“Ideja më e mirë e biznesit UET 2022” fituesit bursë studimi Erasmus+, vlerë monetare dhe praktika intershipi nga Orion Construction dhe Smartup Digital
Universiteti Europian i Tiranës, organizoi për të 10-in vit radhazi me studentët e Fakultetit të Ekonomisë, Biznesit dhe Zhvillimit në Universitetin Europian të Tiranës, kompeticionin “Ideja më e mirë e biznesit”, i cili promovon dhe mbështet idetë që studentët e rinj kanë në fushën e sipërmarrjes dhe inovacionit. Ky konkurs i motivon dhe i nxit studentët që të jenë kreativë dhe të guximshëm në idetë e tyre por njëkohësisht për t’i dhënë mundësinë që teorinë ta shndërrojnë në praktikë.
Idetë iu prezantuan një jurie profesioniste të përbërë nga Administrator i UET, Tildi Çadri; Anisa Hysi, Drejtore e Burimeve Njerëzore në “Orion Construction”; Ketrina Çabiri, Drejtore e Zyrës për Zhvillimin e Projekteve dhe Ndërkombëtarizimin në UET; Jona Babameto, Menaxhere e Financës në Gorenje Albania dhe Brian Shkodrani, themelues i Smartup Digital. Ata vlerësuan të gjitha idetë pjesëmarrëse dhe i kanë nxitur studentët t’i realizojnë ato.
Ina Keçi, pedagoge e Departamentit të Menaxhimit në UET, e nisi moderimin e aktivitetit duke shprehur vlerësimin për impenjimin dhe seriozitetin që secili studentë ka treguar në këtë projekt kaq të rëndësishme për ta. Pedagogia Keçi gjithashtu theksoi qasjen drejt trendeve të bizneseve dhe sipërmarrjeve ekologjike dhe në përmirësim të mënyrës së jetesës.
Prof. Dr. Ermira Qosja, nismëtarja e këtij kompeticioni theksoi rëndësinë e këtij eventi kaq i rëndësishëm për Universitetin Europian të Tiranës dhe studentët e tij “kur e nisëm shumë vite më parë e nisëm për të promovuar sipërmarrjen brenda UET dhe për të promovuar studentët më të mirë. Dëshira për të krijuar kompetencën e sipërmarrjes brenda nesh nuk ishte vetëm një dëshirë e një pedagogu por edhe një qasje e vetë UET, e vetë edukimit sipërmarrës në UET, e Universitetit të Biznesit dhe pse jo të Universitetit Sipërmarrës”.
Prof. Asoc. Dr. Elvin Meka, Dekan i Fakultetit të Ekonomisë, Biznesit dhe Zhvillimit vlerësoi vazhdimësinë e këtij aktiviteti vit pas viti me rigorozitet dhe me një fanatizëm të madh nga UET pasi i ndihmon studentët që të gjenerojnë idetë e tyre, t’i përpunojnë, t’i prezantojnë dhe më pas t’i zhvillojnë konkretisht “në këtë vit jubilar theksoj rëndësinë e kësaj nisme për të gjeneruar ide dhe për të nxitur idetë e studentëve tanë dhe për synimin për të shkuar sa më pranë rreth projektit që UET synon të partnerohet me më shumë se 500 ndërmarrje dhe koorporta”.
Në fund të konkursit u akorduan dy bursa për shkëmbim studentor Erasmus + nga Administratori i UET, Z. Tildi Çadri për sipërmarrjen “Win Cycle” studenteve Joana Hoxha dhe Nensi Janina. Z. Çadri u shpreh se kjo bursë do t’ju shërbejë studenteve për një eksperiencë ndryshe dhe do t’i ndihmojë ato që të krijojnë një ide më të qartë dhe për të definuar më mirë sipërmarrjen e tyre. Biznesi “HEPO” i ideuar nga studentët Orialda Toli, Flori Gjonaj, Essio Guni dhe Marko Palokaj u shpërblye me një çmim monetar nga Anisa Hysi, Drejtoresha e Burimeve Njerëzore në “Orion Construction”, që të nxiten për të vazhduar me sipërmarrjen e tyre. Gjithashtu studentët e idesë së biznesit “K.E.S.A” Altea Veria, Enida Qalliu, Zinete Xhafaj dhe Serxhio Coku ishin fituesit e një intershipi dhënë nga Brian Shkodrani në Spartup Digital.
