Bashkëpunimi UET- Instituti Konfuci në UT: Bursa studimi në universitetet më të mira të Kinës

Mësimi i gjuhës, kulturës dhe filozofisë kineze, summer apo winter camp dhe bursa studimi në universitetet më të mira kineze: janë vetëm disa nga përfitimet që do të kenë studentët e Universitetit Europian të Tiranës nga bashkëpunimi me Institutin Konfuci në UT.

“Kur të eci së bashku me dy të tjerë, të paktën nga një do të jem në gjendje të mësoj.” Kjo shprehje e thënë nga Konfuci, pesë shekuj para lindjes së Krishtit, mund të lexohet fare mirë sot si advokim i përfitimeve që sjell rrjetëzimi. Dija sot nuk është një aset që prodhohet në laboratorë dhe as një “mall luksi” që mund t’i qasen vetëm ata që kanë mundësi financiare. Dija sot është globale dhe mundësitë për të udhëtuar, vizituar, njohur zhvilluar, edukuar, shtrihen nga njëri cep në cepin tjetër të botës.

Në këtë frymë, për të zgjeruar marrëdhëniet me institucione të tjera ndërkombëtare, për të përfituar nga praktikat e tyre më të mira, për të krijuar më tepër mundësi për studentët, u realizua marrëveshja e bashkëpunimit mes Universitetit Europian të Tiranës dhe Institutit Konfuci në Universitetin e Tiranës. Confucius Institute at the University of Tirana (CIUT) u themelua në 2013 si rezultat i një marrëveshjeje të Universitetit të Tiranës me Qendrën e Institutit Konfuci, Kinë (HANBAN) si dhe me Universitetin e Gjuhëve të Huaja Pekin (BFSU), me synimin parësor nxitjen e mësimit të gjuhës dhe kulturës kineze.

Dy drejtuesit e këtij Instituti, Erion Malaj- Drejtor i palës shqiptare dhe Zheng Baoguo- Drejtor i palës kineze në CIUT, nënshkruan marrëveshjen e bashkëpunimit me administratorin e UET, Tildi Çadri, duke shprehur dëshirën që kjo nismë të konkretizohet dhe të japë rezultate praktike.

Çadri tha se kjo marrëveshje vjen në kuadër të bashkëpunimeve dhe qasjes që ka UET për studimet dhe cilësinë ndërkombëtare. “Ne duam që të krijojmë mundësi dhe facilitete për studentët e UET-it që të mësojnë gjuhën e kulturën kineze, të vizitojnë Kinën duke iu siguruar atyre bursa. E po ashtu, jemi të gatshëm të mirëpresim studentë kinezë dhe staf akademik.”

“Një nga urat lidhëse më të suksesshme mes Kinës dhe Shqipërisë në nivel akademik e kulturor”, e quajti Erion Malaj, Institutin Konfuci në UT, drejtimin e të cilit e ka marrë në vitin 2015. Ai tha se ndër vite numri i studentëve ka ardhur në rritje dhe kulmin e ka pasur para katër viteve me 600 studentë në një vit akademik, ndërsa aktualisht mesatarja është 250- 300 studentë.

“Ky Institut të ndihmon të kuptosh edhe pa vajtur atje, se çfarë është gjuha, çfarë është kultura kineze dhe të jep mundësinë të përgatitesh paraprakisht për të pasur një eksperiencë në cilëndo fushë që do të duash. Ne kemi çuar të rinj që kanë ndjekur studimet për mjekësi, për ekonomi, për biznes, për gjuhë, për shkenca politike etj.”

Malaj sqaroi më tej se studentët kanë qenë kryesisht në nivelin master, doktoraturë apo për studime postdoktorale dhe kanë studiuar në disa nga institucionet që renditen në Top 50 universitetet më të mira në botë.
“Studentët e UET-t do të kenë mundësi për eksperienca të ndryshme praktike, apo studimi afatshkurtër, siç janë kampet verore apo dimërore në Kinë, do të njohin nga afër një realitet tejet të avancuar të teknologjisë, të përzierë me një kulturë dhe filozofi të lashtë.”

Nga ana tjetër ai theksoi se edhe vete Instituti Konfuci ka çfarë mëson nga Universiteti Europian i Tiranës, një nga institucionet më të mëdha private të arsimit të lartë në Shqipëri.
“Edhe pse një vend i madh, edhe ata mësojnë nga ne në disa gjëra dhe gjykoj se ky është një rast i tillë. UET është absolutisht një ndër më të mirët në Shqipëri ndaj kjo marrëveshje bashkëpunimi është kënaqësi por edhe shenjë rëndësie për ne”, nënvizoi Malaj.

Kina nuk është veçse një superfuqi, e renditur si ekonomia e dytë më e madhe në botë. Është një vend me gjuhë, traditë e kulturë mjaft interesante, fillesat e të cilës shkojnë në lashtësi, ndërsa janë transformuar e pasuruar ndër shekuj. Në këtë kontekst, ky bashkëpunim, përtej zhvillimeve akademike e profesionale me njohuritë më të avancuara në të gjitha fushat, mundëson një eksplorim të gjerë të këtij vendi të largët të Azisë.