Universiteti Europian i Tiranës ka prezantuar ditën e djeshme Bordin e ri të Besimit, i cili përbëhet nga pesë anëtarë, profesionistë dhe personalitete të spikatura në fushat përkatëse, të cilëve u përshtaten të pesta fakultetet e UET. Një prej anëtarëve të këtij Bordi është edhe Prof. Asoc. Dr. Selami Xhepa, i cili njëkohësisht u prezantua zyrtarisht dje si Presidenti i ri i Universitetit Europian të Tiranës. Xhepa është një figurë e njohur dhe profesor i shkencës së ekonomisë dhe vjen në këtë pozicion të ri për të vijuar një traditë të shkëlqyer në funksionimin që i jep roli i Presidentit, si pjesë e imazhit dhe e komunikimit publik të universitetit me shoqërinë dhe aktorët e tjerë vendimmarrës. Ai është shprehur falënderues për besimin që i është dhënë për të mbajtur një pozicion kaq të rëndësishëm në universitet, si dhe ka vlerësuar të gjithë drejtuesit e mëparshëm të UET për punën e deritanishme, që e ka shndërruar këtë universitet në një nga institucionet më serioze dhe prestigjioze të arsimit të lartë në vend. Gjithashtu Prof. i Asoc. Dr. Selami Xhepa ka theksuar faktin që është i përkushtuar për të vijuar investimin në këtë aspekt.

“Ruajtja e emrit të Universitetit Europian të Tiranës, konsolidimi i reputacionit të universitetit, arritja e standardeve më të larta në kontekstin e realiteteve të reja, sigurisht që përbën një sfidë për të gjithë. Përbën edhe për postin dhe detyrën time, njëkohësisht edhe për të gjithë anëtarët e Bordit të Besimit një sfidë, të cilën ne të gjithë së bashku duhet ta ndajmë dhe ta zhvillojmë, për ta çuar më përpara emrin dhe reputacionin e universitetit. Unë mendoj që sfidën më të madhe bota e sotme universitare, edhe në kontekstin e zhvillimeve që kanë ndodhur gjatë këtij viti, e kanë në radhë të parë me vetveten dhe me shoqërinë. Pra ballafaqimin më të rëndësishëm sot ne e kemi me shoqërinë. Pritshmëritë e shoqërisë shqiptare janë jashtëzakonisht më të larta në raport me atë se çfarë vetë sistemi universitar ofron. Në veçanti deficitet që janë krijuar janë edhe si pasojë e rrjedhojës së mungesës së reformave, të atyre proceseve reformuese, të cilat nisën, por fatkeqësisht nuk u përfunduan asnjëherë, madje disa prej këtyre proceseve edhe po prapësohen. Në këtë kuptim, rikrijimi apo rifitimi i besimit të publikut në përgjithësi nga sistemi universitar, mendoj që mbetet një sfidë jashtëzakonisht serioze. Një universitet privat si UET ka qenë një arenë e hapur për publikun dhe në fakt lidhja me komunitetin ka qenë pika më e fortë dhe e fuqishme e jona, jo vetëm në aspektin e aktiviteteve të përjavshme që ne bëjmë, por në të gjithë aktivitetin vjetor akademik prezenca e publikut këtu dhe e universitetit në publik, ka qenë ndoshta një nga elementet më interesante që i ka dhënë universitetit tonë atë kredibilitet, emër dhe reputacion që ai gëzon.

Problemi i dytë themelor që mendoj se kemi ne sot përsëri është nevoja për të rifilluar edhe një herë dialogun me qeverinë dhe në kontekstin e kësaj, me të gjithë aktorët shoqërorë, sepse, siç e thashë, unë besoj që është tronditur besimi i shoqërisë ndaj arsimit të lartë në përgjithësi dhe kjo shpjegon shumë nga fenomenet e sotme që po ndodhin. Duhet të rindërtojmë edhe një herë një proces të rëndësishëm dialogu me aktorët themelorë politikëbërës në mënyrë që axhendën e reformës në sistemin e edukimit të arsimit të lartë, ne ta risjellim në vëmendjen e shoqërisë dhe në këtë kuptim ne të qartësojmë më mirë rolet, objektivat, detyrimet që çdo aktor i shoqërisë ka në raport me sfidat e zhvillimit të ardhshëm. Mos të harrojmë që konteksti i zhvillimeve të sotme të ekonomisë globale nënkupton që zgjidhjet duhet të jenë jashtëzakonisht të shkurtra dhe në këtë kuptim jetëgjatësia e çdo lloj procesi është jashtëzakonisht e shkurtër dhe për pasojë, që të jesh fleksibël dhe t’u përgjigjesh dinamikave që shtron koha, fatmirësisht ky është një avantazh që vetëm universitetet private e kanë, por jo të gjithë e bëjnë atë. Unë besoj që është detyra jonë dhe e drejtuesve të rinj të universitetit që të realizohet ky mision. Të shfrytëzojmë këtë avantazh, fleksibilitetin që ne kemi, për t’iu përgjigjur në kohë sfidave që ka shoqëria dhe ekonomia.”