UET, marrëveshje për kërkimin dhe projektet me universitetin amerikan
Pas bashkëpunimeve me universitet në Shqipëri dhe Kosovë, Universiteti Europian i Tiranës kapërcen kufijtë kombëtarë, duke hedhur themelet e bashkëpunimeve universitare ndërkombëtare.
Ditën e hënë, më 26 prill, UET ka nënshkruar një marrëveshje bashkëpunimi me universitetin amerikan, Roger Williams University (RWU). Nënshkrimi u realizua mes drejtuesve përkatës, Rektorit të UET, Prof. Dr. Tonin Gjuraj dhe Presidentit të RWU, Ioannis N. Miaoulis.
Fokusi i kësaj marrëveshje, ashtu si edhe ato që janë nënshkruar deri tani, është bashkëpunimi në fushat e edukimit, mësimdhënies, kërkimit dhe zhvillimit të projekteve. Potenciali i bashkëpunimit midis palëve përfshin kërkime të përbashkëta shkencore, module të përbashkëta trajnimi, lëshimin e certifikatave të pjesëmarrjes, si dhe organizimin e aktiviteteve të përbashkëta, vizitat studimore dhe panairet e edukimit. Gjithashtu, pjesë e marrëveshjes është dërgimi i studentëve, anëtarëve të departamenteve në universitetin tjetër, për qëllime studimi, mësimi, mësimdhënie apo kërkimi.
Bashkëpunimi, i nënshkruar për një periudhë 3 vjeçare, më konkretisht përfshin: zhvillimin e programeve të përbashkëta të studimeve dhe niveleve universitare, në fushat e mëposhtme të arsimit: Drejtësi, Komunikim, Teknologji, Arkitekturë, Inxhinieri civile, Inxhinieri Industriale; shkëmbim të studiuesve dhe studentëve për qëllime akademike dhe kulturore; bashkëpunimin për aplikime në projekte të përbashkëta për të gjitha programet e financimit, bursat dhe fondacionet e tjera; bashkëpunim për aplikime të tjera për çdo financim qeveritar ose OJQ për programe, bursa et.; bashkëpunim për ribotimet dhe botimet e përbashkëta, midis ekipeve specifike të rishikimeve të përfshira nga të dy institucionet; shkëmbim i ndërsjellë i informacionit me interes të përbashkët, kryesisht lidhur me praktikat më të mira akademike, zhvillimin e projekteve dhe fushat e tjera të arsimit të lartë.
Një vështrim i shkurtër mbi RWU
Roger Williams University është një universitet privat në Rhode Island. Mban emrin e udhëheqësit të këtij shteti, i cili jetoi në shekullin e17-të dhe ia kushtoi jetën ndërgjegjësimit mbi lirinë dhe drejtësinë sociale. Filozofia e tij, që është quajtur ‘eksperimenti i tij i gjallë’, kishte si synim rritjen e shoqërive të gjalla dhe të hapura.
Universiteti RWU synon ndjekjen e përsosmërisë në arsim, arritjet akademike dhe shërbimin ndaj komunitetit, duke u fokusuar në shkëmbimin intelektual, mendimin kritik, gjithëpërfshirjen dhe inovacionin si një mjet për të përmirësuar një shoqëri të lirë.
Fillesat e këtij universiteti datojnë në vitin 1956. Me një statut shtetëror në këtë vit, Roger Uilliams Junior College u bë një institucion dy-vjeçar, i vendosur brenda YMCA në Broad Street Providence. Shumë shpejt u bë Kolegji Roger Williams dhe filloi të jepte diploma bachelor, duke tejkaluar shpejt hapësirën në ndërtesën e YMCA.
Kampusi Bristol u ndërtua në 1969 në 80 hektarë tokë buzë detit, që dikur ishte një fermë. Në vitin 1992, Kolegji Roger Williams u bë Universiteti Roger Williams dhe 50 hektarë tokë tjetër iu shtua kampusit.
Një vit më vonë, në 1993, universiteti themeloi Shkollën e Drejtësisë të Universitetit Roger Williams, shkolla e vetme juridike e Rhode Island dhe një udhëheqëse në të drejtën e interesit publik.
Në 2015, RWU hapi kampusin e tij të ri Providence në One Empire Plaza, tashmë të pozicionuar në mënyrë unike në zemër të kryeqytetit, duke pasur kështu dy kampuse, një në Bristol dhe tjetrin në Providencë.
