FORUMET UET/ Ambasadori gjerman përballë studentëve për integrimin dhe zgjedhjet

Ambasadori i Gjermanisë në vendin tonë, z. Karl Bergner ishte këtë të mërkurë (2 prill) në auditorët e Universitetit Europian të Tiranës. I ftuar nga Fakulteti i Shkencave Juridike, Poitike dhe Marrëdhënieve Ndërkombëtare në Forumet UET, Bergner zhvilloi një bashkëbisedim me pedagogët dhe studentët për çështjet aktuale politike e më gjerë.

Nën moderimin e dekanit të këtij fakulteti, prof. asoc. dr. Ervis Iljazaj, ambasadori gjerman foli për ecurinë e Shqipërisë drejt Bashkimit Europian, rëndësinë dhe ndikimin e zgjedhjeve parlamentare të 11 majit, për situatën aktuale në Gjermani pas zgjedhjeve të fundit, si dhe për konjukturat e reja që po formësohen në botë pas zgjedhjeve presidenciale në SHBA dhe fitores së Donald Trump.

Me një karriere të gjatë diplomatike, si ambasador, zv. ambasador, pjesë e konsullatave dhe Ministrisë së Jashtme Federale, z. Bergner mori detyrën e përfaqësuesit të Gjermanisë në Shqipëri në gusht të 2023-it. Ai tha se Shqipëria është një vend i bukur, mikpritës dhe imazhi i saj në arenën ndërkombëtare ka ndryshuar. “Kështu që jam jashtëzakonisht i lumtur që jam këtu me gruan time.”

I pyetur për zgjedhjet e fundit në Gjermani, të fituara nga aleanca konservatore e Gjermanisë CDU/CSU me në krye Friedrich Merz, por të përfolura më së shumti për rritjen e partisë së ekstremit të djathtë, Alternativa për Gjermaninë (AfD), ambasadori tha se pavarësisht se kush drejton, do të punojë me çdo lloj qeverie dhe ministër të Jashtëm të zgjedhur në mënyrë demokratike. Duke iu referuar historikut të zgjedhjeve në këtë vend, z. Bergner tha se Gjermania prej gati 70 vitesh ka pasur qeveri koalicioni dhe vetëm një herë ajo ka qenë një partiake.
“Ne kemi pasur vetëm qeveri koalicioni, që do të thotë forma jonë e qeverisjes është shumë më e orientuar nga konsensusi dhe shumë më centriste se në shumë vende të tjera”, theksoi ambasadori.

Besimin e lartë që shqiptarët kanë pasur të ndërkombëtarët, ambasadori e lidhi me të kaluarën e vendit tonë dhe mungesën e besimit te sistemi politik në Shqipëri.
Sa i përket integrimit të Shqipërisë në BE, ai tha se teknikisht Shqipëria ka ecur me ritme shumë të mira, duke hapur dy grup-kapituj vitin e kaluar dhe dy grup-kapituj të tjerë në fillim të 2025-ës. I pyetur nëse zgjedhjet e 11 majit do të ndikojnë në ecurinë e këtij procesi, ambasadori deklaroi se pavarësisht se kush e krijon qeverinë pasardhëse, rëndësi ka që procesi të jetë transparent.

Prej vitesh, tregu i punës në Gjermani ka tërhequr shumë të rinj, të diplomuar në fushën e mjekësisë, inxhinierisë apo nga shkollat profesionale. I pyetur nëse kishte ndonjë këshillë për ata që duan të largohen, ambasadori tha se çdokush është i mirëpritur në Gjermani, por e rëndësishme është që ata të përpiqen dhe të punojnë për një Shqipëri më të mirë.