International Days/ UET mirëpret stafet e universiteteve partnere europiane

Universiteti Europian i Tiranës organizon për të nëntin vit radhazi International Staff Week, një event që synon rrjetëzimin, shpërndarjen e praktikave më të mira akademike, njohjen më nga afër me universitetin, por edhe me vendin tonë. Përgjatë një jave, 7-11 prill, anëtarë të stafeve akademike e administrative, nga universitete të ndryshme europiane, do të bëhen pjesë e aktiviteteve që UET do të zhvillojë, si dhe do të njihen me elementë të tij specifikë që kanë të bëjnë me ndërkombëtarizimin, projektet europiane dhe kërkimin shkencor.

International Days startoi të hënën me vizitën në Universitetin Europian të Tiranës të 16-të pjesëmarrësve të këtij viti nga Universiteti i Sienës, Universiteti i Teknologjisë Lodz (Poloni), Universiteti i Barit, Universiteti Lucian Blaga i Sibiut (Rumani), Universiteti WSEI (Poloni), Universiteti i Triestes, Universiteti i Varshavës etj. Të organizuar nga Zyra e Marrëdhënieve Ndërkombëtare pranë UET, ata patën një takim me rektoren prof. dr. Drita Kruja, e cila u shpreh e lumtur që kanë zgjedhur të vijnë në Shqipëri për të mësuar më shumë për arsimin dhe kulturën tonë, si dhe për të forcuar partneritetet mes universiteteve.

Dita e dytë, më 8 prill, do të vijojë me një aktivitetet në Europe House, ku do të shfaqen gjithë projektet e suksesshme të Erasmus +, të financuara nga Komisioni Europian, të tilla si: CBHE, VET, Horizon, pjesë e të cilave është dhe vijon zbatimin e tyre Universiteti Europian i Tiranës. Do të flitet për impaktin, rëndësinë dhe produktin që kanë sjellë, në funksion të përmirësimit të arsimit apo elementëve të tjerë në shoqërisë shqiptare e më gjerë.
Dita e mërkurë është konsideruar për të qenë një ditë e lirë eksplorimi, për të njohur atraksione turistike, apo aspekte të veçanta të kryeqytetit, që kanë të bëjnë me kulturën, historinë, kulinarinë etj.

Më 10 prill ata do të ndjekin ditën e parë të Konferencës Ndërkombëtare Ditët e Studimeve Shqiptare, një traditë disavjeçare e UET, tematika e së cilës ka të bëjë me nxitjen e inovacionit në kuadër të agjendës së re konkurruese të Bashkimit Europian. Eventi do të çelet nga rektorja Drita Kruja, ndërsa do të thonë fjalën e tyre Shefi i Delegacionit të Bashkimit Evropian në Shqipëri, Silvio Gonzato, Ministrja e Shtetit dhe Kryenegociatorja, Majlinda Dhuka, përfaqësues të opozitës dhe institucioneve të tjera që janë të lidhura me proceset e integrimit të Shqipërisë në BE.

Konferenca do të vijojë me fjalën e profesorit të Universitetit të Bolonjës, prof. Francesco Privitera, njëkohësisht një ekspert i njohur në fushën e studimeve të integrimit në BE, i cili do ta vendosë theksin në zhvillimet aktuale dhe sfidat e ardhshme sa i përket zgjerimit të unionit.
Në pjesën tjetër do të prezantohen rezultat e dy projekteve: Jean Monnet – FinanciAL-EU nga prof. asoc. dr. Selami Xhepa dhe Jean Monnet Center of Excellence – EUFutur nga prof. asoc. Elona Shehu.

Dita e dytë e Konferencës Ndërkombëtare DSSH do të zhvendoset të premten në ambientet e Universitetit Europian të Tiranës, ku do të zhvillohen prezantime të punimeve shkencore nga pedagogë, doktorantë, hulumtues, brenda dhe jashtë Shqipërisë, për të sjellë gjetje dhe teza të reja mbi çështjet më të ngutshme që prekin shoqërinë shqiptare, në këtë kohë sfidash globale.