UET dhe UMT “bashkojnë forcat”, firmosin marrëveshje në kohë pandemie
Në një kohë plot të papritura dhe sfida për shkak të pandemisë, Universiteti Europian i Tiranës nënshkroi të mërkurën një marrëveshje bashkëpunimi me Universitetin e Mjekësisë së Tiranës në kuadër të rritjes së cilësisë akademike, kërkimit shkencor, por edhe praktikave në fushat përkatëse të ofruara.
Marrëveshja mes Universitetit Europian të Tiranës dhe Universitetit të Mjekësisë së Tiranës u nënshkrua nga rektorët përkatës, Prof. Dr. Tonin Gjuraj dhe Prof. Dr. Arben Gjata, të cilët nënvizuan rëndësinë e saj dhe atë çka ofron secili institucion, në pjesën e shkëmbimit material dhe akademik, por edhe atë të kërkimit shkencor.
Rektori i UET, Prof. Dr. Tonin Gjuraj falenderoi rektorin e UMT-së, Prof. Dr. Arben Gjata për mbështetjen që po i jep universitetit dhe veçanërisht Fakultetit të Shkencave Mjekësore Teknike në UET, pasi siç dihet ka vetëm tre vite që është hapur, por po merr një vrull të menjëhershëm.
“Siç ju e dini Fakultetin e Shkencave Mjekësore Teknike e kemi shumë të ri. Jemi në vitin e tretë dhe megjithatë në Bachelor kemi tre programe, në Master Shkencor po ashtu, dhe në atë Profesional kemi vetëm një. Në këto vite kemi rreth 421 studentë që kanë ardhur në UET dhe për ne mbështetja juaj me përvojën që keni dhe me peshën e madhe që ka historia e këtij institucioni dhe me infrastrukturën, logjistikën apo burimet njerëzore është jetike”, u shpreh Prof. Dr. Tonin Gjuraj, teka theksoi se edhe pse secili prej universiteteve konkurron për standarde dhe cilësi, asgjë dhe askush nuk i pengon të bashkëpunojnë.
Nga ana tjetër as rektori i Universitetit të Mjekësisë së Tiranës, Prof. Dr. Arben Gjata nuk i kurseu falenderimet, ndërsa theksoi se ajo që i dallon universitetet është bashkëpunimi. Sipas tij bashëpunim mes universiteteve nuk ka vetëm në Shqipëri, por edhe ne vendet më të zhvilluara në botë.
“Faleminderit ju për interesin dhe gjithmonë mendoj që ajo që i dallon universitetet është bashkëpunimi. Edhe institucionet më të rëndësishme në botë që kanë konkurruar në Mjekësi përherë e kanë gjetur rrugën e bashkëpunimit”, u shpreh Prof. Dr. Arben Gjata.
Rektori i UET, Gjuraj tha se janë gjithë sy e veshë për të mësuar nga përvoja e UMT-së dhe se edhe pse në kushte të vështira pandemie, Fakulteti i Shkencave Mjekësore Teknike në UET do ia dalë.
“Siç thuhet në marrëveshje është e përgjithshmë, por siç e kemi thënë në nenin e 2-të të saj ne do të jemi personat të ngarkuar për ta detajuar dhe konkretizuar këtë marrëveshje dhe që besoj se do të fillojë shumë shpejt. Ne jemi syhapur dhe po dëgjojmë Universitetin e Mjekësisë se si do të zhvillojë praktikat dhe provimet dhe të vijmë të marrim përvojën më të mirë dhë të shohim se si do të përshtatemi në këtë periudhë të vështirë, por që besoj se do t’ia dalim”, u shpreh rektori i UET.
Ndërsa pasi u firmos kontrata për më tepër detaje rreth saj foli rektori i UMT-së, Gjata i cili tha se marrëveshjet e bashkëpunimit mund të çojnë në hapësira bashkëpunimi konkrete mes fakulteteve, departamenteve apo dhe pedagogëve.
“Kohëzgjatja e kontratës bëhet një vjeçare, por rinovohen çdo vit, por dhe mund të zgjatet. Kjo është një marrëveshje që hap hapësira bashkëpunimi. Nëpërmjet kësaj marrëveshje japim hapsirë në çdo department të Mjekësisë, mund të bëjë marrëveshje me departamente apo fakultete përkatëse të UET. Është një marrëveshje në kuadër të bazave të bashkëpunimit. Linjat e bashkëpunimit nuk kalojnë nëpërmjet rektorëve, por janë bashkëpunim midis fakulteteve apo departamenteve, pasi varet nga projektet e përbashkëta, shkëmbimeve apo nevojave që ka njëri apo tjetri”, përfundoi Gjata.
Kjo marrëveshje vjen fill pas mermorandumit të bashkëpunimit që u nënshkrua më 22 dhjetor mes UET-së dhe Universitetit të Tiranës, duke ngritur kështu siparin e një rrugëtimi të ri për arsimin e lartë në Shqipëri, që kapërcen ndasitë e kontekstit të themelimit apo organizimit dhe bëhet bashkë në emër të standardeve të cilësisë, si një e mirë publike.
