Department’s Book Review në UET/ Haxhiu: Mahmut Bakalli do t’i shkëmbente territoret, bashkimin e duan politikanët

Gazetarët dhe publicisët e njohur, Baton Haxhiu e Andi Bushati promovuan librin më të ri të shtëpisë botuese UET Press,“Mahmut Bakalli, historia e njeriut të Kosovës”. Haxhiu e përshkruan figurën e Bakallit, si atë të një politikani modern dhe që nuk ka pasur kurrë komplekse. Një politikan me shije dhe që identifikohet nga forca e gjuhës dhe e dijes.

Gjuha, moderniteti dhe shija janë tre elemete identifikues që e bëjnë Mahmut Bakallin një politikan modern. Kështu do të shprehej publicisti dhe gazetari Baton Haxhiu në promovimin e librit “Mahmut Bakalli, historia e njeriut të Kosovës”.

Haxhiu e përshkruan figurën e e Mahmut Bakallit, si të një politikani modern dhe pa komplekse, jo vetëm brenda Kosovës, por edhe Jugosllavisë.

Shkruar nga pena e dy mjeshtrave të publicistikës, Baton Haxhiu dhe Andi Bushati, libri është pjesë e kolanës “Scripta Manent” të botimeve UET Press, që synon të investojë në mjedisin shqiptar, ruajtjen e kujtesës kolektive.

Është botimi i parë që është shkruar për një figurë, të heshtur dhe logjike, siç do ta quante Haxhiu, edhe pse Bakalli njihet si njëri prej bashkëpuntorëve më të ngushtë kosovarë, të ish-presidentit të Jugosllavisë, Josip Broz Tito.

Po ashtu, njihet edhe si dëshmitari i parë në procesin kundër Sllobodan Millosheviqit, i cili në Tribunalin e Hagës akuzohej për krime lufte në Kosovë dhe Kroaci dhe për gjenocid në Bosnje-Hercegovinë.

“Është nga të paktët që nuk është kritikuar për historinë apo për të kaluarën e tij, ndoshta merita e tij dhe kontributi i tij më pas për Kosovën ka qenë kaq i madh sa ka minuar edhe pjesën e historisë së tij politike të mëparshme. Në Shqipëri dhe Kosovë në historinë politike, personazhet i kategorizojmë ose tradhëtarë ose patriotë”, tha Përgjegjësi i Departamentit të Shkencave Sociale të Aplikuara, Ervis Iljazaj.

Ndërsa, Baton Haxhiu rrëfeu se me të është njohur që në vitin 1989 dhe ka qenë një dëgjues i rregullt gjatë takimeve të çdo nate me të.

“Nga bisedat me Mahmut Bakallin kam kuptuar se, liria nuk e ka kufirin e asaj që shkruhet në letra apo në dokumenta, por është gjithmonë e pëkufizuar me të panjohurat e saj”, u shpreh Haxhiu në Department’s Book Review në UET.

Me një profil sa politik aq edhe historik, libri është realizuar nëpërmjet dokumentave të ndryshëm të marrë nga Arkiva e Shtetit dhe nga arkiva personale të politikanit, Mahmut Bakalli.

“Nga 22 mijë faqe kemi nxjerrë ato që përbëjnë rrëfimin për shqiptarët dhe komunizimin, për lirinë, për idenë e të jetuarit mes Beogradit dhe Tiranës dhe çfarë e ka mbajtur gjallë identitetin”, tregoi publicisti.

Promovimi i librit kushtuar historisë së një prej politikanëve më të njohur dhe një prej pikave të referimit, që kanë bërë historinë me mendimin dhe aktivitetin e tyre politik solli edhe njëherë në vëmendje tema të “nxehta”, si ajo e bashkimit Kosovë-Shqipëri, apo shkëmbimit të territoreve më Serbinë.

Për bashkëautorin e librit,“Mahmut Bakalli, historia e njeriut të Kosovës”, ai që dikur ka qenë një idealizëm i shqiptarëve të Kosovës, sot nuk ekziston më, dhe ka mbetur vetëm një dëshirë e forcave politike.

“Askush nuk është për bashkim. Kosova e ka dashur pa kusht Shqipërinë dhe e ka idealizuar. Por nuk mund të bëhet një bashkim mekanik pa u pjekur kushtet. Sepse kur ky idealizim kur ballafaqohet me realitetin krijon konfuzion. As shqiptarët, as kosovarët nuk e duan bashkimin. Të vetimet që e duan janë forcat politike.”

Ndërsa sa i përket shkëmbimit të territoreve me Serbinë e quajti të pamundur, pasi kjo e fundit nuk ka ndonjë interes ekonomik ndaj Kosovës.

E po të bëhej fjalë për Mahmut Bakallin, e pranon se “po”.

“Më lejoni të bëj një parantezë. Do ta bënte pasi është një nga politikanët pragmatik dhe e dinte se cila do të ishte fuqia e Serbisë dhe e shtetit të përbashkët, pasi realisht Kosova i fiton 30 mijë kilometra katrorë nga shteti shqiptar, sepse në momentin kur hiqet kufiri, liria pastaj nuk është brenda dhjetë mijë kilometrave katrorë, por 40 mijë kilometra katrore dhe nuk ka më liri të kufizuar”, tha Haxhiu.