Small Assignment, Big Impact/ Shpallen tre fituesit e konkursit në UET me projektet më novatore
Ajo që nisi si një detyrë kursi, në kuadër të lëndëve të semestrit të dytë, në fakt u shndërrua në një projekt novativ me shumë ide të vlefshme për të përmirësuar të jetën tonë. “Small Assignment, Big Impact” është konkursi që organizua nga Departamenti i Informatikës dhe Teknologjisë në Universitetin Europian të Tiranës, ku studentët e tre viteve bachelor, në programet Inxhinieri Informatike, Teknologji Informacioni dhe Informatikën Ekonomike, realizuan idetë e tyre gjatë një periudhe gati dy mujore.
Më pas ata i ekspozuan projektet në ambientet e UET dhe i prezantuan për jurinë e këtij konkursi, e përbërë nga ekspertët e IT-së: Valbona Dhjaku, Erjon Curraj, Gersi Mirashi dhe Paulin Kodra. E veçanta e këtij kompeticioni ishte se kërkoi një angazhim të gjithanshëm të studentëve, të cilët i paraqitën idetë e tyre në postera A0, fletëpalosje, video, demo, forma të tjera kreative e më tej i shpjeguan për jurinë.
Një mbyllje shumë të bukur të lëndëve, e cilësoi rektorja e UET, prof. dr. Drita Kruja, duke përgëzuar pjesëmarrësit, ndërsa theksoi se studentët e Fakultetit të Inxhinierisë, Informatikës dhe Arkitekturës shpesh janë vlerësuar me çmime në konkurse kombëtare e ndërkombëtare.
“UET ka shumë ngjyra dhe një prej tyre jeni ju. Një ngjyrë shumë e bukur sepse fakulteti juaj dhe Informatika Ekonomike në Fakultetin e Ekonomisë, Biznesit dhe Zhvillimit përbëjnë numrin më të madh të studentëve të UET.”
“Jeni ju që na bëni krenarë dhe na përfaqësoni aq mirë brenda dhe jashtë institucionit”, u shpreh dekania e Fakultetit të Inxhinierisë, Informatikës dhe Arkitekturës, prof. asoc. dr. Teuta Xhindi, duke theksuar se ky fakultet e fillon dhe e mbaron vitin akademik me aktivitete. “Puna dhe rezultatet tuaja janë pasqyrë dhe konkluzion i punë së përbashkët”, shtoi ajo më tej, teksa i cilësoi të gjithë studentët pjesëmarrës fitues të këtij konkursi.
Në fjalën e saj, përgjegjësja e Departamentit të Informatikës dhe Teknologjisë, dr. Ardian Topi falënderoi gjithë ekipin që mbështeti studentët gjatë gjithë procesit, e përbërë nga pedagogët: dokt. Malvina Niklekaj, Dokt. Jora Banda, Msc. Amanda Kote si dhe dekanin e Studentëve, Msc. Kristi Bello, për suportin dhe punën e jashtëzakonshme.
“Nëse ju doni këshilla, mos hezitoni të trokisni për t’i vazhduar idetë më tepër, për t’i përmirësuar akoma më shumë, e pse jo për t’i bërë gati për tregun”, ishte apeli i saj për studentët.
Tre vite studimi, tre grupe fituese
Pjesë e konkursit “Small Assignment, Big Impact” u bënë disa grupe nga çdo vit bachelor, prej të cilëve doli nga një fitues. Ata u vlerësuan me një çmim simbolik financiar prej 100 eurosh, ndërsa të gjithë studentët morën certifikatë pjesëmarrje. Projektet fituese, të paraqitura para jurisë, u prezantuan edhe para audiencës me pedagogë dhe studentë të tjerë.
Fituese e vitit të parë u shpall skuadra e përbërë nga Sejda Hoxha, Fjona Danglli dhe Vasjan Çupri, të cilët kishin krijuar një aplikacion edukativ që ndihmon përdoruesit të kuptojnë më mirë regjistrat e CPU, i titulluar VICER (Vision, Inovation, Connectivity, Execution, Revolution). Para dhënies së këtij çmimi, këshilltarja e Drejtorit Ekzekutiv për IT dhe Digjiitalizim në Credisn Bank, dr. Valbona Dhjaku, tha se të gjitha punimet ishin impresionuese dhe se të gjithë studentët janë fitues.
Arbi Kullakshi dhe Sara Harunaj ishin skuadra fituese e vitit të dytë. Ata kishin ndërtuar një platformë të quajtur Zennstream, e cila mundëson menaxhimin e plotë të kompanive, duke integruar të gjitha funksionalitet e nevojshme në një vend. Gjatë dhënies së këtij çmimi, eksperti i transformimit digjital dhe novacionit në SCiDEC, dr. Erjon Curraj, vuri në pah energjinë, pasionin dhe dëshirën e çdo studenti për të ecur para.
“Secili prej jush ka mundësi për ta bërë produktin që të ecë përpara dhe të komercializohet. Dështimet në fushën tonë janë sukses dhe tregues se sa shumë keni punuar dhe mësuar”, theksoi ai më tej.
Rekomandimin për të vijuar punën më tej e për t’i përmirësuar këto projekte e dha edhe eksperti i IT, ish-student i UET, Paulin Kodra, duke shpallur më tej emrat e fituesve të vitit të tretë, Estel Caca dhe Marin Gjini.
Ata kishin ndërtuar një platformë web për udhëtime të quajtur “Planora”, e cila prezanton në mënyrë të detajuar destinacionet turistike më të vizituara në secilin qytet të Shqipërisë. Nëpërmjet Planor-ës, çdo turist mund të planifikojë një udhëtim, të marrë gjithë udhëzimet e nevojshme për të shkuar në atë destinacion, e më tej gjithë sugjerimet për të bërë një eksplorim të plotë lokal në çdo qytet.
Përtej projekteve të IT, ideve mjaft novatore e të zbatueshme, vlerësimeve, këshillave dhe sugjerimeve mjaft të vlefshme, konkursi pati disa momente relaksi përmes këngëve të performuara nga studentet e UET, duke sjellë kështu një atmosferë të këndshme, e duke bërë bashkë shkencën me artin.
