Lider në ndërkombëtarizim/ 11 studentë nga Franca, Italia, Portugalia dhe Spanja vijnë për të studiuar në UET

Nga Franca, Italia, Portugalia dhe Spanja në Universitetin Europian të Tiranës. Njëmbëdhjetë studentë të huaj do të ndjekin semestrin e dytë të vitit akademik 2023- 2024 në auditorët e një universiteti shqiptar.

Me nisjen e semestrit të ri, është organizuar “Welcome Day” në ambientet e UET dedikuar mikpritjes së studentëve, të cilët lanë studimet në Universitetin e Rouen në Francë, atë të Bolonjës në Itali, Universitetin Beira Interior në Portugali, Universitetin e Studimeve Ndërkombëtare të Romës si dhe Universitetin e Almerias në Spanjë, duke u bërë pjesë e Departamentit të Shkencave Politike dhe Departamentit të Ekonomisë në UET.

Për disa muaj, jo vetëm që do të marrin mësime në fushat e tyre të studimit, por do të kenë mundësinë të njihen me kolegët shqiptarë, të njohin kulturën, të vizitojnë vende të reja turistike, të shijojnë kulinarinë vendase, etj.

Në të njëjtën kohë, një mundësi e tillë iu është ofruar edhe studentëve të UET. Për këtë semestër 21 studentë po studiojnë në një nga universitetet europiane me traditë të cilët janë partnerë me UET.

Përmes projekteve ndërkombëtare, të fituar nga Zyra e Projekteve dhe Ndërkombëtarizimit në UET dhe përfshirjes së gjerë në programin Erasmus+ të shkëmbimit studentor dhe stafeve, Universiteti Europian i Tiranës është lider i ndërkombëtarizimit mes universiteteve shqiptare.

Që prej vitit 2016, UET ka zhvilluar dhe çuar përpara mbi 45 projekte ndërkombëtare dhe qindra studentë dhe anëtarë të stafeve akademike e administrative të huaj kanë ardhur për një eksperiencë shkëmbimi në këtë universitet dhe studentë bashkë me staf të këtij të fundit, kanë përjetuar dhe vijojnë të përfitojnë nga eksperiencat e Erasmus +.

Viti 2022 e bëri UET universitetin e parë shqiptar që ka marrë një vlerësim institucional nga një agjenci e huaj. UET kaloi me notën dhjetë vlerësimin e agjencisë britanike të sigurimit të cilësisë, QAA për dhjetë standardet dhe udhëzimet për zonën europiane të arsimit të lartë, të cilat duhet t’i përmbushin edhe universitetet e zonës së Bashkimit Europian.

Drejtorja ekzekutive e kësaj agjencie, Vicki Scott, vizitoi UET gjatë ceremonisë së diplomimit të studentëve në korrik të 2023, duke shprehur përkushtimin ndaj universiteteteve në rrugën e tyre të përmirësimit.

Akreditimi jepet pas një procesi rigoroz që përfshin të gjithë universitetin: akademikët, ekipin drejtues, punonjësit dhe sigurisht studentët. Sipas raportit përfundimtar, i cili është botuar edhe në faqen zyrtare të QAA, Universiteti Europian i Tiranës i ka përmbushur plotësisht ato që njihen edhe si 10 ESG-të apo standardet dhe udhëzimet e përcaktuara më 2015-n, për zonën europiane të arsimit të lartë, duke nisur me politikën e sigurimit të cilësisë, me mënyrën sesi një institucion dizajnon dhe aprovon programet, më pas çështje që lidhen me mësimdhënien dhe mësimnxënien që kanë në qendër studentin dhe vlerësimin, me stafin mësimdhënës, pastaj vlerësohet mënyra e menaxhimit të informacionit, informimi publik, progresi i studentit, njohja e programeve të studimit. Kalohet më tej te monitorimi i vazhdueshëm dhe vlerësimi periodik i programeve e në fund standardi i dhjetë me vlerësimin e jashtëm të cilësisë në mënyrë ciklike.

Përmes projekteve ndërkombëtare, UET synon të integrohet në rrjetet akademike europiane,  si edhe të promovojë mjediset e të të mësuarit ndërkombëtar. UET synon gjithashtu të përgatisë stafin dhe studentët për kërkim shkencor bashkëpunues si edhe veprimtari akademike, bashkë me partnerët e universiteteve në vende të BE-së, si edhe të shtrijë më tej strategjinë e ndërkombëtarizimit me aspekte të mobilitetit virtual.

Mes projekteve që kanë në thelb rritjen e kapaciteteve në arsimin e lartë, UET ka sjellë për herë të parë në Shqipëri Jean Monnet Center of Excellence, duke qenë edhe i vetmi në Ballkan që e ka fituar për vitin 2022.

Aktualisht, ky universitet ofron një diplomë të përbashkët master në Shkenca Politike POSIG, me Universitetin e Salzburgut dhe disa diploma të dyfishta me universitetin Ludwigshafen, Gjermani, Malardalen, Suedi, London South Bank University në Britaninë e Madhe dhe IMS Geneva, në Zvicër. Këto diploma janë si për nivelin bachelor, ashtu edhe master në degët Administrim Biznesi, Menaxhim, Financë, IT.

Në datat 8- 12 prill do të organizohet UET International Days, evenimenti i tetë i cili synon të sjellë më afër praktikat më të mira evropiane në Shqipëri. Aktiviteti katërditor do të zhvillohet me pjesëmarrjen e stafeve nga partnerët e BE-së dhe ata të rajonit, si dhe të palëve të interesuara vendore. Qëllimi është të lidhë universitetet shqiptare dhe europiane me potencialin e rrjetëzimit dhe ideve për projekte dhe partneritete të ardhshme.