit.

“Ti ble një ndërtesë të re për disa kushte, që kanë të bëjnë me lokacionin dhe facilitetetet por nuk merresh me kushtet. Ne shqiptarët blejmë vetëm shtëpi të bukura. Askujt nuk i ka shkuar në mendje se ai muri i jashtëm transmeton shumë nxehtësi. Po e them këtë në mënyrë kritike për t’iu ngulur faktin që mos blini bukurinë e shtëpisë”, theksoi Simaku.

Eksperti tha se Shqipëria ka dy ligje që kanë të bëjnë me eficencën e energjisë në industrinë e ndërtimit. Produkt i njërit ligj është Agjencia për Eficencën e Energjisë, ndërsa ligji i dytë sapo ka dalë për konsultim publik dhe ka të bëjë me performancën e energjisë në ndërtesa.

“Ligji parashikon matjen e koeficientit të nxehtësisë para ndërtimit të ndërtesës dhe të ndiqet rregullorja e llogaritjes së performancës nëse një ndërtesë është eficente ose jo. Ligjit shpjegon që para se të shesësh, japësh me qira një ndërtesë duhet të shpjegosh se sa ajo harxhon”, sqaroi profesori, duke e krahasuar me rastin e blerjes së një makine.

Nga ana tjetër, ai theksoi se ne ende nuk kemi ekspertë të përgatitur për të matur eficencën e energjisë, pasi arkitektët nuk mësojnë më fizikën e ndërtimit, prandaj ai sugjeroi që FIIA të rishohë mundësinë e futjes së kësaj kurrikule.

Eksperti i dytë i ftuar në promovim ishte Dionis Kruja, ekspert në fushën e teknologjisë BIM, e cila po transformon sektorin e ndërtimit, por që në Shqipëri është ende në hapat e parë.

“Në Bashkimin Europian janë disa ligje që e detyrojnë shtetin të ndërhyjë te mënyrën si ndërtojnë kompanitë, fjala bie ndërtesat që kalojnë 10 milionë euro duhet të përdorin këtë lloj teknologjie. Duke qenë një teknologji e re, Shqipëria është ende në hapat e parë.”

Dekania Xhindi shtoi se pedagogët e Fakultetit të Inxhinierisë dhe Arkitekturës, në kuadër të një projekti po trajnohen për teknologjinë BIM, teksa ftoi studentët që ta përqafojnë dhe të rrinë në kontakt me të reja e fundit.

Teknologjitë e reja dhe zhvillimi i qëndrueshëm në FIIA

Nga përdorimi i Inteligjencës Artificiale, i industrisë robotike, programeve të avancuara kompjuterike e deri te materialet efektive në ndërtim që ruajnë eficencën e energjisë.

Janë një sërë inovacionesh që po ndodhin në fushën e inxhinierisë, informatikës e arkitekturës me qëllimin e sjelljes së zhvillimit të qëndrueshëm por edhe për të mbrojtur mjedisin. Këto risi trajtohen në “Ingenious 4/2” nga pedagogët dhe studentët e Fakultetit të Inxhinierisë, Informatikës dhe Arkitekturës në UET.

“Ky numër ofron një eksplorim të pasur dhe të informuar nga të dhënat se si bashkimi i inxhinierisë, informatikës dhe arkitekturës kontribuon në zhvillimin e qëndrueshëm. Duke paraqitur aplikime praktike dhe kërkime empirike, revista synon të frymëzojë përparime të mëtejshme që mbështesin një të ardhme të avancuar teknologjikisht dhe të ndërgjegjshme për mjedisin”, shkruan në editorialin e saj kryeredaktorja e “Ingenious”, prof. Teuta Xhindi.

Në këtë botim vijnë jo vetëm punime të pedagogëve por edhe ato në bashkëpunim me studentët, gjë që dekania e FIIA e cilësoi një tipar dallues të revistës. Gjatë promovimit në UET, u prezantuan dy prej punimeve: MSc. Orges Beshku solli studimin me temë “Inovacionet e aplikuara në robotikën industriale: Rritja e gamave operacionale përmes modifikimeve strukturore dhe analiza e sistemit të k”, ndërsa MSc. Ing. Gazmir Hallaçi prezantoi punimin e kryer me Inxh Jona Liçi, me temë “Fasada e ventiluar dhe eficenca e energjisë”.

Në numrin e katërt, çështja dy të “Ingenious”, pedagogia Anxhela Fçanji, referuar qytetit të Korçës, merr në studim projketimet dhe zhvillimin e një sistemi informativ që promovon turizmin.

Një tjetër punim interesant me temë “Përdorimi i inteligjencës artificiale në ndërtimin e aplikacionit për njohjen e gjuhës së shenjave” vjen nga Ditmira Tahiri dhe prof. asoc. dr. Ardiana Topi.

Pedagogia dhe arkitektja Enkeleida Prifti djell punimin “Konvergjenca mes teknologjisë bashkëkohore dhe instalimeve artistike në arkitekturë”.

Një grup autorësh: Enxhi Tagani, Erion Curaj, Flavio Koka, Joana Shehaj ndalen te një problem mjaft shqetësues për organizatat dhe ruajtjen e të dhënave duke analizuar fenomenin phishing, por edhe rëndësinë e ndërgjegjësimit të kompanive për sigurinë kibernetike.

Punimi i fundit me temë “Zbatimi i të mësuarit të thellë në njohjen optike të karaktereve” ka autore Sildi Shahinin dhe Ardiana Topin.