Studentë të punësuar dhe në internship/ Bashkëpunimi UET- Integrated Tech Solutions, një rast suksesi

Bashkëpunimi me industrinë mbetet prioritet thelbësor i Universitetit Europian të Tiranës, për të modernizuar kurrikulat e për të ofruar mundësi zhvillimi dhe punësimi për studentët. Përmes marrëveshjeve të universitetit me bizneset, dhjetëra studentë të programeve të ndryshme të studimit zhvillojnë praktika dhe internship-e pranë kompanive më në zë në vendin tonë. Një model suksesi në këtë drejtim mbetet bashkëpunimi i UET me Integrated Tech Solutions (ITS), një kompani e specializuar në konsulencë menaxhimi dhe shërbime të jashtme të IT-së, përfshirë zbatimin e Microsoft NAV/Dynamics 365 BC.

Që prej nisjes së bashkëpunimit mes dy institucioneve, në 2022-shin, Integrated Tech Solutions ka krijuar mundësi internship-i për studentët e programimit dhe inxhinierëve softwere të Departamentit të Inxhinierisë në Fakultetin e Inxhinierisë, Informatikës dhe Arkitekturës.

Muharrem Beqaj është pjesë e kompanisë prej më shumë se tre vitesh. Pas diplomimit, ai filloi internship-in dhe më tej nga viti në viti ngjiti shkallët e karrierës brenda të njëjtës organizatë për të arritur brenda një kohe të shkurtër në rolin e Senior Software Developer. Ka provuar, gjithashtu, eksperiencën e team lider-it për grupe të vogla zhvilluesish dhe programuesish. “Është diçka që e bëj me pasion. Është vet puna që të tërheq dhe të shton dëshirën për t’u përfshirë gjithnjë e më tepër në këtë fushë”, thotë ai.

Mundësi internship-i për 15 studentë

Thirrja e fundit e hapur nga kompania, ndryshe nga vitet e kaluara, krijoi hapësirë zhvillimi profesional për një numër të konsiderueshëm studentësh. Duke qenë pjesë e rrjetit të bashkëpunëtorëve, UET ishte ndër të parët që u vu në dijeni e më tej informacioni shkoi te studentët. Aktualisht, prej datës 1 shtator, 6 studentë të UET kanë nisur internship-in.

Dekania e Fakultetit të Inxhinierisë, Informatikës dhe Arkitekturës, Prof. Asoc. Dr. Teuta Xhindi, zhvilloi një vizitë në ambientet e kompanisë për të parë më afër ecurinë dhe punën e studentëve, të cilët njohuritë e marra në auditorë i vendosin në praktikë përmes zhvillimit të projekteve të ndryshme, si dhe zhvillojnë më tej aftësitë e tyre përmes përvetësimit të elementëve të rinj që diktohen nga zhvillimet dhe përditësimet e fundit teknologjike.

Gjatë takimit me Drejtorin Ekzekutiv të Integrated Tech Solutions, z. Maksim Caslli, dekania Xhindi e falënderoi për mundësinë e krijuar për studentët shqiptarë, por edhe ata ndërkombëtarë, duke e cilësuar këtë bashkëpunim shembull se si duhet të funksionojë marrëdhënia mes biznesit dhe akademisë.

“Falë këtij bashkëpunimi, 15 studentëve të UET iu dha mundësia për të ndjekur Akademinë për Zhvillues Microsoft 365 dhe më pas për të filluar internship të paguar e për t’u bërë në fund pjesë e kompanisë. Një tjetër anë pozitive e bashkëpunimit ishte ofrimi i mundësisë për dy studentëve nga Spanja për të vazhduar internship-in në këtë kompani, duke i dhënë kësaj marrëveshjeje dimensionin ndërkombëtar”, theksoi Xhindi.

Drejtori Maksim Caslli tha se qëllimi i kompanisë ndër vite ka qenë identifikimi që në auditorë i të rinjve të talentuar dhe më tej ofrimi i hapësirave për t’i zhvilluar dhe rritur profesionalisht, në një treg pune që ofron mundësi të shumta në këtë sektor.

“Për ne bashkëpunimi është shumë i rëndësishëm. Ne përpiqemi që t’i identifikojmë talentet që në dyert e universitetit, t’i zhvillojmë ato në ato domene që janë më të përshtatshme për biznesin dhe në të ardhmen, më të mirët, t’i mbajmë pranë nesh për zhvillimin e biznesit, e njëkohësisht ata të ndërtojnë karrierën e tyre”, nënvizoi Caslli.

Orgen Hamati dhe Read Danjolli janë dy prej studentëve që po ndjekin aktualisht Akademinë e Integrated Tech Solutions, ku pjesa teorike do të shoqërohet edhe nga një fazë tjetër tërësisht praktike, për të përzgjedhur në fund të tre mujorshit studentët që përshtaten më së miri me kompaninë dhe produktet apo shërbimet që ajo ofron.

Hamati sapo ka mbaruar studimet bachelor në Inxhinieri Informatike dhe aplikoi pa asnjë hezitim kur mori njoftimin për zhvillimin e internship-it. “Gjatë kësaj periudhe kam zhvilluar aftësi teknike, siç ishte përdorimi i Visual Studio Code dhe kodimi në të. Po ashtu, kam përfituar një kuptim më të mirë të mënyrës si funksionojnë proceset në një ambient profesional.”

Po kaq e frytshme ka qenë edhe për studentin tjetër Read Danjolli, i cili në fakt ka mbaruar këtë vit studimet master në Inxhinieri Sofuerike. “Këtu po mësoj një gjuhë te re programimi e cila do të më shërbejë për punësim në tregun shqiptar dhe në atë ndërkombëtar. Kjo për faktin sepse është ndër risitë e fundit në fushën e programimit.”

E themeluar në qershor të 2021-it nga konsulentët e Deloitte Albania, Integrated Tech Solutions kombinon ekspertizën e biznesit dhe teknologjisë për të ofruar zgjidhje gjithëpërfshirëse për klientët vendas dhe globalë. Ajo përbëhet nga 70 profesionistë të përkushtuar, angazhimi dhe aftësia e të cilëve ofron zgjidhje dhe shërbime me cilësi të lartë në fushën e biznesit dhe IT-së.