Harvardi flet shqip, studentët dhe pedagogët e universitetit amerikan vijnë në UET

Rruga drejt Harvardit dhe universiteteve amerikane nuk është e pamundur. Ndjekja e studimeve në koordinim me pedagogët e universitetit amerikan kërkon vetëm dëshirë dhe vullnet. Në kohën që jetojmë, studentët e kanë të gjithë informacionin e duhur në dorë.

“Sot keni kontaktet, keni informacionin, keni njerëzit që kanë kaluar këtë proces dhe janë aty që t’ju asistojnë”, u shpreh Faton Limani. Ai është administratori i Departamentit të Letërsisë së Krahasuar në Harvard. Ky mesazh u dha në nisje të workshop-it me studentët dhe maturantët e gjimnazeve të Tiranës.

Z. Limani është pjesë e Harvardit prej vitit 2022 si lektor i kursit të gjuhës shqipe. Ai ishte i ftuar nga Fakulteti i Shkencave Humane dhe Edukimit Liberal në Universitetin Europian të Tiranës (UET). Në këtë takim ai shoqërohej nga një grup studentësh amerikanë dhe shqiptaro-amerikanë.

Ata ndanë përvojat e tyre me mësimin e gjuhës shqipe dhe arsyet pse zgjodhën këtë kurs. Disa u motivuan nga dëshira e familjeve për të ruajtur traditën, ndërsa të tjerë nga kureshtja për këtë gjuhë të veçantë indoevropiane. Po ashtu, studentët folën për eksperiencën e tyre në SHBA, programet e studimit dhe mbështetjen nga mentorët.

Bashkëpunimi UET dhe Harvard përmes programit READ

Dekania e Fakultetit të Shkencave Humane, Edukimit dhe Arteve Liberale, Prof. Dr. Belina Budini, e cilësoi këtë si një takim mjaft të veçantë. Ky takim thellon bashkëpunimin mes dy institucioneve në kuadër të nismave si programi READ. Ky projekt vjen në bashkëpunim me Albanian-American Development Foundation (AADF).

“Kemi një projekt për të përfshirë pjesën e diasporës. Ky projekt i ri me AADF synon të sjellë në universitetet shqiptare ekspertizën e akademikëve të diasporës”, theksoi dekania Budini.

Ajo shtoi se marrëdhënia e Harvardit me shqiptarët daton që në shekullin e kaluar. Emra të spikatur si Fan Noli e Kosta Çekrezi hodhën hapat e parë. Sot një brez i ri akademikësh shqiptarë po ndërton karrierën në këtë universitet.

Një shembull është Albana Shehaj, një tjetër pedagoge që bashkëpunon për projektin READ në fushën e mediave digjitale. Edhe profesori Limani ka qenë i ftuar si lektor në UET për të dhënë një modul mbi lidershipin në lëndën “Komunikimi Organizativ”.

Sa studentë shqiptarë studiojnë në universitetet amerikane?

Në fjalën e tij, z. Limani e cilësoi një nder të veçantë punën për të ecur në rrugën e shtruar nga paraardhësit. “Kam dëshirë që të kemi sa më shumë shqiptarë aty. Duhet të vazhdojmë të ngremë në nivel më të lartë prezencën dhe kulturën tonë,” tha ai.

Aktualisht, në ciklin bachelor në Harvard studiojnë 13 studentë shqiptarë, përveç atyre në programet master dhe doktoraturë.

Ky institucion ofron mundësi të mëdha, si programet fellowship për studentët. Nga ana tjetër, Harvard College Albanian Students Association është një urë lidhëse ku të rinjtë mund të bashkëpunojnë drejtpërdrejt.

Synimi i radhës: Katedra e Studimeve Shqiptare në SHBA

Pas futjes së kursit të gjuhës shqipe, objektivi i radhës është krijimi i një katedre për studimet shqiptare. Ky projekt do të angazhojë pedagogë dhe studiues të përqendruar në kërkimin shkencor mbi çështjet shqiptare.

“E kam mision personal dhe dua të ndihmoj çdo shqiptar që ka vërtet dëshirë dhe vullnet për të hyrë në një program të universitetit amerikan“, theksoi Limani. Ai tregoi se i lidh vazhdimisht të rinjtë shqiptarë me studentët aktualë në SHBA për t’i ndihmuar me procesin e aplikimit.

Në përfundim, ai i inkurajoi të rinjtë të mos heqin dorë nga ëndrrat e tyre. Edhe pse konkurrenca është e fortë, një aplikim i përgatitur me kujdes rrit ndjeshëm mundësitë e pranimit. Filozofia e tyre përfshin mbështetjen e studentëve të talentuar nga vendet në zhvillim, si rajoni i Ballkanit.

Biseda me pedagogët vijoi më tej në studion e podcast-it të universitetit, UET Cast, ku ata u intervistuan nga një studente dhe një maturante.