Karriera në fushën e teknologjisë është një nga më premtueset sot për sot, dhe e tillë parashikohet edhe për të ardhmen. Ndërkohë, që mundësitë e zgjedhjes janë të shumta, Fakulteti i Inxhinierisë, Informatikës dhe Arkitekturës krijon të gjithë hapësirën e duhur për formimin e duhur akademik

 Teknologjia është një industri progresive dhe vazhdimisht në ndryshim, duke premtuar një gamë të gjerë mundësish për punësim. Të gjithë të rinjtë, që kanë pasion kompjuterat, kanë një mundësi të mirë sot, që prirjet personale t’i zhvillojnë për t’i shndërruar në një profesion fitimprurës në të ardhmen. Meqënëse e ardhmja parashikohet të jetë e mbizotëruar nga teknologjia, sigurisht që karriera në këtë fushë është mjaft premtuese. Pavarësisht industrisë, bizneset kanë nevojë për profesionistët, që kanë aftësi dhe njohuri të përgjithshme për të mbështetur procese të ndryshme, që kanë të bëjnë me përdorimin e teknologjisë në vendin e punës.

Aftësimi në këtë fushë, që në fazat e hershme të jetës, duke filluar nga bazat e përdorimit të kompjuterave apo njohuri të thelluara për ata, që duan ta kenë këtë profesionin e tyre, bën që burimet njerëzore janë më të afta të trajtojnë sfidat e  paraqitura apo t’i paraprijnë ndryshimeve të shpejta, që parashikon e ardhmja. Kudo në botë degët, që kanë të bëjnë me teknologjinë janë ndër më të kërkuarat, si në ciklin Bachelor, ashtu edhe Master. Kjo, jo vetëm si përshtatje me trendet kohore, por edhe për shkak të fleksibilitetit, që kjo karrierë ofron. Një specialist në teknologjinë e informacionit, inxhinierinë informatike apo informatikën e aplikuar, veçanërisht falë profileve të shumta, që UET ofron, ka mundësinë të punësohet në sektorë të ndryshëm, me një gamë të pafundme zgjedhjesh.

Të tilla si janë mjekësia, artet dhe industria kreative, shërbimet fianciare, sektori banker, edukimi, ligji, agrikultura, organizatat jo fitimprurëse etj; gjithçka është në dorë të individit, prirjeve, interesave dhe objektivave personale. Esenciale është të zhvillohet nga individi një kërkim paraprak në lidhje me të gjithë hapësirat, që ofron tregu përpara përzgjedhjes së degës së studimit, apo aplikimit për një vend pune. Ndërsa, teknologjia vazhdon të zhvillohet, karriera gjithashtu mund të evoluojë, pasi kjo fushë nuk paraqet një industri statike. Mundësi të reja hapen çdo ditë brenda ndërmarrjeve, ose fushave përkatëse. Shumë profesione të reja kanë lindur këto 5-10 vitet e fundit, falë zhvillimeve të tilla si “user-interface apo user-experience designer”, zhvillues aplikacionesh për telefonat e teknologjisë së fundit, specialistë të “cloud computing”etj; dhe shumë të tjera pritet të krijohen në të ardhmen e afërt. Ndonëse jo pak herë ekziston një “paragjykim” për profesionistët e teknologjisë, të cilët mendohen se janë disi më pasivë në ditën e punës, për shkak se punojnë përpara paisjeve teknologjike.

E vërteta është, se këto profesione janë realisht dinamike dhe aspak të mërzitshme, pasi sfidat, që paraqiten janë të shumta dhe problematikat, që duhen zgjidhur po ashtu. Nëse kemi të bëjmë me sigurinë e përdorimit të shërbimeve teknologjike, suportin teknik, administrimin e rrjeteve, apo aspekte të tjera të profesioneve në fushën e teknologjisë, për të gjithë kureshtarët, hapësira për të mësuar çdo ditë më shumë e për të qenë kreativë është e pranishme. Në thelb, të punosh në fushat e teknologjisë, do të thotë që të ndihmosh njerëzit në një mënyrë ose në një mënyrë tjetër. Cilido qoftë specializimi, profesionistët e teknologjisë kanë potencialin dhe aftësinë që ta bëjnë punën e njerëzve në cdo fushë a industri më të lehtë, më produktive apo edhe interesante.

Teknologjia në UET

Një rëndësi e veçantë këtyre profesioneve i kushton edhe Universiteti Europian i Tiranës, në fakultetin e tij të Inxhinierisë, Informatikës dhe Arkitekturës, me degët dhe profilet përkatëse, si në ciklin Bachelor, ashtu edhe në Master Profesional apo të Shkencave, por gjithashtu edhe në diplomë profesionale. Prej vitesh studentëve të informatikës u janë ofruar mundësi të shumta për avancimin në karrierë, që nga Panairi i Punësimit, që afron kompanitë më të mëdha pranë studentëve, “Shkolla Dimërore e Inovacionit”, që bën bashkë maturantë të talentuar, bursat Erasmus+, të cilat parashikojnë të paktën një simestër studimi për studentët e UET me shpenzime jetese dhe akademike të mbuluara në një prej universiteteve partnere europiane, specializime të ndryshme falë bashkëpunimit me kompani të fuqishme si MikroTik, që i jep të drejtën UET të jetë akademia e parë MikroTik në Ballkan, apo edhe diplomave të përbashkëta.

Prej kësaj të fundit kanë përfituar tashmë disa prej studentëve të Masterit të Shkencave UET, të cilët këtë vit të ri akademik do të ndjekin studimet me bursë të plotë në një nga universitetet më të mira suedeze; sa i përket teknologjisë, atë të Mälardalen University Sweden. Bursa e studimit mbulon shpenzimet mujore, shpenzimet e jetesës dhe tarifat e universitetit, dhe avantazhi më i madh i kësaj marrëveshjeje është, që universiteti pritës në fund ofron edhe një diplomë. Pra, studentët që fitojnë këtë mundësi, do të përfitojnë diplomë të dyfishtë, një diplomë të Masterit Profesional nga universiteti suedez, si dhe një diplomë të Masterit Shkencor nga UET.