Zyra e Këshillimit dhe Kujdesit ndaj Studentit në UET, vendi i parë që prezanton maturantët “me të ardhmen”

Ka një ambient në Universitetin Europian të Tiranës në të cilin ka kaluar së paku njëherë çdo student. Është kontakti, biseda dhe përshtypja e parë, e njëkohësisht asistenca e përhershme. E gjen gjithmonë të hapur, pavarësisht orarit të ditës, fluksit të punës, çështjes së komplikuar apo proceseve të ngarkuara.

Edhe këto ditë të nxehta vere Zyra e Këshillimit të Karrierës dhe Kujdesit ndaj Studentit është në detyrë e sipër duke iu përgjigjur telefonatave, duke pritur interesimet, dukë dhënë udhëzimet apo informacionet e kërkuara, por edhe këshillimet dhe orientimet aq të domosdoshme për çdo maturant, i cili është në dilemat e nisjes së një rrugëtimi që do të diktojë të ardhmen e tij.

Përveçse me një ambient ftues dhe vital, kjo zyrë ka një staf me mjaft eksperiencë, i cili punon prej vitesh me maturantët dhe e njeh më së miri rrugëtimin që ai duhet të ndjekë, kriteret që duhet të plotësojë, që asiston në kompletimin e dokumenteve për regjistrim apo për të fituar bursë, por edhe e orienton drejt programeve që ofrojnë mundësi zhvillimi, e mbi të gjitha që përshtaten me prirjet e tyre.

Puna e stafit është e vazhdueshme gjatë gjithë vitit akademik, duke u bërë më intensive në periudhën e regjistrimeve. Përfaqësuesit e kësaj zyre janë të pranishëm në aktivitete të ndryshme, si gjimnaz tour, panairet e punës, apo aktivitete të tjera brenda dhe jashtë universitetit që kanë të bëjnë me studentët e ardhshëm të UET.

Drejtuesi i kësaj zyre, Dr. Sokol Ndoka, thotë se këshilluesit e karrierës iu japin maturantëve orientim të qartë në lidhje me programet që duan të studiojnë, si dhe i prezantojnë me mundësitë që iu ofrohen nga universiteti në tregun e punës, nga praktikat e deri te punësimi.

“UET ka marrëveshje bashkëpunimi me më shumë se 250 kompani të rëndësishme në vend, të cilat, gjatë takimeve HR Club apo Bordeve të Punës, japin kontributin e tyre në përmirësimin dhe zhvillimin e mëtejshëm të kurrikulës, si dhe iu krijojnë hapësira internshipi dhe punësimi studentëve tanë”, thekson Ndoka.

Të qenit student në UET do të thotë se je i  “ekspozuar” jo vetëm nga përvoja e çmuar e sjellë në auditorë nga pedagogë, tashmë të afirmuar në akademi, por edhe nga personalitete, figura publike, drejtues e sipërmarrës që frymëzojnë dhe nxisin ide të reja. Je, gjithashtu, pjesë e kompeticioneve, startup-ve, projekteve që zhvillohen në auditorë në rang departamenti apo fakulteti, si dhe mobiliteteve që të japin eksperienca të reja studimi.

Një mundësi mjaft e vyer janë shkëmbimet Erasmus+, ku studentët mund të vazhdojnë një semester jashtë Shqipërisë, në disa  prej universiteteve më të njohura europiane, në Francë, Holandë, Suedi, Itali, Gjermani etj. Gjatë disa muajve ata marrin dije në auditorët ndërkombëtarë, njihen me kultura të tjera, zgjerojnë rrjetin e tyre të miqësisë dhe krijojnë kujtime të paharrueshme.

Një tjetër element mjaft domethënës i Universitetit Europian të Tiranës është mbështetja financiare përmes bursave të studimit, një iniciativë e hershme, e cila ka ruajtur traditën e vet dhe ka krijuar një komunitet në rritje të studentëve ekselentë.

“UET favorizon të rinjtë të cilët kanë një mesatare të lartë, duke ofruar bursa ekselence. Një maturant që ka mesatare 9- 9.5 përfiton gjysmë burse, ndërsa ai me mesatare 9.51-10 përfiton bursë të plotë. UET ofron edhe bursat e talentit për maturantët që kanë një talent në fushën e arteve”, sqaron drejtuesi i Zyrës së Këshillimit dhe Kujdesit ndaj Studentit.

Prej 29 korrikut ka nisur raundi i parë i aplikimit online, i cili konsiston në hedhjen e 10 preferencave dhe universiteteve përkatëse në portalin U-Albania. Ky proces përmbyllet brenda gjashtë ditëve, pra deri më 3 gusht, dhe në fund të këtij muaji nis publikimi i renditjes së programeve dhe universiteteve që ka fituar çdo maturant, duke pasuar me procesin e regjistrimit.

Shumë prej të rinjve tashmë e kanë bërë zgjedhjen duke rezervuar vendin e tyre në një nga programet e Universitetit Europian të Tiranës. Ndoka thotë se 40% e kuotave janë të zëna nga maturantët, të cilët janë interesuar gjatë vitit dhe kanë zgjedhur programin e tyre të studimit.

Të gjithë ata që ende nuk kanë marrë një vendim, ai i fton pranë Zyrës së Këshillimit dhe Kujdesit ndaj Studentit, që të marrin informacionin dhe këshillimin e duhur, si dhe suportin për plotësimin e aplikimit online.