Prof. Dr. Belina Budini

Prof. Dr. Belina Budini mban aktualisht detyrën e Dekanes së Fakultetit të Shkencave Humane, Edukimit dhe Arteve Liberale si dhe të Drejtueses së Departamentit të Shkencave Humane dhe Komunikimit në Universitetin Europian të Tiranës (UET). Me mbi dy dekada përvojë akademike dhe profesionale, si pedagoge dhe drejtuese në arsimin e lartë, Budini ka gjithashtu një profil të spikatur kërkimor dhe editorial në fushën e mediave dhe të komunikimit.

Si Jean Monnet Chair (2024–2027) në Studime Europiane dhe Media, Prof. Budini udhëheq disa projekte kombëtare dhe ndërkombëtare mbi inovacionin mediatik, gazetarinë dhe komunikimin në kontekstin e integrimit europian. Ajo ka qenë gjithashtu akademike e ftuar dhe bashkëdrejtuese forumi ndërkombëtar në Qendrën e Studimeve Europiane (SEESOX), Kolegji St Antony’s, Universiteti i Oksfordit (2020), si dhe ka mbajtur angazhime kërkimore dhe si lektore e ftuar në institucione si Universiteti i Harvardit (2025) dhe Goldsmiths, University of London, ku përfundoi Masterin në Media dhe Komunikim. Ajo ka përfunduar doktoraturën në Gazetari dhe mban titullin akademik Profesor.

Kërkimi shkencor i Prof. Budinit fokusohet në sistemet mediatike, komunikimin politik, politikën e ndërmjetësuar dhe diplomacinë publike, veçanërisht në kontekstet post-komuniste dhe të Ballkanit Perëndimor. Punimet e saj trajtojnë marrëdhënien ndërmjet medias dhe demokracisë, paraqitjet e Shqipërisë në mediat e huaja dhe prirjet e politikës populiste.

Ajo është Kryeredaktore e revistës shkencore të Fakultetit, POLIS, anëtare e Senatit akademik të UET, si dhe anëtare e redaksisë për Komunikimin dhe Mediat pranë Akademisë së Shkencave të Shqipërisë, për proektin e Enciklopedinë Shqiptare.

Prof. Budini është autore dhe bashkautore e disa librave dhe teksteve universitare me ndikim, përfshirë:

• From Isolation to Integration (UET Press & Ombra GVG, 2025)
• The Emergence of Aesthetic Politics in Albania (LR, Paris, 2024)
• Public Relations Today (Palgrave & UET Press, 2023)
• Introduction to Communication (Oxford University Press & UET Press, 2023)
• Influencers (UET Press, 2019; fituese e çmimit kombëtar “At Zef Pllumi”)
• First Look at Communication Theory (McGraw-Hill Education dhe Qendra Arsimore Shqiptare, 2015)
• Albania in Time Magazine, 1923–2013 (UET Press, 2014)
• The Pop-Star Politician: A Case Study Monograph (UET Press, 2009)

Punimet e saj shkencore janë botuar në revista shkencore të indeksuara dhe me recenca ndërkombëtare, ndërsa përvoja e saj editoriale dhe gazetareske përfshin kontribute në mediat kryesore shqiptare si Shekulli dhe Panorama.

Projektet e saj më të fundit, si ekspozita digjitale “Media-Arts and Pop-Politics” (Galeria e Artit Tiranë, 2024) dhe dokumentarët televizivë në Top Channel, ilustrojnë qasjen e saj ndërdisiplinore që lidh median, gazetarinë digjitale dhe komunikimin politik.

Njohëse e gjuhëve të huaja si anglisht, frëngjisht dhe italisht, Prof. Budini vijon të kontribuojë aktivisht në dialogun kulturor, akademik, dhe politik ndërkombëtar, duke sjellë një kontribut të rëndësishëm në debatet mbi median, demokracinë dhe integrimin europian në Shqipëri dhe më gjerë.