Tri breza artistësh në një mbrëmje muzikore, koncerti-dhuratë i studentëve të masterit në UET

Nga kompozitori rus Dmitri Dmitriyevich Shostakovich te ai gjerman Johannes Brahms e George Frideric Handel, për të ardhur më tej te kompozitorët më me emër shqiptar, Pjetër Gaci, Avni Mula e Limos Dizdari. Mbrëmja muzikore në Universitetin Europian të Tiranës, organizuar dhe drejtuar nga profesori i violinës, Ramazan Peku, ishte një ngjarje e veçantë që ngjalli shumë emocione dhe ndërlidhi shumë elementë. Koncerti ishte një kombinim partiturash klasike dhe kompozitorësh të kohëve të ndryshme, e njëkohësisht një ndërthurje mes instrumenteve me këngët operistike.

Po kaq e veçantë ishte edhe audienca e këtij koncerti, me një të ftuar special në mesin e saj, piktorin, poetin dhe violonçelistin, Lekë Tasi, i cili punoi çelist i parë në Orkestrën e Radios dhe të Teatrit të Operës deri në 1967-të, vit kur u internua në Grabjan. E ndërsa karriera e tij në këtë dimension perëndoi, ishte koha kur formoheshin të rinj të tjerë të talentuar, sot pedagogë të UET-it, si Ramazan Peku, Shqipe Zani apo Edit Mihali. Tashmë janë studentët e tyre që po përgatiten në fusha të ndryshme të arteve, që performojnë dhe dëshmojnë talentin e tyre.

Në çelje të koncertit profesor Peku tha se ky event vjen si një kurorë lulesh për të finalizuar diplomën studentët e masterit në arte, të cilët mësojnë prej pesë vitesh në UET, e po për kaq kohë edhe ai është pjesë e këtij ambienti, duke derdhur shumë pasion, përkushtim e dashuri.

“Gjatë këtyre viteve kam punuar, kam analizuar bashkë me koleget e mia, pedagoget e kantos dhe kam dëshiruar një koncert. Atë që studentët e kanë mësuar gjatë vitit akademik, dua ta vendosin në skenë sepse skena i formon artistët. Ky koncert bëhet vetëm me studentët e masterit, të cilët diplomohen gjatë këtyre javëve dhe është një dhuratë që ata po ua bëjnë juve sot.”

Emocionuese e quajti përgjegjësi i Departamentit të Arteve të Aplikuara në UET, dr. Ermir Nika këtë moment të daljes së studentëve në jetë, duke lënë kështu edhe një ndikim të fortë te pedagogët. “Jemi mësuar me ta dhe ne si pedagogë jemi të ndikuar më shumë, pasi çdo student është një përvojë e një vlerë që i shton vetes, por dhe një mundim që shpërblehet më së miri në skenë.”

Duke iu referuar aktiviteteve artistike që ky departament ka organizuar përgjatë një muaji, nga artet pamore te ato skenike e muzikore, Nika tha se UET ka si specifikë ofrimin e skenës për studentët. “Skena është dëshmia se çfarë arrin pedagogu në bashkëpunim me studentin, e po aty është prova dhe investimi që një prind sheh te fëmija i tij.”

Koncerti u çel me një preludë të Shostakovich nga profesor Ramazan Peku dhe Patrizia Gostivari, për të vijuar pastaj me një tjetër pjesë nga Shostakovich dhe vallen hungarze nr.6 të Brahms. Ato u interpretuan nga professor Peku dhe djali i tij Miron Peku, po ashtu violinist e njëkohësisht student në vitin e fundit master.

Dy studentet Bebjana Shijaku dhe Patrizia Gostivari sollën në pizzicato (interpretim në violinë me gishta) një pjesë nga Brahms, e më tej kompozimin e Limos Dizdarit “Fjalët e qiririt”, interpretuar nga Bebjana dhe prof. Peku. Një tjetër duo ishte ajo mes Klaudia Sulës dhe Bebjana Shijakut, me një pjesë të kompozitorit gjermano-britanik, George Frideric Handel.

Pjesë e koncertit u bënë edhe studentët në kanto Alisa Berisha, Artur Vera dhe Françeska Shtalbi, ndërsa u shoqëruan në piano nga dy studentët e tjerë, Reindol Kokiçi dhe Klaudio Hasanllari.

Profesor Peku kishte bërë një zgjedhje të guximshme duke sjellë në mbyllje dy trio në ansambël dhe violinë, me këngën shkodrane “Lan vasha te guri lumit” dhe populloren “Vajta rashë”, të cilat e kaluan me sukses testin e parë të publikut.

Surpriza e studenteve Bebjana Shijaku, Patrizia Gostivari dhe Klaudia Sula e bënë më të paharrueshëm koncertin. Ato lexuan një letër falënderimi për profesorin e tyre, duke shprehur mirënjohjen për mbështetjen dhe frymëzimin që ai iu dha gjatë viteve të studimit, moment që përloti gjithë të pranishmit në sallë.