10 vite pas diplomimit të brezit të parë, shënohen një numër i madh historish suksesi dhe arritjesh të ish-studentëve të Universitetit Europian të Tiranës.

Ata janë ambasadorët e markës së universitetit. Sukseset dhe arritjet e tyre janë dëshmi e vlerave dhe standardit me të cilat një universitet edukon studentët e tij. Alumni-t janë ndër asetet më të vyera për një institucion të arsimit të lartë, për shkak se kontributi i tyre shkon përtej shkrimit të historisë apo përfaqësimit të vlerave, por edhe te formimi dhe edukimi i brezit të ri me eksperiencat dhe urat e komunikimit që ndërtojnë dita-ditës. Në mbarë botën perëndimore, tradita e një rrjeti Alumni është një traditë e konsoliduar tashmë, ku ish-studentët ruajnë lidhje të forta me universitetin ku kanë studiuar edhe pas diplomimit. Në Universitetin Europian të Tiranës rrjeti Alumni është themeluar në vitin 2009 dhe sot shënon 10-vjetorin e tij.

Që prej diplomimit të brezit të parë, mbi 10 000 kapele janë hedhur në ajër dhe shumë gjurmë suksesi në jetën profesionale janë lënë si një dëshmi e potencialit të një marke. Nisur nga fakti që në qendër të filozofisë së UET si institucion arsimor gjithçka sillet rreth studentit, dija dhe shërbimi janë primare, duke kuptuar rëndësinë e network-ut në ditët e sotme dhe se si studentët aktualë mund të përfitojnë nga eksperienca e të diplomuarve si në aspektin shoqëror, akademik ashtu edhe atë profesional, për vite me radhë UET ka investuar në krijimin e një rrjeti të fuqishëm “UET Alumni”.

Ky rrjet është i përbërë nga ish-studentë që përfaqësojnë diplomën dhe universitetin, tashmë në tregun e punës dhe karrierat profesionale dhe që edhe pas diplomimit janë shumë të pranishëm në jetën e universitetit. Ish-studentët e UET janë lobistët më të mëdhenj të universitetit, janë mbledhësit e fondeve, aplikuesit për projektet, ata që gjenerojnë ide për programe të reja, që krijojnë tregjet e punës për universitetin.

Viti i parë i jetës për rrjetin UET Alumni ishte i karakterizuar nga lidhja e ngushtë e të diplomuarve të brezit të parë, të cilët i përkisnin kryesisht degës Juridik, për të vazhduar më pas me marrëdhënie ndërkombëtare, shkenca politike e marrëdhënie me publikun. Me kalimin e viteve UET u zgjerua në ofertën e tij akademike, duke shtuar fillimisht Fakultetin Ekonomik, për të ardhur sot në dekadën e tij të dytë, me pesë fakultete ku ofrohen për studentët 75 degë, me 125 profile. Rritja graduale e universitetit shoqërohej me forcimin dhe rritjen graduale të këtij rrjeti, i cili shënon sot mbi 10 000 anëtarë, një pjesë e mirë e të cilëve janë ende shumë aktivë në jetën e universitetit.

Më datë 31 maj, ashtu siç e kërkon tradita, do të zhvillohet UET Alumni Festival, ku do të festohet për dëshmitë e suksesit të ish-studentëve. Për shkak se ky është një vit jubile, që shënon 10-vjetorin e krijimit të këtij rrjeti dhe “Çmimi i Karrierës” 2019 do t’i dedikohet brezit të parë të të diplomuarve.
“Fituesi i ‘Çmimit të Karrierës’ 2019 do të jetë një prej 10 kandidatëve që i përkasin brezit të parë të të diplomuarve në UET. Këta janë personazhe, që në jetën e tyre profesionale kanë siguruar arritje, një pjesë ndoshta nuk janë figura publike, por sukseset e tyre janë një shembull frymëzues”, shprehet presidentja e rrjetit Alumni, Adela Danaj.

Në dekadën e dytë të jetës së Universitetit, rrjeti Alumni merr një rëndësi të shtuar. Danaj tregon se Bordet e Tregut të Punës, që prej këtij viti janë të përbërë nga ish-studentët e UET, të cilët kanë tashmë një karrierë të qëndrueshme, dhe në këtë mënyrë mund të kontribuojnë në kuptimin e tregut dhe perspektivave për punësim të studentëve.

“Që prej këtij viti ne kemi zgjedhur që Bordet e Tregut të Punës të jenë të përbërë tërësisht nga ish-studentët tanë. Bordet do të jenë të organizuara më vete për secilin Fakultetet të UET. Eksperiencat që ata kanë kaluar, përvoja e përballjes me tregun e punës, kuptimi në praktikë i kërkesave të punëdhënësve etj., janë një kontribut i shtuar, për të kuptuar se cilat elemente mund të përmirësohen, cilat kurrikula apo programe, me qëllim që studentët e UET të jenë më të përgatitur për përballjen me tregun e punës pas diplomimit.”

Në këtë kuptim, Danaj shton se në 5 vitet e ardhshme Zyra e Alumni dhe Këshillimit të Karrierës, do të jetë tërësisht e fokusuar në krijimin e mundësive të reja për punësim për studentët, falë edhe kontributit të këtij rrjeti.