Prezantohet në UET Grant 2025, mbështetje financiare për startup-et e studentëve dhe pedagogëve

Agjencia Startup Albania prezantoi për studentët dhe pedagogët e Universitetit Europian të Tiranës mundësitë që ofrohen nga Grant 2025, thirrja që mbyllet në fund të muajit dhjetor. Studentët dhe pedagogët do të mbështeten financiarisht për 9 muaj për zhvillimin e ideve të tyre novatore.

U zhvillua në Universitetin Europian të Tiranës sesioni informues për shpalljen e thirrjes Grant 2025, programi për mbështetjen e kompanive startup dhe lehtësuesit e startup-eve. Për realizimin e këtij misioni është krijuar Agjencia shtetërore Startup Albania, e cila stimulon sipërmarrjen inovative duke ofruar financim për kompanitë startup më premtuese shqiptare.

Gjatë prezantimit për studentët dhe pedagogët, drejtuesi i kësaj agjencie, Arjan Ymeri theksoi se për vitin 2024 janë financuar rreth 10-12 projekte të ardhura nga universitetet, por saktësoi se synimi i tyre është që për vitin tjetër të rritet numri i këtyre startup-eve.
“Nga universitetet kemi financuar 10-12 projekte që kanë ardhur nga pedagogë ose ekipe, studentë plus pedagogë dhe duam që këtë vit ta dyfishojmë këtë numër. Shikojmë se ka më shumë kualitet kur vijnë nga universitetet sesa ka kur vijnë nga jashtë tyre.”

Ashtu si një vit më parë, shuma e grantit për 2025 kap vlerën e 300 milionë lekëve, e cila do të shkojë për idetë më të mira të individëve apo bizneset që plotësojnë kriteret, sipas tre fazave të grantit. Faza e parë është për individë ndërsa dy të tjerat për kompani.

Mbështetjen me grant e përfitojnë startup-et dhe lehtësuesit e startup-eve të vetëdeklaruar në regjistrin elektronik të startup-eve dhe lehtësuesve, që janë të pajisur me pasaportën përkatëse. Aplikantët mund të jenë individë, nomadë dixhitalë, kompani private mikro, të vogla dhe të mesme të themeluara në Shqipëri, jo më të vjetra se 6 vjet në momentin e aplikimit.

Financimi i dhënë nga qeveria shqiptare në kuadër të mbështetjes me grante 2025, do të mbulojë 100% të kostove totale të projektit për aplikantët fitues në fazën e parë – Faza e Ndërtimit të Konceptit; 85% të kostove për aplikantët fitues në fazën e dytë – Faza e Validimit dhe 75% të kostove për aplikantët në fazën e tretë – Faza e Zgjerimit dhe Ndërkombëtarizimit. Afati i implementimit të projekteve për vitin 2025 do të jëtë afërsisht 9 muaj.

Referuar Grant 2024, Ymeri sqaroi se ishin 94 fitues në total, 89 prej të cilëve u financuan, startup-et e të cilëve ishin kryesisht në: IT, AI, tregti elektronike, disa komponentë në turizëm, energji, marketing, ESG. Po ashtu, mosha mesatare ka qenë deri në 35 vjeç dhe shpërndarja ka qenë kryesisht në Tiranbë dhe shumë pak nëpër rrethe.

Për këtë vit mbështetja financiare shkon në zhvillimin e projekteve që vijnë nga të gjitha fushat e ekonomisë, shkencës dhe teknologjisë, si dhe do të shihen me prioritet startup-et që i përkasin Strategjisë S3; ato që kanë fokus ekonominë e gjelbër dhe digjitale; ato që synojnë fuqizimin e të rinjve, vajzave e grave; si dhe komercializimi i projekteve të bazuara në shkencë, kërkim dhe zhvillim. Fituesit e granteve do të marrin shërbime konsulencë dhe ekspertize nga një institucion i arsimit të lartë publik për industri të ndryshme (zhvillimi teknologjik, agrobiznesi, pronësia industriale dhe intelektuale etj.) gjatë fazës së zbatimit të projektit.

Ymeri sqaroi se janë disa grupe që agjencia synon të nxisë më tepër. “Kushdo aplikant, vajzë apo grua, merr 5% pikë bonus dhe nëse janë me pikë paralele me djemtë shpallen ato fituese. Po ashtu, një ekip që përbëhet nga 2/3 vajza ka prioriet ndaj një grupi që ka 2/3 djem.” Ai sqaroi më tej se kjo bëhet për të nxitur vajzat e gratë, që ishin më të pakta vitin e kaluar. Po ashtu me 5% pikë bonus do të jenë ato që zgjedhin industrinë digjitale dhe të gjelbër.

E reja tjetër e këtij viti është përmirësimi i skemës për përfshirjen e institucioneve lehtësuese, që janë universitetet. “Nëse ju aplikoni dhe merrni universitetin me vete, pra një letër rekomanduese prej tij, ju përfitoni gjithahtu 5% bonus pikësh. Nuk aplikon universiteti, por vetëm ju dhe në këtë rast institucionit i alokohet një buxhet që mund të jetë deri në 10% të vlerës së fondit total.”

Gjithashtu, në mbështetje të këtij programi, Agjencia Startup Albania do të ofrojë mbështetje me mentorë dhe trajnime në fusha të tilla si zhvillimi i biznesit, marketing, shitjet, mbrojtjen dhe menaxhimin e pronësisë intelektuale dhe të tjera, në varësi të nevojave specifike të startup-eve. Numri i projekteve fituese do të përcaktohet nga cilësia e aplikimeve dhe do të jenë subjekt i totalit të fondeve të disponueshme ose të alokuara për vitin 2025, ndërsa të gjitha idetë e propozuara do të kalojnë dy faza.

“Vlerësimin administrativ e kryen Sekretariati i agjencisë, që shikojnë nëse i keni dorëzuar dokumentet sipas formatit dhe a janë të gjitha të vlefshme. Pastaj kalon në Komisionin e Vlerësimit me pesë anëtarë, 4 prej të cilëve janë nga jashtë Agjencisë dhe qeverisë, mund të jenë persona nga akademia dhe ne kemi hapur thirrjen. Pas vlerësimit, ka edhe një Komision Ankimi që trajton ankesat.”

Aplikimet do të pranohen deri në fund të muajit dhjetor, ndërsa në janar të 2025 do të bëhet shpallja e fituesve. Në muajin shkurt do të bëhet lidhja e kontratës dhe do të jepet kësti i parë i financimit. Mbi ecurinë e punës dhe zhvillimit të projektit do të bëhet një raport në muajin qershor të 2025, ku edhe do të jepet kësti i dytë. Tre muaj më pas, në shtator, fituesi do të bëjë një raportim të dytë dhe në muajin dhjetor do të bëhet raporti i tretë dhe ku do të jepet kësti i fundit.

Monitorimi i granteve do të vijojë edhe për 12 muaj nga mbarimi i projektit, gjatë të cilit do të raportohet çdo katër muaj. Studentët dhe pedagogët mund ë marrin më tepër informacion mbi kriteret dhe fazat e aplikimit të projekteve përmes faqe së Instagramit të Agjencia Startup Albania dhe takimeve asistuese që ajo ofron, ose mund të vizitojnë website-in e Ministrisë së Shtetit për Sipërmarrjen dhe Klimën e Biznesit, ku gjenden të gjitha dokumentet e nevojshme.