Takimi i parë i Rrjetit të Ekselencës në UET për 2021-2022: Jo vetëm më të mirët, por edhe më kritikët

Në UET u mbajt takimi i përvitshëm i Rrjetit të Ekselencës për Fakultetin e Ekonomisë, Biznesit dhe Zhvillimit dhe Fakultetin e Shkencave Juridike, Politike dhe Marrëdhënieve Ndërkombëtare

Universiteti Europian i Tiranës e ka kthyer tashmë në traditë Rrjetin e Ekselencës, që u mblodh dje për herë të parë, për vitin akademik 2021-2022, me më të mirët e Fakultetit të Ekonomisë, Biznesit dhe Zhvillimit dhe Fakultetit të Shkencave Juridike, Politike dhe Marrëdhënieve Ndërkombëtare.

Ky takim që mbahet çdo vit, është një mundësi për të diskutuar çështje të ndryshme brenda universitetit, apo fakultetit përkatës, dhe për të marrë një lloj feedback-u si nga ana e stafit pedagogjik, ashtu edhe nga ana e studentëve.

Që kur u themelua, UET ofronte politika të ndryshme për ekselentët, ndërsa sot janë ekselentët ata që ndjekin UET-in.

Ata patën mundësinë që në këtë takim të shprehnin kërkesat e tyre dhe të jepnin e merrnin mendime rreth asaj se, çfarë duhet bërë më mirë si nga ana e universitetit, por edhe nga ana e tyre.

Ndërkohë që stafi drejtues i inkurajoi që përveç rezultateve të larta që tashmë dihen, të bëhen edhe pjesë e organizimeve dhe aktiviteteve të UET, dhe ta përfaqësojnë atë, si “ajka” e studentëve që janë.

Një mundësi shumë e mirë, që UET ju ofron janë Klubet Studentore të të gjithë fakulteteve përkatëse, ku mund të bëhen pjesë e të ndajnë eksperienca mes tyre.

Klubet studentore janë grupe aktivitetesh që synojnë rritjen, shoqërizimin dhe afirmimin e mundshëm të studentëve në një universitet.

Përvojat e krijuara në klub i ndihmojnë studentët të kenë sukses të mëtejshëm edhe jashtë ambientit universitar.

Këto aktivitete ekstrakurrikulare, që drejtohen nga një koordinator, por edhe nga një mentor, ekspert i fushës përkatëse, janë jo vetëm një mundësi për të krijuar njohje, por mund të cilësohen dhe si paradhoma e karrierës profesionale.

Debati publik vjen në arenën universitare nëpërmjet Forumeve të UET, ku studentët mund të marrin pjesë dhe të jenë aktivë në një debat të hapur me pedagogë dhe figura me rëndësi në jetën publike, politike, kulturore të vendin dhe Rajonit.

Drejtori i Komunikimit në UET, Edi Vlusha i inkurajoi studentët që të krijojnë vetë aktivitete, që synojnë krijimin e kontakteve me studentë që janë në programe të tjera studimi, por që kanë qëllime dhe interesa të përbashkëta.

“Ju jeni studentët cilësore, por ajo që ne kërkojmë është që të jeni studentët më kritikët tanët. Më kërkuesit tanët. Ajo që kërkoj unë prej jush është të merrni iniciativa për të zhvilluar vetë aktivitete. Të qënit ekselentë duhet të jetë përtej notës dhe diplomës, duhet të angazhoheni dhe të jeni sa më kritikë ndaj nesh”, u shpreh Vlusha.

Ai solli edhe një shembull konkret dhe mjaft interesant, për të ilustruar se nuk duhet vetëm të jesh, por edhe të spikasësh si një student ekselent.

Agi Haxhimurati i cili sot është një nga dizajnerët më të mirë shqiptarë, i cili është ndërkombëtar tashmë, e ka gjetur punën e parë në vit të dytë duke bërë vetëm një pyetje. Ka bërë një pyetje dhe i kanë thënë hajde të takohemi pas aktivitetit për të folur për një mundësi pune. Ua ka treguar studentëve të UET këtë në një Master Class, kur ishte i ftuar”, iu tregoi Edi Vlusha studentëve.

Sipas tij, pjesmarrja nëpër këto aktivitete që UET zhvillon është shumë e rëndësishme, prandaj dhe ai studentët ekselentë që të shpërfaqin veten dhe dijet e tyre në Forumet e UET, por edhe në aktivitete të tjera me rëndësi për të ardhmen e tyre profesionale.

Me kalimin e viteve akademike, teksa shtohet eksperienca, kualifikimi dhe pasurohet arkiva e institucionit, shtohen edhe studentët, e mbi të gjitha studentët ekslentë, duke e bërë kështu Rrjetin e Ekselencës një element vlerësimi për Universitetin Europian të Tiranës.

Studentët ekselentë do të kenë mundësinë që në përfundim të studimeve të marrin edhe një referencë nga ana e universitetit, si një rekomandim për në dyert, ku ata do të trokasin.