Prezantohet në UET draft-analiza për antikorrupsionin, Etilda Gjonaj: Mbetet problem mentaliteti i shoqërisë

UET ishte universiteti i zgjedhur nga Komisioni i Posaçëm Parlamentar për të prezantuar gjetjet, të dhënat dhe rekomandimet për çështjen e antikorrupsionit në Shqipëri. Në këtë analizë ku kanë dhënë kontributin e tyre pedagogët e UET, u diskutua për gjetjen e mënyrave që bëjnë pjesë të procesit edhe të rinjtë.

“Problemi që kemi në Shqipëri është se përgatisim dokumente shumë të mira por hasim probleme në zbatim.” Për presidentin e UET, prof. asoc. dr. Selami Xhepa duhet të realizohen konsultime të herëpashershme me grupet e interesit, e në veçanti me universitetet dhe me të rinjtë, për të ndikuar në rritjen e efikasitetet në zbatimin e strategjive.

Për këtë arsye, prof. Xhepa falënderoi përfaqësuesen e Komisionit të Posaçëm, Etilda Gjonaj që zgjodhi UET për të bërë këtë dialog qytetar dhe për të prezantuar disa nga gjetjet më të rëndësishme nga puna e ekspertëve dhe akademikëve të përfshirë në ndërtimin e strategjive që luftojnë korrupsionin.
Presidenti i UET tha më tej se korrupsioni është një model kulturor që ngulitet në shoqëri dhe fatkeqësisht bëhet shumë e vështirë shkatërrimi i kësaj tipologjie.

Duke ndarë të njëjtin mendim, ish- ministrja e Drejtësisë Etilda Gjonaj, tha se “nëse mentaliteti i shoqërisë nuk ndryshon, sado ligje të mira, sado sisteme të mira, sado arkitekturë të mirë institucionale të ngrihet, mbetet i vështirë minimizimi i korrupsionit.”
Gjonaj tha më tej se çështja e korrupsioni është trajtuar më herët dhe është pjesë e shumë strategjive, planeve të veprimit, strategjive që ndërmerr qeveria. Por puna e Komisionit të Posaçëm Parlamentar “Për thellimin e reformave për mirëqeverisjen, sundimin e ligjit dhe antikorrupsionin për Shqipërinë 2030 në Bashkimin Evropian” vjen në një moment të rëndësishëm për Shqipërinë.

“Është iniciativa më e mirë në kuadër të procesit të integrimit europian të Shqipërisë. Grup kapitulli i diskutimeve që lidhet me shtetin e së drejtës dhe luftën kundër korrupsioni është i pari që hapet dhe i fundit që mbyllet, për shkak të të gjithë vështirësive që ka sepse shteti duhet të arrijë standardet e një shteti anëtar të BE-së”, theksoi ajo më tej duke specifikuar se kjo iniciativë ka ardhur nga Kuvendi për shkak se është institucioni që përfshin të gjithë aktorët institucionalë dhe shoqërorë, për të pasur një pjesëmarrje gjithëpërfshirëse.

Përgjegjësja e Departamentit të Shkencave Juridike, dr. Sofjana Veliu tha se komisioni iu ka bërë thirrje të gjithë atyre organeve, grupeve brenda sistemit të drejtësisë për të kontribuar me ekspertizën, por edhe medias dhe institucioneve akademike.
“Një përfshirje e rëndësishme ka qenë edhe trupa akademike dhe shoqëria civile, që janë një garanci për të synuar dhe për të nxjerrë maksimumin e mendimit intelektual.”

Pedagogia e UET prezantoi më tej gjetjet dhe rekomandimet nga grupi i ekspertëve në lidhje me ndërtimin e një shoqërie me integritet, duke u fokusuar në dia elementë: përmirësimin e kuadrit ligjor; rritjen e efektivitetit të hetimeve; digjitalizimin dhe bashkëpunimin ndërinstitucional si dhe rritjen e transparencës në investimet e huaja.

Prof. asoc. dr. Ledjon Shahini, pedagog në Fakultetin e Ekonomisë në Universitetin e Tiranës, prezantoi problematikat e gjetura gjetjet dhe rekomandimet e lëna nga ekspertët në disa sektorë: parandalimi dhe lufta kundër korrupsionit politik dhe në sektorët me risk më të lartë ndaj korrupsionit në qeverisjen qendrore dhe vendore; funksionimi dhe eficenca e institucioneve që luftojnë korrupsionin, konfliktin e interesit dhe abuzimin me financat publike, si dhe parandalimi i financimeve të paligjshme dhe i pastrimit të parave.

Pedagogët dhe studentët e UET u përfshinë në një diskutim mbi punën e këtij komisioni, përfshirjen e shoqërisë civile, duke evidentuar çështjet që i shohin sot si problematike, por edhe duke dhënë mendimin e sugjerimet e tyre se çfarë mund ë përmirësohet më tej në luftën kundër korrupsionit.