Profesori italian në auditorin e UET: Pse HIIT është metoda më efektive për stërvitje

Dr. Gian Mario Migliaccio ishte i ftuari i radhës në auditorin e Universitetit Europian të Tiranës për të zhvilluar një leksion të hapur me studentët e programit Edukim Fizik dhe Sporte. Ai është i dyti akademik i huaj që viziton UET brenda kësaj jave, pas pedagogut të asociuar në British University in Dubai (BUiD), dr. Solomon Arulraj David.

Përveçse pjesë e Universitetit San Raffaele në Romë, biolog, nutricionist, autor i librave dhe shumë artikujve shkencorë, Gian Mario Migliaccio është gjithashtu ish-sportist në not, i cili vijon të ndjekë drejtçërdrejtë ecurinë e atletëve dhe profesionistëve të sporteve.
Përgjegjësja e Departamentit të Psikologjisë, Edukimit dhe Sporteve prof. asoc. dr. Erika Melonashi e falënderoi për praninë e tij në UET, për të ndarë me studentët gjithë kërkimet dhe gjetjet, sa i përket HIIT (High Intensity Interval Training- Trajnimi me Interval me Intensitet të Lartë).

Edhe pse e përfolur më së shumti gjatë 20 viteve të fundit, si një mënyrë revolucionare stërvitjeje, në fakt HIIT daton prej fillim shekullit XX-të. Kjo formë trajnimi është përdorur me vrapuesin olimpik finlandez në distanca të gjata, Hannes Kolehmainen, në vitin 1920-të, e më pas edhe nga atletë të tjerë. HIIT konsiston në seanca të shkurtra ushtrimesh intensive të alternuara me periudha pushimi.

I ftuar nga pedagogu MSc. Gert Metani, i cili asistoi në përkthimin e terminologjisë, për ta bërë më të qartë leksionin, Gian Mario Migliaccio ndau me studentët shumë detaje teknike sa i përket stërvitjes, ndikimit në sistemin kardiovaskular, si dhe sugjeroi revista shkencore apo media serioze, prej të cilave mund të marrin gjetjet më të fundit dhe më serioze sa i përket fushës.

Ai tha se, mjaft e rëndësishme në aplikimin e HIIT, është praktika e bazuar në dëshmi, Evidence-Based Practice (EBP), e cila thekson rëndësinë e provave shkencore për të vensosur mënyrën e trajnimit t[ atletit. Metoda e promovuar nga mjeku amerikano-kanadez David Sackett, kërkon vendosjen e pacientit në qendër të çdo diskutimi rreth diagnozës.
“Ky parim është i zbatueshëm edhe për stërvitjet sportive, duke integruar përvojën praktike me provat më të mira shkencore”, theksoi Migliaccio, teksa sqaroi se sot është bërë kritik përdorimi i kësaj metode. “Për ta përdorur në mënyrë efektive EBP, duhet të filloni me atletin, të mblidhni të dhënat e tij trupore dhe të vlerësoni çfarë i përshtatet, të krijoni një përmbledhje dhe të vlerësoni vazhdimisht rezultatet për të përmirësuar performancën.”

Më tej, ai u ndal te përshtatja kardivaskulare, rëndësia e kontrollit të parametrave, për të vendosur intensitetin e stërvitjes. Më pas shpjegoi përmirësimet që ka vetë sistemi kardiovaskular nga kjo formë stërvitjej, siç janë rritja e qëndrueshmërisë, një zemër më efikase që pompon më shumë gjak në çdo rrahje, rritja e shpejtësisë dhe fuqisë së atletit. HIIT zakonisht konsiderohet të jetë një stërvitje kardio, pasi përfiton kryesisht shëndetin kardiovaskular dhe të zemrës.

Duke qenë se ka shumë protokolle të stërvitjes me intervale me intensitet të lartë dr. Gian Mario Migliaccio dha disa sugjerime për studentët. Një prej tyre ishte stërvitja Billat 30-30, sipas krijuesit Veronique Billat, një fiziologe ushtrimesh në Universitetin e Ille në Francë. Billat vendosi një synim për të krijuar formate stërvitjeje që do t’i lejonin vrapuesit të shpenzonin sasinë më të madhe të kohës dhe do të prodhonin efektin më të fuqishëm të zhvillimit.

Profesori tha se HIIT është më efektive, pasi sipas kërkimeve shkencore, përmirëson jashtëzakonisht funksionin e enëve të gjakut dhe kapacitetin kardiorespirator, jep rezultat të dukshëm në një kohë më të shkurtër. Sigurisht që gjithçka duhet të jetë nën monitorim nga trajneri, për të cilin sugjeroi që për të përshtatur protokollet me nivelin e atletit duhet të marrë parasysh periodizimin, kombinimin e stërvitjes me forcën dhe integrimin në një program të ekuilibruar.