Presidenti Selami Xhepa mesazh maturantëve: UET ju mbështet të tejkaloni objektivat tuaja profesionale e jetësore
![](https://uet.edu.al/wp-content/uploads/2024/08/Capture.jpg)
I nxehti i verës po bëhet gjithmonë e më përvëlues për maturantët. Është kjo koha kur atyre iu duhet të bëjnë një zgjedhje, e cila do të diktojë rrugëtimin profesional dhe jetësor. Është sot koha që të përgatiten për të nesërmen, duke siguruar një pasaportë të vlefshme për të ardhme siç edhe e quante Malcolm X arsimin.
Gjatë datave 30 korrik- 4 gusht të diplomuarit në shkollat e mesme kaluan raundin e parë të listimit të degëve dhe universiteteve. Në raundin e dytë, i cili fillon më 30 gusht dhe vazhdon deri më 13 shtator, fituesit e raundit të parë, kryejnë regjistrimin në programin e studimit ku dëshirojnë të vazhdojnë studimet. Gjatë kësaj periudhe kandidatët për universitet kanë mundësinë të reflektojnë, rishikojnë, përforcojnë bindjet e tyre, të pranojnë mendime e zgjedhje të reja, duke dëgjuar personalitete të fushës, apo eksperienca e rrëfime.
Presidenti i UET, Prof. Asoc. Dr. Selami Xhepa e quan universitetin kohën e lirisë së jashtëzakonshme, me plot përvoja e sfida të reja sociale, përtej atyre akademike. Në një videomesazh drejtuar të rinjve, Xhepa thotë se kjo është edhe një zgjedhje e vështirë dhe e rëndësishme, ku duhet të marrin në konsideratë shumë elementë për të bërë zgjedhjen e duhur.
“Duke zgjedhur UET ne duam t’ju mbështesim të tejkaloni objektivat tuaja në nivel profesional dhe jetësor, për të shijuar si përvojën e shkëlqyer të jetës studentore në këtë universitet duke rritur njëkohësisht edhe njohuritë që ju nevojiten për karrierën tuaj të ardhshme”, shprehet Xhepa.
Profesori i njohur sjell disa faktorë që e diferencojnë Universitetin Europian të Tiranës në tregun e arsimit të lartë në Shqipëri, siç është edhe akreditimi për 5 vite nga agjencia britanike Quality Assurance Agency (QAA). Në 2022 UET u bë universiteti i parë në Shqipëri që u akreditua nga një institucion ndërkombëtar, mbi kritere rigoroze që përdoren për certifikim e universiteteve të huaja.
Kjo familje madhe thotë Xhepa ka arritur suksese të shumta ndër vite, ndërsa mbetete gjithmonë me fokus ndaj të resë, zhvillimit e përshtatjes me tregun e punës.
“Programet tona të studimit janë shumë dimensionale dhe janë hartuar për të ofruar një edukim që kombinon teorinë me praktikën bashkëkohore në mënyrë që studentët tanë të fitojnë përvoja të vlefshme e të kenë aftësi praktike që janë të kërkuara nga tregu i punës”, vijon më tej Xhepa.
Ndërkombëtarizimi është një nga objektivat kryesore të këtij institucioni në dekadën e dytë të jetës duke prevaluar me partneritetet, projektet, shkëmbimet Erasmus, dhe studentët e huaj që e zgjedhin për studime.
“UET është sot lider në partneritetet ndërkombëtare duke bashkëpunuar me shumë universitete të njohura në Europë të cilët presin studentët tanë dhe na ofrojnë bashkëpunime. Këto partneritete na sigurojnë përmirësim të vazhdueshëm duke ndjekur tendencat globale të punësimit. Falë programeve të mirë-strukturuara ne mirëpresin student nga e gjithë bota të cilët i kanë besuar UET sfidën e tyre të edukimit”, përmbyll Xhepa mesazhin e tij.