Presidenti i UET, Xhepa: Universiteti i kërkimit shkencor dhe i…

Universiteti Europian i Tiranës, në vitin e tij të 15-të akademik, dha titullin e 15-të “Doctor Honoris Causa” për poetin e kineastin e njohur z.Petrit Ruka, ngjarje që u shoqërua me daljen në dritë të librit të tij më të ri, nga botimet UETPRESS – 15 balada arbërore “Andej baltë, këtej erë”.

Në fjalën e hapjes së ceremonisë së nderimit, Presidenti i Universitetit Europian të Tiranës, Selami Xhema falenderoi pjesëmarrësit dhe shprehu kënaqësinë që personaliteteve të nderuara nga UET, iu shtohet edhe një personalitet i letrave dhe kulturës shqiptare.

Xhepa vlerësoi rolin e universiteteve, si institucione ku ngjizet progresi i një shoqërie, teksa veçoi Universitetin Europian të Tiranës, në zhvillimin e projekteve që i shërbejnë jo vetëm kërkimit shkencor, por edhe zhvillimit kulturor.

“Universiteti Europian i Tiranës, një institucion i ri i arsimit dhe kulturës, ka filluar të zhvillojë një mori projektesh që i shërbejnë jo vetëm kërkimit shkencor në fushat e shkencave, por dhe në zhvillimin kulturor dhe kujtesën historike të vendit”, u shpreh ai.

Fjala e Presidentit të UET, Selami Xhepës në ceremoninë e nderimit të Petrit Rukës:

I nderuar Kryeministri i Shqipërisë, Shkëlqesia Juaj Zoti Edi Rama,

E nderuar Ministre e Arsimit Sporteve dhe Rinisë, znj. Kushi

E nderuar Ministre e Kulturës, znj. Margariti,

I Nderuar mik i nderit i kësaj cermonie, z. Ruka,

I nderuar Rektor i UET, Prof. Gjuraj,

Të nderuar anëtar të Senatit Akademik,

Të nderuar miq e ftuar, të dashur kolegë,

Jam i nderuar që në emër të Universitetit Europian të Tiranës t’ju uroj mirëseardhjen personaliteteve kaq të nderuara të politikës, artit, kulturës dhe shkencës, në nderim të kësaj cermonie të dhënies së titullit “Honoris Causa” një personaliteti të letrave dhe kulturës shqiptare, zotit Petrit Ruka.

Universitetet përherë kanë qenë agora ku janë debatuar e zhvilluar dijet, ku janë prodhuar vepra dhe është përsosur kultura dhe identiteti i një kombi, është ngjizur progresi dhe përparimi i një shoqërie, prandaj dhe është vendi i merituar ku duhet të nderohen dijetarët dhe të gjithë ata që me veprën e tyre i shtojnë pasurisë së kombit më shumë vlera.

Kërkimet kanë provuar dhe historia ka dëshmuar se universitetet dhe qendrat kërkimore e shkencore kanë formësuar të ardhmen e shoqërive. Ato kanë përcaktuar aftësinë e një vendi për të konkuruar, mirëqenien sociale dhe pozitën e tij në strukturën komplekse të një bote gjithnjë e më të globalizuar. Ato janë fondamentale për arritjen e prioriteteve kombëtare, kur ato i kërkohen dhe kur arrijnë të integrohen në rrjetin e institucioneve që duhet të thonë fjalën e tyre për sfidat e vendit. Politika publike të bazuar në prova empirike janë një moto e mirëqeverisjes dhe ku më shumë se tek universitetet dhe institucionet kërkimore mund të gjenden asetet e kërkuara për këtë qëllim.

Kërkimet në fushat e arteve, humaniteteve dhe shkencave sociale janë një burim qendror dhe stimul për arritjet kulturore, prezantimin dhe ruajtjen e një mjedisi historik të cilat mishërohen gjithnjë e më shumë në normat e kulturës popullore. Zhvillimi dhe përdorimi i tyre si një mjet për të rritur ndërveprimin dhe mirëkuptimin me kulturat, besimet dhe shoqëritë e tjera, po bëhen një imperativë gjithnjë e më urgjente. Teksa shohim me shqetësim rritjen e konflikteve me bazë kulturore dhe etnike, apo dhe dështimin e multikulturalizimit, nëse mund të shprehemi kështu, kuptojmë më mirë se sa me rëndësi është mbështetja e kërkimeve në këto fusha të cilat i kontribuojnë harmonisë midis kombeve në një botë të civilizuar. E gjithë rruga e zhvillimit dhe përparimit ekonomik, është në radhë të parë ndryshim kulturor.

Universiteti Europian i Tiranës, një institucion i ri i arsimit dhe kulturës, ka filluar të zhvillojë një mori projektesh që i shërbejnë jo vetëm kërkimit shkencor në fushat e shkencave, por dhe në zhvillimin kulturor dhe kujtesën historike të vendit. Këto projekte e plotësojnë rolin e universitetit në shoqëri. Në hollin e famës së universitetit tonë, ne shenjojmë portretet e personaliteteve nga më të shquarat në fushat e filozofisë dhe shkencave, jurispudenca dhe ekonomia, politika dhe veprimi shoqëror, nga vendi dhe nga bota. Sot jemi të lumtur që hollit tonë të famës t’i shtojmë dhe një personalitet të nderuar dhe të respektuar të letrave dhe kulturës, zotin Petrit Ruka. Urime Zoti Ruka dhe suksese në punën dhe veprimtarinë tuaj krijuese.