Ish-studenti Sefedin Mjekra kthehet në UET si sipërmarrës dhe bashkëpunëtor me platformën e tij BIC.al

Idetë më të mira të biznesit lindin nga nevojat. Aty ku ti has një pengesë, kupton se ka një problem dhe duhet një zgjidhje. Kur u kthye në Shqipëri, pas studimeve master për Administrim Biznesi në Francë dhe pas punës me një kompani HR (Human Resources) në Danimarkë, Sefedin Mjekra filloi të eksploronte me startup-et. Gjithmonë kur i duhej një partner apo bashkëpunëtor, duhet të pyeste miq e të njohur të cilët jo gjithmonë jepnin të njëjtat alternativa. Madje disa sugjerime i vinin me vonesë.

Mendoi se sfida e tij nuk kishte pse të ishte sfida e çdo sipërmarrësi të ri e me përvojë që kërkonte të rritej dhe zgjerohej në treg. I lindi ideja e ngritjes së platformës BIC.al, e cila do të bënte të mundur ndërtimin e një komuniteti të gjerë dhe interaktiv biznesesh dhe kompanish, pavarësisht fushës dhe natyrës së tyre të operimit. E lançuar prej disa muajsh, Business Internation Connect është tashmë një platformë mbarëkombëtare, ku pasqyron dhe ndërlidh bizneset nga Shqipëria dhe Kosova. Sefedin Mjekra tregon se aktualisht në këtë hapësirë të re virtuale janë mbi 200 klientë nga industri dhe sektorë të ndryshëm.

“BIC. al është e vetmja platformë në Shqipëri. Madje nga kërkimet tona nuk ka të tillë as në tregun rajonal”, shprehet ai gjatë firmosjes së memorandumit të bashkëpunimit me Universitetin Europian të Tiranës. Dikur student i auditorëve të këtij universiteti, tashmë Sefedin Mjekra kthehet si sipërmarrës me idenë e tij novatore të biznesit për të nisur një partneritet që do të frymëzojë studentët dhe do të jetë i vlefshëm për gjithë komunitetin akademik.

Duke e uruar për punën dhe rrugëtimin e tij të suksesshëm, administratori i UET, Tildi Çadri, u shpreh i kënaqur që sheh se studentët e dalë nga këto auditorë gjejnë më së miri vendin e tyre në tregun e punës brenda dhe jashtë Shqipërisë, e madje vijnë me ide novatore dhe konkurruese. Çadri theksoi bashkëpunimi me këtë platformë do t’i ndihmojë studentët dhe pedagogët për hulumtime shkencore dhe për të studiuar tregun përmes statistikave dhe analizave që ajo ofron.

BIC.al, përveçse një hapësirë që prezanton kompanitë, ofertat, burimet e tyre, krijon mundësitë e bashkëpunimit, shërben edhe si një database për të bërë kërkime e për të njohur më mirë ofertat e tregut.

Më tej, ai e ftoi themeluesin e BIC.al që të ndajë eksperiencën e tij ndërkombëtare, si student e më tej si punëmarrës, por edhe atë si sipërmarrës në Shqipëri, për të gjithë të rinjtë të cilët kanë ambicie të ndërtojnë në të ardhmen startup-et e tyre.

“Lidhu, bashkëpuno, rritu”

Business Internation Connect është model i marketingut B2B (biznes me biznes), që tejkalon modelet tradicionale dhe vjen nën lehtësirat e krijuara nga bota digjitale. Çfarë duhet të bëjë një biznes kur hyn në platformë?

Motoja e BIC.al është e thjeshtë: “Lidhu, bashkëpuno, rritu”. Çdo biznes, që ka një produkt, ide apo shërbim, duhet të regjistrohet duke plotësuar të dhënat e kërkuara dhe duke specifikuar industrinë ku operon. Më tej, ai mund të paraqesë ofertën apo kërkesën e tij, mund të kërkojë të singjashmit e vet që operojnë në qytete të ndryshme të Shqipërisë dhe Kosovës, të kontaktojë direkt me ta nëse dëshiron të bashkëpunojë për të shitur produkte, shërbime apo për të plotësuar nevojat e tij në kompani.

Përmes kësaj platforme, çdo biznes lokal gjen hapësirën e tij për t’u reklamuar profesionalisht, për të prezantuar ofertat e tij dhe për të gjetur partnerët që i duhen, pegesë e cila shpeshherë penalizon ecurinë dhe suksesin e bizneseve shqiptare.