UET zhvillon edicionin e parë Start Up Week, çmim financiar për idenë fituese
Universiteti Europian i Tiranës ka zhvilluar edicionin e parë Start Up Week, dedikuar nxitjes dhe zhvillimit të ideve apo produkteve të reja që sjellin impakt pozitiv dhe ndryshim për komunitetin dhe shoqërinë.
“EcoBricks Albania” realizuar nga studentja Joana Hoxha u shpall fituese, mes katër ideve të tjera finaliste: “UniVerse Hub” nga Florida Kola; “Agro Link” nga Danjel Feeokaj; “USS” nga Olken Merxira; “Time Machine Diary” nga Teisi Calaj.
Thirrja e Start Up Week 2025 u çel në muajin mars ndërsa gjithë veprimtaria dhe menaxhimi i kompeticionit, i mbledhjes dhe vlerësimit të ideve pjesëmarrëse u bë nga tre pedagogë, dr. Elona Shehu, dr. Forcim Kola dhe dr. Emirgena Kola. Mes 20 ideve të paraqitura, ata zgjodhën pesë idetë më të mira për t’i dërguar në fazën finale, e cila u mbajt më 14 maj në ambientet e universitetit.
Vlerësimi i idesë më të mirë, më origjinale dhe novatore, u bë nga një juri me ekspertë të biznesit, sipërmarrjes dhe projekteve, e përbërë nga: Presidenti i UET, prof. asoc. dr. Selami Xhepa; Drejtorja e Marketingu në Easy, Jonida Kellezi; Sipëramarrësi Gentian Zotaj; Drejtorja e Programeve në Institutin Liberal Pashko, Ervjola Osmanaj; Drejtuesja e Projekteve në UET, Jonila Grabani.
Përgjegjësja e Departamentit të Ekonomiksit dhe Financës, dr. Elona Shehu tha se Start Up Ëeek vjen në kuadër të një projekti maket që UET ka krijuar, ndërsa u mbështet nga Center for Education and Development dhe Instituti Liberal Pashko, i cili dha 1 mijë euro për idenë fituese.
“Një nga iniciativat më me produkt që studentët e UET kanë krijuar gjatë gjithë kësaj kohë. Shpresoj që ato ide që dëgjuam, të jenë ato ide që do të trumbetojnë nesër në treg”, theksoi Shehu.
Teksa inkurajoi studentët që të bëhen pjesë e këtyrë iniciativave, presidenti i UET, prof. Selami Xhepa tha se detyra themelore e një universitetit është që të zbulojë të rinj dhe të reja kreativë, të cilët përmes gjenisë do të transformojën botën.
“Gjithë historia e progresit të shoqërisë njerëzore nuk është gjë tjetër veçse historia e individëve të kësaj natyre që kanë vendosur gurë kilometrikë në historinë e progresit tonë”, u shpreh Xhepa.
Profesori përgëzoi studentët finalistë duke i cilësuar impresionuese “që rrokin sfidat reale që ka shoqëria jonë në veçanti çështje që lidhen me zhvillimin e qëndrueshëm dhe cështje të tjera që prekin shoqërinë”.
Sipërmarrësi Gentjan Zotaj shprehu mbështetjen për të gjithë finalistët për të çuar përpara idetë dhe projektet e tyre.
Studentja e vitit të dytë master shkencor në Administrim Biznesi, Joana Hoxha, tha se ideja e saj që u shpall fituese është një miksim i industrisë së ndërtimit dhe problemit që vjen nga ndotja e plastikës, ku zgjidhja është riciklimi. “Bashkëlidhja e këtyre të dyjave konvenon edhe me objekivat e qëndrueshme të Kombeve të Bashkuara, duke qenë njëkohësisht një kauz sociale por edhe ekonomike”, nënvizoi ajo.
Gjithashtu, ajo falënderoi UET që nuk ndalon së organizuari evente të tilla që vetëm nxisin iniciativën e studentëve për të krijuar ide për startup.
Start Up Week 2025 vjen në vazhdën e shumë konkurseve të kësaj natyre të zhvilluara në UET, por tashmë me synimin për të qenë një event i përvitshëm, me përfshirjen e studentëve të të gjitha programeve të studimit dhe Klubeve Studentore.
