Promovohet INGENIOUS 6-1/ Transformimi digjital kërkon zgjidhje teknologjike të qëndrueshme dhe të sigurta

Fakulteti i Inxhinierisë, Informatikës dhe Arkitekturës në Universitetin Europian të Tiranës ka promovuar numrin 6-1 të revistës shkencore “Ingenious”, me temë “Digital Transformation, Intelligent Systems, and Sustainable Solutions in Emerging Contexts”. Aktiviteti  bëri bashkë studentë, pedagogë dhe profesionistëve të fushës, të cilët diskutuan për sfidat dhe mundësitë që ka Shqipëria në epokën e transformimeve digjitale.

Dekania e FIIA,  Prof. Asoc. Dr. Teuta Xhindi tha se, përmes kërkimit shkencor, UET synon të sjellë sa më afër studentëve praktikat më të mira dhe t’i përgatisë ata për sfidat e reja.

“Ky numër i revistës ‘Ingenious’ është dëshmi e qartë e punës sonë të përbashkët për të sjellë inovacionin më pranë auditorit dhe tregut të punës. Transformimi digjital nuk është më një e ardhme e largët, por një realitet i prekshëm që kërkon përgatitje të lartë akademike dhe zgjidhje të qëndrueshme teknologjike”, u shpreh ajo.

Prof. Xhindi theksoi se botimi nxjerr në pah mënyra të reja se si kërkimi ndërdisiplinor mund të adresojë sfidat e botës reale në fushën e inxhinierisë, informatikës, shkencave mjedisore dhe zhvillimit të infrastrukturës.

Për të folur mbi praktikat më të fundit në fushën e inovacionit, ishte i ftuar drejtuesi i Qendrës së Inovacionit për Sigurinë dhe Mbrojtjen, z. Lorenc Çala. Ai ndau eksperiencën e tij ndër vite dhe foli për ndikimin e teknologjive të reja në sektorin e sigurisë dhe mbrojtjes.

Rektorja Prof. Dr. Drita Kruja përgëzoi drejtuesen e FIIA dhe gjithë pedagogët dhe studentët që vijojnë të japin kontributin e tyre për kërkimin shkencor të këtij universiteti. Ajo  theksoi se indeksimi në databazat  e njohura ndërkombëtare, mbetet një tjetër prioritet i UET.

Promovimi vijoi me prezanzimin për studentët e një prej punimeve të revistës, te realizuar nga Dr. Aurora Binjaku dhe Msc. Ernelda Novaku, me temë “Transformimi digjital i monitorimit në sistemin doganor” , të cilat prezantuan idenë e krijimit të një aplikacioni për gjurminim e mjeteve të mbyllura në pikat kufitare tokësore, një mjet që do lehtësonte punën dhe do të shmangte radhët në dogana.

INGENIOUS 6-1 përmban nëntë punime shkencore, një pjesë e të cilave vijnë si bashkëpunime mes studentëve dhe pedagogëve. Përmes analizave dhe kërkimeve në fusha të ndryshme të lidhura me teknologjinë, ata pasqyrojnë ritmin e përshpejtuar të transformimit digjital, rëndësinë në rritje të sistemeve inteligjente, si dhe nevojën urgjente për zgjidhje teknologjike të qëndrueshme dhe të sigurta.

Artikujt dëshmojnë se si inovacioni teknologjik nuk është më i kufizuar në fusha të izoluara, por operon gjithnjë e më shumë në ndërthurjen midis të dhënave, sistemeve dhe nevojave shoqërore. Një theks i veçantë i kushtohet zbatimeve praktike, shkallëzueshmërisë (scalability) dhe zgjidhjeve që përshtaten me kontekstin, veçanërisht brenda ekonomive në zhvillim siç është Shqipëria, ku transformimi digjital përbën sa një domosdoshmëri, aq edhe një mundësi.