Sipërmarrës në fushën e inxhinierisë, Albert Zogo: Shifrat flasin, por partneritetet janë çelësi i suksesit

E ndërsa marketohen gjithnjë e më tepër startup-et, inteligjenca artificiale dhe sipërmarrja në sektorët e rinj, mbeten pak në hije ata që janë më të hershëm. Edhe pse të tillë, koha tregon se ata janë të pakohë dhe tregu gjithmonë do t’i kërkojë sektorë të caktuar, pavarësisht transformimit që u duhet të pësojnë në vetvete. Leksioni i hapur në Universitetin Europian të Tiranës solli modelin e suksesit të një sipërmarrësi në fushën e inxhinierisë. Albert Zogo është CEO i Alstezo, një kompani që operon në tregun shqiptar prej më shumë se 30 vjetësh, në sektorin e automobilave dhe distribucionit të pjesëve të këmbimit.

Dekania e Fakultetit të Inxhinierisë, Informatikës dhe Arkitekturës, Prof. Asoc. Dr. Teuta Xhindi, tha se është mjaft e rëndësishme që studentët të mos mbeten pas në anën praktike të profesionit të tyre, por të njohin dhe të prekin gjatë kohës së studimeve kompanitë, bizneset që operojnë në fushën e tyre të studimit. Nga ana tjetër, ajo e cilësoi Alstezo dhe Zogon një model suksesi, prej të cilit studentët mund të mësojnë, të frymëzohen dhe pse jo, në një të nesërme jo të largët, të jenë pikërisht sipërmarrësit e rinj të sektorit të inxhinierisë.

Albert Zogo tregoi se aktiviteti i tij nisi në vitin 1993, pasi kishte shkuar, si shumë shqiptarë, në Greqi si emigrant dhe filloi tregtinë në pjesët e këmbimit të automjeteve. Por transformimin e vërtetë biznesi i tij do ta shihte pas vitit 1998, kur ai mori pjesë në një panair në Frankfurt, prej nga mori edhe indicien për të nisur partneritetet e para. Sot kompania bashkëpunon dhe është ekskluzive për kompani të njohura amerikane, angleze apo gjermane. Zogo tha se ato nuk janë vetëm bashkëpunëtorë, prej nga marrin pajisjet dhe mjetet e teknologjisë së fundit, por janë certifikues të sigurisë dhe standardeve që Alstezo ka sjellë në tregun shqiptar dhe ruan me besnikëri ndër vite.

“Ne punojmë dhe jemi ekskluziv sot për rreth 20 kompani të huaja nga Evropa dhe Amerika. Shifrat janë numra dhe ato flasin, por ama ajo që është e vlerësuar më shumë në biznesin tonë është partneriteti që kemi me komunitetet e huaja”, theksoi.

Përveç partneriteteve, një tjetër pikë të rëndësishme ai theksoi profesionalizmin e burimeve njerëzore, të inxhinierëve të formuar jashtë vendit, të cilët kanë ndërtuar karrierën e tyre në këtë kompani. Më tej, ai inkurajoi studentët të vizitojnë ambientet e kompanisë, në Fier apo Tiranë, të njihen nga afër dhe të shikojnë të gjitha proceset që kryhen, dhe pse jo, të marrin guximin të provojnë veten e tyre duke nisur një rrugëtim të ri profesional.

Aktualisht, kompania ka dy lokacione, në Tiranë dhe në Fier, të pajisura me punishte mekanike moderne dhe punishte karrocerie të teknologjisë së fundit,  të cilat ofrojnë shërbime dhe riparime të të gjitha llojeve të automjeteve, si dhe tregti pjesësh këmbimi.

Në fund të leksionit të hapur, dekania Xhindi dhe CEO i Alstezo firmosën një marrëveshje bashkëpunimi, e cila hap rrugën e shkëmbimeve të akademisë me biznesin, të zhvillimit të praktikave pranë kësaj kompanie dhe punësimit të studentëve. Zogo pranoi se partneritete të tilla janë mëse të nevojshme, pasi gjetja e njerëzve të përgatitur, që kanë aftësitë e duhura dhe përshtaten me ndryshimet që pëson tregu, mbetet një sfidë e vazhdueshme.