Erasmus +, studentët nga Franca, Spanja e Suedia do të studiojnë një semestër në UET
Nisja e semestrit të dytë i gjeti tetë studentë të huaj në auditorët e Universitetit Europian të Tiranës. Të ardhur nga Spanja, Italia, Franca, Suedia, Portugalia dhe Slovakia, ata do të zhvillojnë një semestër në UET, në programet e studimit Shkenca Politike e Juridike, Ekonomi dhe Shkenca Mjekësore. Të rinjtë u pritën në takim nga rektorja e UET, prof. dr. Drita Kruja dhe përgjegjëset e dy departamenteve: dr. Anjeza Xhaferaj, përgjegjëse e Departamentit të Shkencave Sociale të Aplikuara dhe prof. asoc. dr. Dorina Dervishi, përgjegjëse e Departamentit të Infermierisë dhe Fizioterapisë.
Duke u uruar sa më shumë suksese në këtë rrugëtim akademik dhe një kohë qëndrimi sa më të bukur në Shqipëri, rektorja Kruja bëri një prezantim të shkurtër të historikut të UET, të fakulteteve dhe të programeve të studimit që ai ofron. Duke mos lënë jashtë përpjekjet dhe hapat që janë hedhur në sferën e ndërkombëtarizimit, të cilët e kanë kthyer në një universitet referencë për studentët e huaj, Kruja tha se UET i kushton rëndësi të madhe literaturës së përditësuar, kombinimit të praktikës me teorinë dhe afrimit me tregun e punës.
Gjatë fjalës së tyre, përgjegjëset e departamenteve u fokusuan në procesin mësimor, mënyrën se si procedohet me oraret dhe lëndë të caktuara që kanë brenda tyre elementin praktikë. U fol gjithashtu për aktivitetet ekstrakurrikulare, klubet studentore, aktivitetet sportive, duke ngjallur kështu interesin e menjëhershëm të studentëve për të qenë pjesë e tyre.
Të shoqëruar nga Megi Disha, drejtuesja e marrëdhënieve ndërkombëtare pranë Zyrës për Zhvillimin dhe Ndërkombëtarizim e Projekteve, UET, studentët zhvilluan një tur në ambientet e universitetit. Panë auditorët ku do të zhvillojnë mësim, laboratorët, bibliotekën, sallat e aktivitetëve, auditorët e arteve, etj.
Ndërsa këta studentë vijnë nga ambiente të tilla akademike si: Tuscia University (Itali); Chieti University (Itali); University of Rouen (Francë); University of Almeria (Spanjë); Uppsala University (Suedi); Beira Interior (Portugali); Comenius University in Bratislava (Slovaki), shumë studentë të UET kanë kanë shkuar në këto universitete për të zhvilluar aty semsestrin e dytë të vitit akademik 2024-2025, e për të pasur një eksperiencë të re në këta auditorë.
Ndër hapat e parë të procesit të ndërkombëtarizimit të UET, ishte bëra pjesë e programit të Bashkimit Europian Erasmus +. Për një dekadë, qindra studentë dhe dhjetëra individë të stafit akademik e administrativ, kanë zhvilluar studime apo trajnime në universitetet europiane, përmes të cilavë janë pajisur me praktika dhe njohuri të reja profesionale, kulturore e sociale.
