UET Talent 2025, jepen 11 bursa për maturantët dhe studentët më të talentuar në fushën e arteve
Pesë bursa dhe gjashtë gjysmë bursa për më të talentuarit në konkursin e përvitshëm UET Talent. Universiteti Europian i Tiranës vijon misionin dhe traditën e bukur të vlerësimit dhe mbështetjes së studentëve që frymojnë dhe punojnë për të qenë artistët e ardhshëm të Shqipërisë.
Jo vetëm nën emocionet e zgjedhjes së programeve të studimit, por edhe nën ethet e konkurrimit; java e dytë e këtij shtatori startoi në Universitetin Europian të Tiranës me një ngjarje të rëndësishme për të ardhmen e maturantëve dhe studentëve e pasionuar pas artit, konkursi UET Talent. Ky audicion, të cilin UET e zhvillon për të pestin vit radhazi, vlerëson të rinjtë e talentuar në disa disiplina të artit dhe mbështet zhvillimin e tyre përmes bursave të studimit.
Kjo ngjarje merr një rëndësi të veçantë për universitetin dhe pedagogët, të cilët janë të parët që përballen me artistët e ardhshëm shqiptarë, shijojnë krijimtarinë dhe punën e tyre, pikasin ata më të talentuarit për t’i mbajtur dhe rritur profesionalisht në auditorët e UET.
Në edicionin e këtij viti, organizuar nga Departamenti i Arteve të Aplikuara në UET, në datat 8-9-10 shtator, morën pjesë 56 maturantë dhe studentë. Ata konkurruan në gjashtë disiplina, në përputhje me programet e Arteve që ofrohen në universitet: Aktrim; Balet-Kërcim; Pikturë-Grafikë; Instrument; Kanto dhe Multimedia.
Pas fazës së audicionit, juria e përbërë nga drejtuesi i këtij departamenti, Dr. Ermir Nika dhe pedagogët: Kristi Bello, Hameraldi Agolli, Gejsi Tafa, Xhoni Jesku, Reinald Kokiçi, vlerësoi me certifikata pjesëmarrjeje gjithë konkurrentët që arritën në finale. Për më të mirët e UET Talent 2025 u dhanë 11 bursa talenti. U vlerësuan me bursa të plota pesë studentët: Anjeza Sejdia, Fllada Joca, Luisida Male, Amela Gjergji, Ambra Sula. Këtë vit, juria dha gjithashtu, gjashtë gjysmëbursa për: Xhesjana Elmasllari, Ornela Hoxha, Luis Alla, Albana Metaliu, Luna Causholli, Adela Dervishi.
Universiteti Europian i Tiranës nuk mund të kuptohet pa dimensionin e artit sepse e ka pasur pjesë të rrugëtimit të tij 20-vjeçar, duke dhënë mbështetjen e pakursyer për artisët, duke zhvilluar aktivitete, ekspozita, botime të ndryshme apo duke sjellë në auditor përfaqësuesit më të njohur të artit shqiptar. Në auditorët e tij artet erdhën në formën e plotë akademike me hapjen e Departamentit të Arteve të Aplikuara në 2018-ën, duke e bërë kështu UET-in të parin universitet jopublik që ofronte programe studime në Arte.
Edhe sot, UET vijon ta ruajë me fanatizëm këtë dimension, të investojë dhe mbështesë artin dhe artistët shqiptarë përmes festivaleve që zhvillohen çdo vit në periudhën maj-qershor. Auditorët kthehen në salla kinemash, teatrosh, galerish e koncertesh, ku shpërfaqet krijimtaria në pikturë, talenti në aktrim dhe kanto, fantazia në filma e të rinjve gjimnazistë, studentëve të UET por edhe nga universitetet partnere.
Konkursi UET Talent merr rëndësi të veçantë sepse iu krijon mundësi studentëve të ndjekin pasionet dhe të zhvillojnë talentin përmes vazhdimit në ato programe studimi që shpesh nënvlerësohen, por janë të domosdoshme për artin dhe kulturën e një vendi.
