Viti akademik 2024-2025/ UET, zgjedhja e parë e maturantëve ekselentë
Shifrat dëshmojnë se Universiteti Europian i Tiranës mbetet vendi i ekselencës edhe për vitin akademik 2024-2025. 20% e kandidatëve për të studiuar në ciklin bachelor në UET, janë maturantë ekselentë. Drejtori i Rekrutimeve, Dr. Sokol Ndoka tregon arsyet se pse UET mbetet edhe sot ishulli i ekselencës
Një logo e suksesshme fiton përjetësinë. Logoja e UET e ka marrë tashmë një status të tillë. Edhe pse me dy dekada jetë në tregun e arsimit të lartë, ky universitet mbetet foleja e ekselentëve. Për vite me radhë studentët dhe maturantët me rezultatet më të mira akademike ia kanë besuar UET-it edukimin dhe zhvillimin profesional, duke përfituar nga benefitet e panumërta që ofron. Rrjeti i ekselencës përbëhet nga qindra mijëra studentë, të mirëpozicionuar në tregun e punës, me eksperienca dhe karriera të suksesshme brenda e jashtë vendit, të cilët janë sot ambasadorët më të mirë të UET.
Kjo lidhje e pandashme e ekselencës me UET-in spikat edhe për vitin akademik 2024- 2025. Një javë para nisjes së regjistrimeve zyrtare për në universitete, të dhënat nga regjistrimet paraprake tregojnë se 20% e kandidatëve për të vijuar studimet bachelor në UET janë maturantë ekselentë. Drejtori i Rekrutimeve, Dr. Sokol Ndoka thotë se ka shumë arsye pse UET prevalon në treg dhe magnetizon ekselencën. “Arsyeja e parë që na zgjedhin maturantët dhe studentët ekselentë është sepse UET ka një emër të mirë në treg dhe prevalon logoja”.
UET nuk është vetëm një histori individuale. Është një histori familjare e kolektive, është një fenomen shoqëror. Studentët që zgjedhin të studiojnë në UET, vijnë edhe me rekomandime të familjarëve, miqve apo të njohurve. Një i afërm i tyre ka bërë minimalisht një cikël studimi bachelor apo master në UET dhe tashmë eksperienca e tyre është një histori që rrëfehet dhe që frymëzon.
Arsyeja e tretë sipas Drejtorit të Rekrutimeve është akreditimi nga QAA. Universiteti Europian i Tiranës u bë universiteti i parë në Shqipëri që mori akreditimin ndërkombëtar. Në vitin 2022, Agjencia e Sigurimit të Cilësisë për Arsimin e Lartë, një agjenci e njohur britanike, e akreditoi UET për pesë vite në bazë të kritereve rigoroze që ajo përdor për të vlerësuar universitetet në mbarë botën. “Falë akreditimit dhe ndërkombëtarizimit, studentët vijnë këtu dhe zhvillojnë ciklin bachelor, ndërsa iu ofrohet mundësia që të përjetojnë një eksperiencë ndryshe në një universitet të huaj, duke ndjekur aty ciklin master”, thekson Ndoka.
Ndërkombëtarizimi ka qenë një nga shtyllat kryesore të vizionit të UET-it në dekadën e dytë të jetës, ndërsa e ka shtruar këtë rrugë nga viti në vit me hapa thelbësorë. Fillimisht ishte përfshirja në projektet Erasmus dhe Erasmus Plus, me rritjen e shkëmbimeve kulturore të studentëve, stafeve akademike dhe administrative me një universitet partner në Bashkimin Europian. Sot UET është gjithashtu universiteti privat në Shqipëri që ka numrin më të madh të mobiliteteve në kuadër të projekteve Erasmus. Ndoka thotë se studentët janë të informuar që UET suporton studentët në Erasmus, nëpërmjet Zyrës së Projekteve dhe Partneriteteve.
Vendosja e kontakteve, nënshkrimi i bashkëpunimeve me rreth 70 universitete ka zgjeruar fushën e shkëmbimeve. Studentët dhe profesorët kanë përfituar nga eksperiencat bashkëkohore të mësimdhënies dhe kërkimit shkencor prej universiteteve më të mira. Sfida e re e UET është tërheqja e studentëve ndërkombëtarë që të mbyllin një cikël të plotë studimi në vendin tonë, duke marrë një diplomë të barasvlershme me çdo universitet tjetër europian.
Akreditimi i QAA dhe ndërkombëtarizimi iu hapin studentëve dyer të reja për në universitetet europiane, kompanitë dhe institucionet ndërkombëtare, apo ndërtimin e urave të komunikimit dhe bashkëpunimit me kolegët e huaj, për projekte e kërkime shkencore në këto kohë sfiduese të fushave të zhvillimit të shoqërisë dhe tranzicionit të natyrës njerëzore.
Është puna e mirë e kryer ndër vite, përkushtimi i pandalshëm, stafi akademik e administrativ i përgatitur dhe suportiv, ndërmarrjet e suksesshme dhe vizioni i qartë, që e kanë kthyer UET-in në një universitet pioner dhe inovativ. Prandaj Ndoka veçon faktin se të pesë fakultetet kanë një staf akademik të përgatitur, të pasionuar e mbështetës, për t’ia lehtësuar studentit periudhën e studimeve, në mënyrë që të marrin më të mirën e këtij rrugëtimi të papërsëritshëm. Po ashtu, studentët ekselentë janë mbështetur me gjymsë bursa dhe bursa të plota, në varësi të mesatares së tyre.
Një logo e shkëlqyer është një histori që nuk tregohet kurrë plotësisht. Ajo është tërësia e emocioneve, ndjesive, momenteve, kujtimeve dhe jetëve të gjithsecilit që bëhet pjesë e historisë së Universitetit Europian të Tiranës.
