UET nis bashkëpunimin me një nga institucionet më novatore në botë, Universitetin e Pitsburgut në SHBA

Partneriteti dhe shkëmbimi janë e ardhmja e universiteteve. Vetëm kështu shtohet kontributi, shpërndahet inovacioni dhe shoqëria njerëzore bëhet më e përgatitur përballë sfidave botërore. Universiteti Europian i Tiranës e ka nisur prej vitesh shtrimin e kësaj rruge, duke bashkëpunuar me shumë universitete të Europës, ndërsa i shtoi këtij vargu një gur themeltar për të ardhmen e tij dhe të shoqërisë shqiptare.UET kaloi kufijtë e Europës dhe shkeli në atë që shumë e kanë etiketua si vendi i ëndrrrave.

Rektori i Universitetit Europian të Tiranës, prof.dr. Tonin Gjuraj nënshkroi të premten një Memorandum Mirëkuptimi për bashkëpunim me kancelaren e Universitetit të Pitsburgut, znj. Joan Gable. E pranishme në ambientet e UET-it, znj. Gable shprehu kënaqësinë e hedhjes së këtij hapi mes një universiteti shqiptar dhe atij amerikan.

Rektori Gjuraj tha se ranë dakord që të nisin sa më parë negociatat për detajet e marrëveshjes dhe nisjen e shkëmbimeve konkrete. “Ne njohim peshën dhe ekspertizën e këtij institucioni. Janë një sërë pikash të rëndësishme që do të konkretizohen në të ardhmen, që kanë të bëjnë me projekte të përbashkëta, sidomos në fushat të ndryshme të kërkimit, me interes për të dyja palët.”

Universiteti i Pittsburgh-ut është një institucion publik i rangut më të lartë në Pensilvani dhe anëtar i Shoqatës së Universiteteve Amerikane, që përfshin 64 institucione kërkimore. Me një histori mbi 200 vjeçare, ky universitet ka dëshmuar arritje të rëndësishme për shoqëinë, duke e bërë atë një nga universitetet më inovative në botë.

Nën moton “Që nga viti 1787 ne kurrë nuk kemi reshtur së shtyri skajet e asaj që është e mundur”, Universiteti i Pitsburgut numëron sot një sërë arritjesh në fushën e shkencës, teknologjisë, mjekësisë dhe të drejtave të njeriut.

Në të u zhvilluan dijet e para mjekësore, siç ishte shpikja e vaksinës së parë në botë të poliomielitit dhe transplanti i zemrës e mëlçisë që shpëtuan jetë. Nga dyert e këtij institucioni arsimor e kërkimor kanë dalë mendimtarë të mëdhenj, liderë, artistë, legjenda sportive dhe ata që thyen barrierat racore dhe gjinore, të gjithë duke u përpjekur për diçka më të madhe që shënjoi emrin e tyre në histori.

Tashmë edhe UET do të përfitojë nga praktikat më të mira botërore, duke nxitur kërkimin dhe novacionin. Nëërmjet marrëveshjes, palët synojnë zbatimin e programeve ose aktiviteteve të tilla si: projekte të përbashkëta kërkimore në fusha me interes të përbashkët; shkëmbimin e publikimeve dhe raporteve akademike; shkëmbimin e përvojave në metodat inovative të mësimdhënies dhe hartimin e kurseve; organizimin e simpoziumeve, seminareve dhe konferencave të përbashkëta; mundësitë për zhvillim shkëmbim studentësh dhe shkëmbim të studiuesve vizitorë hulumtues.

Nënshkrimi i kësaj marrëveshjeje erdhi në prag të një ngjarjeje të madhe për UET, në ndjekje të traditës 17-vjeçare të akordimit të titullit “Doctor Honoris Causa”. UET nderoi znj. Deborah L. Wince-Smith, presidente dhe drejtoreshë ekzekutive e Këshillit të Konkurueshmërisë, një koalicion i drejtuesve të kompanive, presidentëve të universiteteve dhe liderëve të sindikatave, të angazhuar për të drejtuar konkurrueshmërinë ekonomike të SHBA-ve.