CEO i OTP Bank Shqipëri në Forumet UET: OTP Bank Albania për të dytin vit radhazi “The Best Bank” në Shqipëri, nga Euromoney’s Awards
I ftuar në forumet e të martave të përjavshme në UET ishte Z.Bledar Shella, Drejtor i Përgjithshëm Ekzekutiv i OTP Bank Shqipëri dhe Kryetar i Shoqatës Shqiptare të Bankave, AAB, i cili në një bashkëbisedim me studentët dhe pedagogët e Fakultetit të Ekonomisë, Biznesit dhe Zhvillimit në UET, shpalosi zhvillimin hap pas hapi dhe rritjen historike të OTP Bank ne Evropë dhe Shqipëri.
OTP Bank Albania u shpall për të dytin vit radhazi “The Best Bank” në Shqipëri nga Euromoney, gjatë ndarjes se Çmimeve të Ekselencës 2021. Mes arritjeve kryesore mbi të cilat u bazua edhe vlerësimi i dhënë nga Euromoney, qëndronin puna e jashtëzakonshme gjatë krizës së COVID-19 dhe daljes mbanë me arritje fantastike, si për rritjen e qëndrueshme, ashtu dhe për përkushtimin në zhvillimet digjitale të bankës. Fituesit shpallen pas një vlerësimi tërësor nga ekspertët, bazuar në monitorimin vjetor të bankingut global dhe industrive të bankingut të investimeve.
Sipas Kryetarit të Shoqatës Shqiptare të Bankave, viti 2021 ishte një vit pozitiv për sektorin e ekonomisë pasi në sektorin sistemit bankar: “kredia ka një rritje në vitin 2021 prej 9.21%, e cila është dhe rritja më e madhe në 5 vitet e fundit. Rritja domethënëse në depozita për vitin 2021 arrin në 11.4%”.
Prof. Asoc. Dr. Elvin Meka, Dekan i Fakultetit të Ekonomisë, Biznesit dhe Zhvillimit në paralelizëm me temën e forumit e përkufizoi zhvillimin/ zgjerimin e vazhdueshëm të kësaj banke si “zhvillim që ka ardhur si në aspektin organik, pra në rritjen e brendshme të bankës, ashtu dhe nga zgjerimi mekanik përmes realizimit me sukses të blerjes më të fundit të Alpha Bank – Albania”.
- Shella nisi prezantimin e përgjithshëm të OTP Group, duke theksuar se OTP Bank është një nga bankat më të mëdha në Evropë me një total aktivesh prej 73 miliardë euro, me 16 milionë klientë, e pranishme në 12 vende dhe me 1,477 degë. Grupi OTP është lider për kreditë dhe depozitat e individëve në Hungari, Bullgari, Slloveni, Serbi dhe Mal të Zi, si rezultat i rritjes së grupit ndër vite.
Një tregues i kësaj rritje të vazhdueshme të OTP Group, një risi e e vitit të shkuar, ishte blerja e dy bankave shumë të rëndësishme, si: Nova KBM dhe Alpha Bank. Në Maj të 2021 grupi firmosi një marrëveshje të blerjes së 100% të aksioneve të Nova KBM d.d. Kjo bankë është banka e dytë më e madhe në Slloveni me 20.5% të tregut bankar dhe është një ndër bankat më aktive në segmentin Individë dhe Korporatë, në tregun bankar në Slloveni. Ndërkohë, më 6 dhjetor 2021, kur OTP Group njoftoi se firmosi një marrëveshje me Alpha International Holdings Single Member S.A. për blerjen e 100% të aksioneve të Alpha Bank SH.A., filialin shqiptar të Greek Alpha Bank S.A. Ky ishte një hap shumë i rëndësishëm për grupin dhe fushën e bankingut, pasi Alpha Bank është një bankë universale që ka qenë aktive në segmentet Individë dhe Korporatë njëkohësisht.
Bledar Shella theksoi rëndësinë e marrëdhënies së bankës dhe klientit si partnerë, si një strategji për një marrëdhënie afatgjatë dhe për të krijuar një historik të klientit. Ky partneritet do të ndihmojë në rritjen e besueshmërisë së klientit në vitet e ardhshme, kur banka të zgjerojë aktivitetin dhe ku klienti të shihet pozitivisht, në rast procesi kredimarrje. Nga ana tjetër, ajo nuk do të rreshtë përpjekjet për digjitalizimin e të gjithë proceseve dhe procedurave bankare brenda OTP Bank Albania, për të sigutuar kënaqësinë maksimale të klientit, e jo thjesht për të tërhequr klientë të rinj.
Takimi u përmbyll treguar rreth synimeve të ardhshme të grupit dhe mundësinë e zgjerimit në të ardhmen edhe në sektor të tjerë. Z. Shella theksoi dhe synimin e përheshëm të OTP Group për të qenë banka e parë ose e dytë në çdo vend ku ajo është e pranishme.
