FIIA organizon HR Club 2026: Zbehet frika për zëvendësimin nga IA, sfida të reja për studentët

Zëvendësimi nga Inteligjenca Artificiale nuk është më ai skenari i frikshëm i paralajmëruar vitet e fundit. Studimet nga organizata të mëdha botërore tregojnë se, pavarësisht zbehjes së kësaj frike, në tregun e punës kanë lindur sfida të tjera. Të punësuarit po përshtaten me dinamikat që ka krijuar Inteligjenca Artificiale, ndërsa është krijuar nevoja të zhvillojnë aftësi të tjera për t’iu përgjigjur nevojave të reja të tregut të punës. I njëjti realitet vihet re në praktikën shqiptare, edhe pse nuk ka ende të dhëna zyrtare dhe studime të mirëfillta se si IA ndikon në tregun tonë.

Gjatë një bashkëbisedimi me drejtueset e Departamenteve të Burimeve Njerëzore dhe përfaqësueset e kompanive kryesore në sektorin e teknologjisë dhe inxhinierisë, dekania e Fakultetit të Inxhinierisë, Informatikës dhe Arkitekturës, Prof. Asoc. Dr. Teuta Xhindi, tha se të dhënat tregojnë që Inteligjenca Artificiale është bërë pjesë e kompanive më të mëdha shqiptare në sektorin financiar dhe bankar, ndërkohë që kompanitë e vogla janë më pak të avancuara në këtë aspekt.

“Nga të dhënat e deritanishme, nuk kemi largime masive nga puna, por ajo që vërej është mungesa e debateve. Mungojnë programet, diskutimet në lidhje me atë jo vetëm se çfarë po ndodh, por edhe se çfarë pritet të ndodhë në vitet e ardhshme”, theksoi Prof. Xhindi.

Takimi i HR Club 2026 është një ngjarje e përvitshme dhe një traditë e kahershme e Universitetit Europian të Tiranës, ku secili fakultet mbledh në auditor kompanitë dhe institucionet partnere për të diskutuar mbi trendet dhe kërkesat e reja të tregut të punës, të cilat diktojnë nevojën për të futur programe dhe profile të reja studimi, e njëkohësisht diktojnë nevojën për mësimin e aftësive të reja në auditor.

Ky takim i Fakultetit të Inxhinierisë, Informatikës dhe Arkitekturës mblodhi drejtueset e Departamentit të Burimeve Njerëzore nga kompanitë Dev.al, Smartwork, Orion sh.p.k, Electronic Solution Albania, Easy Pay, Balfin Group, Duapunë.com, Ritech Solution, Flutter Albania, etj.

“Takimet me ju i quaj të domosdoshme për akademinë, sepse nëpërmjet jush ne kuptojmë se çfarë duhet të bëjmë, çfarë duhet të ndryshojmë, çfarë ndodh sot me tregun e punës, cilat janë ato aftësi, përveç atyre teknologjike, që ne t’i reflektojmë në programet, silabuset dhe punën tonë të përditshme”, nënvizoi Xhindi.

Takimi vijoi me prezantimin e punimit me temë “Nga universiteti në tregun e punës në epokën e IA. A po zhvillojmë aftësitë e duhura?”, nga ish-studentja e UET, sot lektore në auditorët e tij, Albina Hoxha, e cila solli studimet dhe analizat më të fundit në tregun ndërkombëtar sa i përket mënyrës se si po përdoret Inteligjenca Artificiale dhe efektit që ka sjellë ajo në tregun e punës.

Sipas studimeve të PWC, IA nuk po ndryshon vetëm profesionet, po ndryshon mënyrën se si vlerësohet puna. Dhe sipas barometrit të tyre të vitit 2026, 69% e punëve kërkojnë aftësi të reja në këtë fushë. Hoxha tha se IA ka krijuar punë të profesionalizuara, duke fuqizuar ekspertët, dhe punë të demokratizuara, duke u dhënë mundësinë shumë punonjësve të bëjnë punë që dikur kërkonin ekspertizë.

“Vlera nuk është vetëm te aftësia për të kryer një detyrë, por edhe te aftësia për të përdorur teknologjinë dhe për të zgjidhur një problem”, shtoi ajo.

Anketa e KPMG-së (organizatë globale e firmave të pavarura të shërbimeve profesionale), dedikuar Gen Z, zbuloi se 94% e të anketuarve presin që IA të automatizojë ose përmirësojë mbi 20% të rolit të tyre të ardhshëm dhe 88% besojnë se brezi i tyre është përpara në përdorimin efektiv të IA-së. Sipas tyre, të menduarit kritik do të mbetet aftësia që ka më shumë gjasa të dallojë punonjësit e nivelit fillestar gjatë pesë viteve të ardhshme.

Pedagogia MSc. Amanda Kote prezantoi më tej projektin Jean Monnet, të mbështetur financiarisht nga Bashkimi Europian, për “Green Transition Engineering Education in Digital Skills”, duke shpjeguar synimet e zbatimit të këtij projekti, impaktin dhe aftësitë që do të sjellë te studentët.

Të pranishmit ndanë më tej përvojat e tyre me studentët e sapodiplomuar si dhe iu përgjigjën disa nga pyetjeve kryesore që bëhen nga studentët: se cilat janë ato role që po ndryshojnë, çfarë kërkojnë nga një i sapodiplomuar për ta bërë pjesë të kompanive të tyre, sa i rëndësishëm është përdorimi i IA-së dhe, mbi të gjitha, cilat janë ato aftësi të domosdoshme për një të diplomuar në epokën e Inteligjencës Artificiale. Pavarësisht kësaj, të gjithë ranë dakord se dëshira dhe këmbëngulja për të punuar dhe mësuar më tej, mbeten thelbësore për të vlerësuar dikë si potencial. 

FIIA është fakulteti me numrin më të madh të studentëve të regjistruar dhe këtë vit akademik ka futur dy mastera të rinj shkencorë: një në Cloud and AI Computing dhe, i dyti, në Inxhinieri Elektrike. Po ashtu, nën kujdesin e këtij fakulteti, për herë të parë në Ballkan është futur programi dyvjeçar në fushën e aviacionit, Aircraft Maintenance Technician (AMT).