Universiteti Europian i Tiranës, institucioni që do të trajnojë ndërmjetësit e pasurive të paluajtshme në Shqipëri
Ministria e Drejtësisë ka përzgjedhur Universitetin Europian të Tiranës si institucionin që do të trajnojë kandidatët për ndërmjetës të pasurive të paluajtshme. Sipas urdhrit nr. 214 të datës 22 prill 2024 nga ministri Ulsi Manja, UET është institucioni i ri që do të realizojë programin e detyrueshëm trajnues për të certifikuar profesionistët e pasurive të paluajtshme.
Ky sektor ka marrë hov vitet e fundit në Shqipëri, jo vetëm për shkak të rritjes së kërkesës dhe ofertës nga shqiptarët, por edhe me ardhjen e organizatave e bizneseve të huaja, zhvillimin e turizmit etj. Shumë prej të huajve nga Ballkani dhe Europa, jo vetëm po frekuentojnë vendin tonë në sezonin turistik, por ata janë kthyer në blerës potencial të pasurive të paluajtshme në qytete të ndryshme e sidomos ato bregdetare.
Për këtë arsye, lind nevoja që të gjithë ata që ofrojnë shërbimin në këtë fushë, të kenë specializimin e duhur, me njohuritë e domosdoshme në pjesën e ndërtimit, të legjislacionit, por edhe të komunikimit dhe sjelljes me klientët. Ky certifikim synon të shërbejë si një rregullator i tregut imobiliar, për të kaluar në filtër ata që kanë të drejtë dhe janë të aftë të ushtrojnë profesionin e tyre në gjithë këtë masivizm të përhapjes dhe shtimit të ekspertëve dhe agjensive imobiliare.
Rregullimi i profesionit të ndërmjetësit të pasurive të paluajtshme është bërë në ligjin nr. 9/2022, ku përcaktohen të gjithë termat për ushtrimin e këtij profesioni, ndërsa kandidatët kanë detyrim ligjor që të zhvillojnë trajnimin, sipas të gjitha rregullave të caktuara nga institucioni mbikëqyrës.
Në ligj është parashikuar se kandidatët për ndërmjetës do të ndjekin një program të detyrueshëm trajnimi, për një kohëzgjatje prej jo më pak se 60 orësh, që ka si qëllim aftësimin e tyre me njohuritë e duhura profesionale për ushtrimin e veprimtarisë e veçanërisht për të raportuar transaksionet e dyshimta me pasuritë e paluajtshme, të cilat mund të kenë si qëllim realizimin e pastrimit të parave ose financimin e terrorizmit, sipas legjislacionit përkatës në fuqi.
Programi i detyrueshëm i trajnimit fokusohet në zhvillimin e kompetencave profesionale të kandidatëve për ndërmjetës të pasurive të paluajtshme, aftësive praktike, si dhe vlerat etike të tyre.
Më datë 23 nëntor 2022, Ministri i Drejtësisë ka nxjerrë urdhrin nr. 619, “Për përzgjedhjen e institucioneve trajnuese për realizimin e programit të detyrueshëm të trajnimit për kandidatët për ndërmjetës të pasurive të paluajtshme”. Në shtesën e fundit të bërë në këtë urdhër, janë ngarkuar tre institucione të arsimit të lartë në Shqipëri për të zhvilluar trajnimin e ndërmjtësit të pasurive të paluajtshme.
Universiteti Europian i Tiranës, Universiteti Mesdhetar i Shqipërisë dhe Kolegji Universitari Biznesit do të zhvillojnë trajnimin sipas programeve tematike të miratura, të cilat do të publikohen në faqen zyrtare të institucionit dhe Ministrisë së Drejtësisë.
