Praktikat profesionale/ Pago.al, kompania e radhës që ofron mundësi zhvillimi për studentët

Praktikat profesionale mbeten një element thelbësor i edukimit dhe zhvillimit profesional që në auditor. Ato i aftësojnë studentët përmes vënies në zbatim të njohurive të fituara gjatë viteve të studimit apo përvetësimit të dijeve të reja. Nga ana tjetër, praktikat profesionale janë një detyrim akademik për studentët që janë drejt përfundimit të studimeve, në ciklin bachelor apo master.

Universiteti Europian i Tiranës prej vitesh ka ndërtuar një rrjet të gjerë kontaktesh dhe bashkëpunimesh me disa prej kompanive më të mëdha në tregun shqiptar, të të gjithë sektorëve, nga ata më tradicionalë dhe të hershëm deri te kompanitë më novatore dhe startup-et.
Një kompani e tillë, Rubicon, erdhi në auditorin e UET përmes bashkëpunimit me Fakultetin e Ekonomisë, Biznesit dhe Zhvillimit, për të prezantuar për studentët, kryesisht ata që janë në vitin e tretë të studimeve, mundësitë e reja në zhvillimin e praktikave dhe më tej të punësimit.

Drejtuesja e Departamentit të Ekonomiksit dhe Financës, Dr. Elona Shehu, tha se ky fakultet numëron rreth 100 marrëveshje bashkëpunimi me aktorë të rëndësishëm në treg. Duke qenë se praktikat profesionale zgjasin 100 orë dhe shtrihen gjatë gjithë semestrit të dytë, Shehu i këshilloi studentët ta shohin jo vetëm si një detyrim akademik, por edhe si një zhvillim të mëtejshëm në karrierë.

“Praktika është kontakti i parë me tregun e punës, prandaj mos e shihni si një vend që ju merr kohën, por si një vend ku angazhoheni, krijoni emrin tuaj të mirë dhe i hapni vetes mundësinë për të mësuar më tej.” Përtej kësaj, ajo tha se praktikat janë mjaft të rëndësishme për UET-in, pasi studentët prezantojnë imazhin e universitetit, teksa demonstrojnë përgjegjshmëri, angazhim maksimal dhe ambicie për t’u rritur profesionalisht.

Igli Gjelishti, themelues dhe drejtues i Dev.al, nën ombrellën e të cilit operon Rubicon, institucion financiar i parasë elektronike, i licencuar nga Këshilli i Mbikëqyrjes pranë Bankës së Shqipërisë dhe Principal Member i Mastercard, shpjegoi më hollësisht si funksionon aplikacioni i tyre Pago, i cili zëvendëson paranë cash me atë online, një praktikë tashmë e rregulluar me ligj në vendin tonë.

Në kuadër të zgjerimit të kompanisë, Gjelishti tha se UET është institucioni i parë që përzgjodhi për të prezantuar projektin e tij, i nxitur nga një bashkëpunim i frytshëm me këtë universitet në 2021-shin, ku nga 20 aplikantë rekrutoi me kohë të plotë 6 studentë, të cilët patën një rrugëtim mjaft pozitiv dhe të kënaqshëm brenda kompanisë.

Gjelishti tha se Pago.al është mjaft novative dhe ndodhet në kulmin e zhvillimit të saj për shkak edhe të politikave nxitëse në Shqipëri, ku ligji i miratuar në dhjetor të 2025-ës nuk lejon më pagesat cash pa limit. Prej 1 janarit, qytetarët nuk lejohen të bëjnë pagesa më të larta se 500 mijë lekë në muaj, ndërsa për bizneset kjo fashë nuk e kalon 1000 euro në muaj. Ndryshe nga bankat, institucionet kryesore financiare në Shqipëri, Pago nuk është një institucion kredidhënës apo i depozitave me interes, ndërsa ofron të gjitha shërbimet e tjera.

Mundësia e praktikës profesionale është e fokusuar kryesisht në sektorin e shitjes, ku studentët duhet të prezantojnë te klientët, individë apo biznese, shërbimet e shumta të Pago.al, që nga lëshimi i kartave të debitit, kryerja e pagesave të ndryshme brenda dhe jashtë vendit, transferimi i parave etj.
“Nuk është një praktikë vetëm për të marrë një letër. Është një mundësi për të mësuar aftësi të reja që shkojnë përtej atyre profesionale dhe që keni marrë në auditor”, shpjegoi Gjelishti, duke shtuar se do të ketë edhe mundësi për punësim.

Praktika profesionale për studentët do të jetë e paguar dhe, në varësi të performancës, rezultatit të arritur, ata do të përfitojnë komisione përkatëse. Kjo nuk është vetëm një mundësi për studentët e Fakultetit të Ekonomisë, Biznesit dhe Zhvillimit, por edhe për studentët e fakulteteve të tjera, qoftë edhe ata të Inxhinierisë Informatike, për arsye se kompania qendrore Dev.al, e krijuar në 2010-ën, është gjithashtu e specializuar në krijimin e zgjidhjeve softuerike të avancuara dhe novative.