Forumet UET/ Ambasadorja Pang Chunxue: Arsimi, ura më e rëndësishme për të ardhmen Shqipëri–Kinë
Transformimi i Kinës nga një vend i varfër dhe i izoluar në ekonominë e dytë më të madhe të botës mbetet një nga proceset më të rëndësishme të zhvillimit në historinë moderne. Ky rrugëtim, i ndërtuar mbi industrializimin, reformat ekonomike, planifikimin afatgjatë dhe hapjen graduale ndaj botës, vazhdon të tërheqë vëmendjen e studiuesve, politikëbërësve dhe të rinjve në mbarë globin. Pikërisht mbi këto tema u ndal ambasadorja e Republikës Popullore të Kinës në Shqipëri, Pang Chunxue, gjatë një leksioni të mbajtur në Universitetin Europian të Tiranës, në kuadër të aktivitetit “Forumet UET”.
Përballë studentëve dhe pedagogëve, ambasadorja ofroi një panoramë të gjerë të modelit kinez të zhvillimit, duke shpjeguar se si një vend që në mesin e shekullit të kaluar përballej me varfëri të thellë, mungesë infrastrukture dhe një bazë industriale pothuajse inekzistente, arriti të shndërrohej në një fuqi ekonomike globale. Ajo solli shembuj konkretë nga periudha e pasluftës, kur Kina nisi procesin e industrializimit përmes planeve pesëvjeçare dhe projekteve strategjike, duke hedhur themelet e një sistemi ekonomik që sot konsiderohet ndër më të plotët dhe më të vetëqëndrueshmit në botë.
Duke iu referuar Planit të 15-të Pesëvjeçar dhe perspektivave të ardhshme të vendit të saj, Pang Chunxue nënvizoi se zhvillimi i Kinës nuk duhet parë vetëm si një histori suksesi kombëtar, por edhe si një mundësi për partneritete të reja globale. Në këtë kuadër, ajo veçoi Shqipërinë si një vend mik, i cili mund të përfitojë nga mundësitë që ofron modernizimi kinez në fusha të ndryshme, nga ekonomia dhe tregtia te arsimi, inovacioni dhe shkëmbimet kulturore. Në fokus të mesazhit të saj ishin arsimi, shkëmbimet mes të rinjve dhe ndërtimi i urave të reja bashkëpunimi mes Shqipërisë, Kinës dhe Europës.
“Besoj se arsimi është fusha më e rëndësishme për të ndërtuar ura afatgjata mes vendeve tona. Përmes shkëmbimeve studentore, bashkëpunimit ndëruniversitar dhe programeve akademike, ne mund të forcojmë më tej mirëkuptimin dhe miqësinë mes dy popujve tanë. Ne po punojmë me Ministrinë e Arsimit të Shqipërisë për të rinovuar marrëveshjen tonë dypalëshe për bashkëpunimin në fushën e arsimit, si dhe për njohjen e ndërsjellë të diplomave dhe certifikatave të të diplomuarve. Shpresoj që të arrijmë një konsensus sa më shpejt, në mënyrë që të promovojmë më tej bashkëpunimin tonë në sektorin e arsimit, jo vetëm përmes shkëmbimit të studentëve dhe bursave, por edhe përmes bashkëpunimit ndërmjet universiteteve.”
Ambasadorja tregoi, gjithashtu, se ka një marrëdhënie të veçantë me Shqipërinë, njohjen e së cilës e ka bërë përmes librave, para se të merrte detyrën. Me ardhjen në Shqipëri, e ka ndjerë më afër mikpritjen, ngrohtësinë dhe mirësinë e njerëzve shqiptarë, gjë që vlerësoj më shumë.
Sa i përket marrëdhënies së Kinës me Evropën, ambasadorja tha se janë dy vende partnere, jo rivale. {Ne mirëpresim një Europë të bashkuar, të fortë dhe të begatë. Besojmë se dialogu, bashkëpunimi ekonomik dhe shkëmbimet mes njerëzve janë rruga më e mirë për të përballuar sfidat e përbashkëta dhe për të ndërtuar një të ardhme më të qëndrueshme”, theksoi znj. Chunxue.
