Universiteti dhe qytetet inteligjente/ UET, për herë të parë koordinator në skemën HORIZON, fiton projektin prej 2 milionë eurosh

Univeristeti Europian i Tiranës ka shënuar një arritje të rëndësishme në fushën e ndërkombëtarizimit, duke i shtuar portofolit të tij të kërkimit një tjetër projekt nga skema e Horizon Europe. Projekti i quajtur SMART-XFER kap shifrën e 2 milionë eurove dhe përfshin një konsorcium prej 17 universitetesh dhe organizatash kërkimore nga Ballkani Perëndimor dhe Evropa, më konkretisht nga Franca, Gjermania, Italia, Finlanda, Turqia, Austria, Bullgaria, Bosnje Hercegovina, Maqedonia e Veriut dhe Kosova.

Universiteti Europian i Tiranës është i vetmi institucion arsimor nga Shqipëria pjesëmarrës në këtë projekt, duke luajtur një rol thelbësor. Edhe pse nuk është hera e parë që bëhet pjesë e skemës Horizon Europë, për herë të parë UET do të jetë koordinator projekti, duke drejtuar gjithë procesin e koordinimit, zbatimit dhe sigurimit të plotë të rezultateve, në dobi të universiteteve dhe shoqërisë.

Projekti SMART-XFER – Enhancing Knowledge Valorisation Capacities in Universities and RPOs through strengthening KTO/TTO Capacities for Smart City Research Valorisation and Institutional Transformation Across Europe, ka si qëllim përmirësimin e mënyrës se si universitetet dhe institucionet apo qendrat shkencore e kthejnë kërkimin në zgjidhje reale për qytetet inteligjente.

SMART-XFER është pjesë e thirrjes HORIZON-WIDERA-2025-06-ERA-01, një grant i Bashkimit Europian i cili synon të përmirësojë mënyrën si funksionon kërkimi dhe inovacioni në Evropë, duke zbatuar politikat e European Research Area (ERA). Nga vetë emri, WIDERA- Widening Participation and Strengthening the European Research Area ka si qëllim të forcojë sistemin evropian të kërkimit dhe inovacionit dhe të zvogëlojë diferencat mes vendeve në kapacitetin shkencor.

Projekti do të fokusohet në përmirësimin e rolit të zyrave të transferimit të njohurive dhe teknologjisë, Knowledge Transfer Office (KTO) dhe Technology Transfer Office (TTO), duke i ndihmuar ato të bashkëpunojnë më ngushtë me industrinë, institucionet publike dhe qytetet. Duke mbështetur kërkimin shkencor në fushën e zhvillimit të qyteteve inteligjente, do të ndihmohet transformimi institucional i universiteteve dhe forcimi i ekosistemit evropian të inovacionit.

Objektivi primar i projektit mbetet përmirësimi dhe forcimi i kapaciteteve, shërbimeve dhe modeleve institucionale në zyrat e transferimit të njohurive dhe teknologjisë, (KTO/ TTO) të universiteteve dhe organizatave kërkimore. Janë pikërisht këto zyrë që bëjnë “ndërmjetësit” midis universiteteve dhe shoqërisë/ekonomisë si mundësues strategjikë të transferimit të njohurive në shumë palë të interesuara, përmes lançimit të startup-e nga universiteti, shfrytëzimi i patentave, bashkëpunimi me industrinë dhe bizneset në nisma konkrete dhe projekte të veçanta në funksion të përmirësimit të jetës së qytetarëve.

Përveçse të vlerësojë kapacitetet e zyrave, në ndërlidhjen kërkim-shoqëri, projekti përfshin trajnimin e drejtuesve dhe stafeve të këtyre zyrave për t’i pajisur me aftësi dhe përvojë në vëzhgimin e inovacionit, ndërmjetësimin e politikave, mjetet digjitale. Po ashtu, do të hartohen dhe zbatohen projekte pilote, për të përmirësuar shërbimet pranë zyrave KTO/TTO, do të hartohen programe dhe kurrikula të reja universitare për inovacionin dhe qytetet inteligjente. Projekti përfshin edhe ndërtimin e një Platforme të Mësimit Dixhital Smart-XFER për të siguruar akses të gjerë në të gjithë procesin e evidentimit, koordinimit, pasqyrimit dhe arritjes së rezultateve konkrete.