Një hap më pranë profesionit/ Studentët e Arkitekturës sjellin në një ekspozitë punimet e tyre më të mira

Dy vite më parë, në maj të 2022, maturantja Armela Dema nuk e kishte menduar se një aplikim i thjeshtë do t’i ndryshonte rrjedhën e jetës. Si shumë maturantë aplikoi dhe u përzgjodh nga Universiteti Europian i Tiranës për të qenë pjesë e Shkollës së Inovacionit, një aktivitet i përvitshëm që zhvillohet nga Fakulteti i Inxhinierisë, Informatikës dhe Arkitekturës.

Eseja e saj u shpall punimi më i mirë dhe fitoi një bursë të plotë. “Më mposhtën fjalët e esesë dhe bënë të mundur që në duart e mia të vinte një bursë e të më hapte dyert e këtij profesioni”, tregon Armela, sot në vitin e dytë të studimeve për Arkitekturë. “Aty kuptova sa e madhe ishte ëndrra dhe dëshira ime për të qenë pjesë e UET”, shton më tej, duke veçuar përkushtimin e pedagogëve si një faktor ndikues në zgjedhjen e saj.

Armela është një ndër studentët e Departamentit të Arkitekturës dhe Inxhinierisë që paraqitën punimet e tyre në edicionin e tretë të ekspozitës me titull “ARK EXPO 2024”, kuruar dhe sjellë me shumë kujdes në ambientet e universitetit.

“Punimet kryesisht janë të realizuara me dorë, disa të hedhura në autocad për të bërë ndërlidhjen me programet e ndryshme që ne kemi mësuar gjatë gjithë vitit”, sqaron Armela. Shton më tej se viti i dytë e ka bërë të përjetojë më tepër ndjesinë e të qenit arkitekte, si dhe të kuptojë aftësitë e saj, duke zhvilluar vazhdimisht projekte dhe punime të ndryshme në kuadër të programit mësimor.

Dekania e Fakultetit të Inxhinierisë, Informatikës dhe Arkitekturës, prof. asoc. dr. Teuta Xhindi u shpreh e emocinouar nga puna e studentëve, nga formati i pasqyrimit, duke e cilësuar ekspozitën një markë të Arkitekturës.

“Ju përgëzoj për punën dhe të gjithë elementët, duke filluar nga mënyra se si janë të vendosura, skenari i përzgjedhur. Është nga ato raste që ndihemi shumë mirë për punën që bëjmë, që përkushtimi në përditshmërinë tonë jep rezultatet e veta”, nënvizoi ajo.

Xhindi tha se kjo ekspozitë iu vjen në ndihmë studentëve të zgjerojnë portofolin e punimeve, ndërsa i nxiti që të mos ngurrojnë për të marrë pjesë në Panairin e Karrierës që zhvillohet në ambientet e universitetit më 30 maj.

“Eventi më i mirë për të prezantuar veten, për të krijuar komunikimin e kontaktin e parë, që do të shërbejë si pikënisje për karrierën tuaj. Flas për ata që nuk kanë eksperiencë, ndërsa për ata që kanë, kjo është e radhës”, tha Xhindi.

Po të njëjtat emocione ndau prof. asoc. dr. Otjela Lubonja, përgjegjësja e Departamentit të Arkitekturës dhe Inxhinierisë, e cila punoi me studentët për realizimin e kësaj ekspozite. “Është shumë emocionuese kur punon pranë studentëve kaq të talentuar”.

Lubonja falënderoi kolegët që kontribuuan në këtë ngjarje, e cila po kthehet në traditë. Ekspozita përmban punime të mbështetura në lëndët e zhvilluara kryesisht në semestrin e parë të këtij viti akademik, si: Makete, Studio Arkitekture 1, ku studentët mësojnë të projektojnë banesa familjare, dizajn të brendshëm, Teoria dhe Teknikat e Skenografisë.

Sonja Pengili, studente e vitit të tretë në Arkitekturë, dhe Desara Hyseni, studente e vitit të katërt, folën për projektet e paraqitura, elementët e përzgjedhur dhe tematikat e eksploruara, duke u përqendruar veçanërisht te projektet familjare, interior dizajn i banesave, e deri te krijimet skenografike apo projektime më të mëdha arkitekturore.

Hyseni, e pasionuar pas skenografisë, duke ndërthur elementët e arkitekturës dhe kinematografisë, shpërfaqi edhe talentin në muzikë. E nisur me tingujt e pianos nga pedagogu i Arteve, Kristi Bello, prezantimi i ekspozitës u përmbyll me këngën e saj, për të vijuar më tej me shijimin e punimeve të paraqitura e me biseda rreth punës, frymëzimit e elementëve të përzgjedhur nga gjithsecili.