Ndërkombëtarizimi është një nga faktorët kryesorë që e bën UET një lider në sistemin universitar shqiptar, duke ofruar një cilësi të lartë në bazë të standardeve ndërkombëtare.

Në vitet e fundit, globalizimi ka çuar në nivele të pashembullta të ndryshimit në fusha të ndryshme, nga ekonomia në mjedis, nga mënyra se si bëjmë biznes në mënyrën se si ndërveprojmë me mediat. Me përshpejtimin e ritmit të globalizimit dhe zgjerimin e ndikimit të tij, universitetet kanë filluar të ndryshojnë gjithashtu, duke parë se numri gjithnjë e më i madh i studentëve vjen nga jashtë kufijve kombëtarë. Ato janë gjithnjë në përmirësim të standardeve, njëkohësisht duke bashkëpunuar me universitete të tjera, si në hulumtim ashtu edhe në mësimdhënie. Në aspektin e ndërkombëtarizimit Universiteti Europian i Tiranës ka vite që investon. Një institucion i arsimit të lartë ka si pjesë të përgjegjësive të tij prodhimin e dijes dhe njohurive akademike, si dhe transmetimin e plotë dhe sa më cilësor të tyre te studentët. Në kontekstin e ndërkombëtarizimit dhe në kuadër të këtij objektivi, UET-i ka vite që me anë të marrëveshjeve të bashkëpunimit mundëson mobilitetin e studentëve, si dhe stafit të tij akademik në universitetet më të mira në Europë, për një periudhë kohore nga tre deri në dhjetë muaj. Aspektet pozitive të ndërkombëtarizimit janë të shumta, duke filluar që nga fakti që është një “mjet” i domosdoshëm për “vetëtransformim”, pasi kontakti me ndërkombëtarët u mundëson njerëzve të shohin botën nga një pikë këndvështrimi ndryshe nga e zakonshmja dhe u mundëson atyre të mësojnë rreth kulturave dhe vendeve të reja, është procesi përmes të cilit njerëzit kontribuojnë në botë, duke u formuar njëkohësit nga ajo.

Studentët e UET me diploma suedeze
Universiteti Europian i Tiranës është pjesë e programit më të njohur të shkëmbimit studentor, Erasmus+, prej disa vitesh tashmë, duke dërguar çdo vit studentë të tij, në universitetet më me zë të Europës dhe duke pritur njëkohësisht studentë europianë në auditorët e tij.

Një nga bashkëpunimet më të fundit është ai mes UET dhe Mälardalen University Sweden. Trembëdhjetë studentë shqiptarë do të mund të shkojnë me bursë të plotë në Suedi për 10 muaj, në një program studimi Master në fushën e Teknologjisë dhe Informacionit. Ndryshe nga shkëmbimet e zakonshme Erasmus+, ku bursa mbulon shpenzimet mujore, shpenzimet e jetesës dhe tarifat e universitetit, avantazhi më i madh i kësaj marrëveshjeje është që universiteti pritës në fund ofron edhe një diplomë. Pra studentët që fitojnë këtë mundësi do të përfitojnë diplomë të dyfishtë; një diplomë të Masterit Profesional nga universiteti suedez, si dhe një diplomë të Masterit Shkencor nga UET. Më tepër rreth kësaj mundësie tregon Përgjegjësia e Njësisë së Marrëdhënieve Ndërkombëtare, në Zyrën e Projekteve dhe Partneriteteve në UET, znj. Lutjona Lula.

“Marrëveshja është një marrëveshje Erasmus+ mes Mälardalen University Sweden dhe Universitetit Europian të Tiranës. Është nënshkruar këtë vit dhe parashikon për studentët shqiptarë trembëdhjetë bursa studimi që fillojnë të aplikohen që nga shtatori. Në thelb, shkëmbimi ka të njëjtat përfitime si çdo shkëmbim tjetër Erasmus+, por me avantazhin që në përfundim të studimeve përfitojnë një diplomë masteri profesional me 60 kredite. Në momentin që kthehen në UET, studentët bëjnë konvertimin e lëndëve që kanë ndjekur në Mälardalen University Sweden dhe vazhdojnë masterin e tyre shkencor dhe në fund të dy viteve dalin me dy diploma.”

Thirrjet për këtë mundësi vijojnë të jenë të hapura dhe të gjithë studentët e vitit të tretë në ciklin Bachelor që kanë një kontratë për vijimësinë e studimeve Master në UET, si dhe ata të vitit të parë në ciklin Master, për degën Teknologji Informacioni mund të aplikojnë.

“Thirrja është e hapur aktualisht për studentët e UET që janë Bachelor viti i fundit dhe për studentët që janë aktualisht në master shkencor në vit të parë dhe që dëshirojnë që vitin e dytë të studimeve ta vazhdojnë atje. Këta të fundit kanë mundësinë të punojnë në Suedi me diplomën”, tregon Lula.
Sigurisht ky është një avantazh tjetër i programit, pasi të kesh një diplomë masteri në anglisht dhe me dy supervizorë, një pedagog suedez dhe një shqiptar nga UET është një plus për CV-në e çdo studenti, i cili synon të ketë një karrierë ndërkombëtare, në kompanitë më të mëdha të teknologjisë së informacionit. Krahas diplomave të dyfishta UET ofron për studentët edhe diploma të përbashkëta, siç është rasti i Masterit PoSIG.

Marrëveshjet e shumta të partneritetit shtrihen tanimë përtej kontinentit europian, edhe në kuadrin e pesë fakulteteve të UET.

“Nga periudha e nëntorit aktualisht duke folur ne vijojmë të nënshkruajmë marrëveshje duke pasur prioritet degët e reja dhe fakultetet e reja të UET, mirëpo zbatimi i tyre do të fillojë nga shtatori e tutje, siç është edhe rasti i shkëmbit në Suedi. Në planet afatgjata të UET ne po mundohemi të shtrihemi në mënyrë aktive dhe përtej Europës, jemi në negociata me universitete të tilla si University South Carolina Upstate në SHBA apo South Cross University në Australi për të njëjtin qëllim, mundësinë e krijimit të diplomave qoftë të përbashkëta qoftë të dyfishta”, tregon Lutjona Lula. Një nga faktorët kryesorë që UET është aktiv në arenën ndërkombëtare ka të bëjë me faktin që është një institucion që përgjigjet shpejt, gjithnjë i gatshëm dhe i hapur për bashkëpunim, me mbështetjen e menaxhimit të lartë në këtë proces dhe me një strategji ndërkombëtarizimi, e cila shkon përshtat edhe me prioritetet që ka arsimi në vend dhe prioritetet që ka Bashkimi Europian për arsimin në vendet e Ballkanit Perëndimor.