Studentët prezantojnë asistentin ligjor, platforma që të përball me ligjin

Uf…prapë ligje, programim, kode… Sa herë keni thënë kështu para prezantimit të një detyre kursi apo një projekti me terminologji juridike apo informatike. Me mërzinë më të madhe keni tërhequr këmbët zvarrë deri te auditori, jeni përhumbur në telefon e reels-e dhe keni pritur deri sa e gjitha të mbarojë për të dhënë duartrokitjet e rastit. Kjo sepse ende s’keni qenë në prezantimin e duhur, me njerëzit e duhur, që e bëjnë ligjin dhe kodimin gjënë më të thjeshtë në botë.

Po, po! Me fantazi dhe kreativitet, edhe prezantimi më i mërzitshëm mund të duket më interesanti duke dëshiruar që ai të zgjasë më shumë. Një metodë të tillë kreative, novatore për auditorët, sollën studentët e vitit të tretë bachelor për Informatikë Ekonomike dhe Business Informatics në Universitetin Europian të Tiranës, duke dëshmuar se bashkimi bën fuqinë kur mbizotëron fryma pozitive.

Plot shtatëmbëdhjetë studentë: Adela Ndou, Albi Xhaho, Estel Caca, Oli Gjoka, Marin Gjini, Mateo Nushi, Mateo Torra, Kris Jenishaj, Ensild Hallanjaku, Henerik Lupi, Elion Musabelliu, Armir Smajlaj, Elfat Memaj, Rei Semanaj, Ornela Myrtaj, Jurgen Rade, Geraldo Beqari, koordinuan punët dhe dha secili më të mirën prej vetes për të ndërtuar platformën asiligj.com.

E mbështetur në Inteligjencën Artificiale, ky chatbox funksionon si një asistent ligjor, duke iu dhënë informacion mbi kuadrin ligjor në Shqipëri, vendimet apo udhëzimet në të gjitha sferat e shoqërisë. Platforma u ndërtua në kuadër të lëndës E-Services, nën udhëheqjen e pedagogut Msc. Mikel Qafa.

“E nisëm këtë projekt me idenë për të bërë diçka për administratën, por duke u përpjekur të përgjigjemi pyetjeve kuptuam se ka shumë mungesa sa i përket kuadrit ligjor. Ishte e vështirë për të gjetur. Menduam që të përdorim AI për ndërtimin e një sistemi të përdorshëm nga kushdo, pavarësisht nga njohuritë që ka, ekspert apo fillestar”, theksoi Qafa. Ai u shpreh krenar për faktin që studentët ndërlidhën praktikën me teorinë për të sjellë një gjë mjaft të vlefshme në jetën e përditshme.

Përtej funksionit mjaft të dobishëm të platformës asiligj.com, tërhoqi vëmendjen mënyra se si studentët e paraqitën para pedagogëve dhe kolegëve të tyre.

Prezantimi nisi me një pyetësor nga Estel Caca, e cila testoi njohuritë ligjore të të pranishmëve në auditor. Më tej, përmes një bashkëbisedimi, Adela Ndou dhe Marin Gjini, në pak minuta zbërthyen arsyet pse sollën këtë platformë, çfarë kuadri ligjor gjejnë aty dhe si funksionon ajo.

Dhe për të treguar se sa e dobishme dhe “shpëtimtare” mund të jetë kjo platformë, studentët shpërfaqën aftësitë e tyre në kinematografi, duke sjellë një xhirim të shkurtër kur përballesh me policinë në timon dhe i shpëton gjobës për shkak se ke marrë informacionin e duhur nga platforma online.

Për detajet teknike të ndërtimit të kësaj platforme Ensild Hallanjaku zbuloi të gjithë elementët e përdoruar dhe se çfarë e diferencon atë nga ChatGPT. Në fund të prezantimit u sollën sekuenca filmike nga gjithë procesi i punës, duke dëshmuar kështu se kur disa mendje dhe talente bëhen bashkë, mund të sjellin produkte më cilësore sesa mund t’i bëjë një e vetme.

E kudondodhur sa herë ka aktivitete, projekte e ide novatore nga studentët, dekania e Fakultetit të Inxhinierisë Informatikës dhe Arkitekturës, prof. asoc. dr. Teuta Xhindi nuk i fshehu emocionet.
“Nëse ka arsye që vijoj këtë profesion, janë pikërisht këta studentë. Është tipologjia e studentit me të cilët ballafaqohem sot. Ju jeni motivi pse ne e bëjmë këtë punë me shumë pasion, me shumë dashuri. Kam shumë emocione, që kur u futa deri te fundi i prezantimit.”

Duke iu drejtuar studentëve, prof. Xhindi tha: “Ju doni thjesht një motiv, ju doni një nxitje, një shtytje dhe kjo na takon neve”. Më tej ajo theksoi se po diskutohet që të futet në këto programe studimi një lëndë me njohuri ligjore sa i përket çështjeve teknike të informatikës.

Përgjegjësja e Departamentit të Teknologjisë dhe Informatikës, dr. Ardiana Topi i përgëzoi studentët për punën fantastike dhe frymën e ekipit të dëshmuar në të gjithë procesin.

“Më keni lënë pa fjalë. Në semestrin tjetër, me dëshirën tuaj, do të doja shumë që si ekip të vini të bëni një demonstrim te grupet e tjera për të treguar si punohet në grup. Ku ka më mirë se të ndajmë eksperiencat tona, në një nga orët e seminareve te vitet e para, sepse ata dua t’i motivoj më shumë.”

Ajo ofroi ndihmën dhe eksperiencën e saj në sistemin ligjor për të gjithë studentët që duan të zhvillojnë më tej thellime në këtë fushë me punimet e tyre të diplomave.

“Nëse bëni specifikim të ligjeve, qartësim dhe analizë të tyre, kjo platformë do të jetë shumë e përdorshme në zyrat e avokatisë, në zyrat e asistencës ligjore. Gjithë sistemi gjyqësor do ta gjejë mjaft të përdorshëm”, tha pedagogia.

Dr. Topi specifikoi se ky sistem mund të ndërtohet për segmente të caktuara të kuadrit ligjor shqiptar, por pse jo edhe për sistemin ligjor të Bashkimit Europian që do të shkrihet me atë të vendit tonë, kur ai të bëhet anëtar i unionit.